૩. પેસલસુત્તવણ્ણના

૨૧૧. તતિયે અતિમઞ્ઞતીતિ ‘‘કિં ઇમે મહલ્લકા? ન એતેસં પાળિ, ન અટ્ઠકથા, ન પદબ્યઞ્જનમધુરતા, અમ્હાકં પન પાળિપિ અટ્ઠકથાપિ નયસતેન નયસહસ્સેન ઉપટ્ઠાતી’’તિ અતિક્કમિત્વા મઞ્ઞતિ. ગોતમાતિ ગોતમબુદ્ધસાવકત્તા અત્તાનં આલપતિ. માનપથન્તિ માનારમ્મણઞ્ચેવ માનસહભુનો ચ ધમ્મે. વિપ્પટિસારીહુવાતિ વિપ્પટિસારી અહુવા, અહોસીતિ અત્થો. મગ્ગજિનોતિ મગ્ગેન જિતકિલેસો. કિત્તિઞ્ચ સુખઞ્ચાતિ વણ્ણભણનઞ્ચ કાયિકચેતસિકસુખઞ્ચ. અખિલોધ પધાનવાતિ અખિલો ઇધ પધાનવા વીરિયસમ્પન્નો. વિસુદ્ધોતિ વિસુદ્ધો ભવેય્ય. અસેસન્તિ નિસ્સેસં નવવિધં. વિજ્જાયન્તકરોતિ વિજ્જાય કિલેસાનં અન્તકરો. સમિતાવીતિ રાગાદીનં સમિતતાય સમિતાવી. તતિયં.