૨. અભિસમયસંયુત્તં

૧. નખસિખાસુત્તવણ્ણના

૭૪. અભિસમયસંયુત્તસ્સ પઠમે નખસિખાયન્તિ મંસટ્ઠાનેન વિમુત્તે નખગ્ગે. નખસિખા ચ નામ લોકિયાનં મહતીપિ હોતિ, સત્થુ પન રત્તુપ્પલપત્તકોટિ વિય સુખુમા. કથં પનેત્થ પંસુ પતિટ્ઠિતોતિ? અધિટ્ઠાનબલેન. ભગવતા હિ અત્થં ઞાપેતુકામેન અધિટ્ઠાનબલેન તત્થ પતિટ્ઠાપિતો. સતિમં કલન્તિ મહાપથવિયા પંસું સતકોટ્ઠાસે કત્વા તતો એકકોટ્ઠાસં. પરતોપિ એસેવ નયો. અભિસમેતાવિનોતિ પઞ્ઞાય અરિયસચ્ચાનિ અભિસમેત્વા ઠિતસ્સ. પુરિમં દુક્ખક્ખન્ધં પરિક્ખીણં પરિયાદિણ્ણં ઉપનિધાયાતિ એતદેવ બહુતરં દુક્ખં, યદિદં પરિક્ખીણન્તિ એવં પઠમં વુત્તં દુક્ખક્ખન્ધં ઉપનિધાય, ઞાણેન તં તસ્સ સન્તિકે ઠપેત્વા ઉપપરિક્ખિયમાનેતિ અત્થો. કતમં પનેત્થ પુરિમદુક્ખં નામ? યં પરિક્ખીણં. કતમં પન પરિક્ખીણં? યં પઠમમગ્ગસ્સ અભાવિતત્તા ઉપ્પજ્જેય્ય. કતમં પન ઉપનિધાય? યં સત્તસુ અત્તભાવેસુ અપાયે અટ્ઠમઞ્ચ પટિસન્ધિં આદિં કત્વા યત્થ કત્થચિ ઉપ્પજ્જેય્ય, સબ્બં તં પરિક્ખીણન્તિ વેદિતબ્બં. સત્તક્ખત્તુન્તિ સત્ત વારે, સત્તસુ અત્તભાવેસૂતિ અત્થો. પરમતાતિ ઇદમસ્સ પરં પમાણન્તિ દસ્સેતિ. મહત્થિયોતિ મહતો અત્થસ્સ નિપ્ફાદકો. પઠમં.

૨. પોક્ખરણીસુત્તવણ્ણના

૭૫. દુતિયે પોક્ખરણીતિ વાપી. ઉબ્બેધેનાતિ ગમ્ભીરતાય. સમતિત્તિકાતિ મુખવટ્ટિસમા. કાકપેય્યાતિ સક્કા હોતિ તીરે ઠિતેન કાકેન પકતિયાપિ મુખતુણ્ડિકં ઓતારેત્વા પાતું. દુતિયં.

૩. સંભેજ્જઉદકસુત્તાદિવણ્ણના

૭૬-૭૭. તતિયે યત્થિમાતિ યસ્મિં સમ્ભિજ્જટ્ઠાને ઇમા. સંસન્દન્તીતિ સમાગન્ત્વા સન્દન્તિ. સમેન્તીતિ સમાગચ્છન્તિ. દ્વે વા તિ વાતિ દ્વે વા તીણિ વા. ઉદકફુસિતાનીતિ ઉદકબિન્દૂનિ. સંભેજ્જઉદકન્તિ અઞ્ઞાહિ નદીહિ સદ્ધિં સમ્ભિન્નટ્ઠાને ઉદકં. ચતુત્થં ઉત્તાનત્થમેવ. તતિયચતુત્થાનિ.

૫. પથવીસુત્તાદિવણ્ણના

૭૮-૮૪. પઞ્ચમે મહાપથવિયાતિ ચક્કવાળબ્ભન્તરાય મહાપથવિયા ઉદ્ધરિત્વા. કોલટ્ઠિમત્તિયોતિ પદરટ્ઠિપમાણા. ગુળિકાતિ મત્તિકગુળિકા. ઉપનિક્ખિપેય્યાતિ એકસ્મિં ઠાને ઠપેય્ય. છટ્ઠાદીસુ વુત્તનયેનેવ અત્થો વેદિતબ્બો. પરિયોસાને પન અઞ્ઞતિત્થિયસમણબ્રાહ્મણપરિબ્બાજકાનં અધિગમોતિ બાહિરકાનં સબ્બોપિ ગુણાધિગમો પઠમમગ્ગેન અધિગતગુણાનં સતભાગમ્પિ સહસ્સભાગમ્પિ સતસહસ્સભાગમ્પિ ન ઉપગચ્છતીતિ. પઞ્ચમાદીનિ.

અભિસમયસંયુત્તવણ્ણના નિટ્ઠિતા.