૪. મણિભદ્દસુત્તવણ્ણના

૨૩૮. ચતુત્થે સુખમેધતીતિ, સુખં પટિલભતિ. સુવે સેય્યોતિ સુવે સુવે સેય્યો, નિચ્ચમેવ સેય્યોતિ અત્થો. વેરા ન પરિમુચ્ચતીતિ અહં સતિમાતિ એત્તકેન વેરતો ન મુચ્ચતિ. યસ્સાતિ યસ્સ અરહતો. અહિંસાયાતિ કરુણાય ચેવ કરુણાપુબ્બભાગે ચ. મેત્તંસોતિ સો મેત્તઞ્ચેવ મેત્તાપુબ્બભાગઞ્ચ ભાવેતિ. અથ વા અંસોતિ કોટ્ઠાસો વુચ્ચતિ. મેત્તા અંસો એતસ્સાતિ મેત્તંસો. ઇદં વુત્તં હોતિ – યસ્સ અરહતો સબ્બકાલં અહિંસાય રતો મનો, યસ્સ ચ સબ્બભૂતેસુ મેત્તાકોટ્ઠાસો અત્થિ, તસ્સ કેનચિ પુગ્ગલેન સદ્ધિં વેરં નામ નત્થિ યક્ખાતિ. ચતુત્થં.