૨. છન્નોવાદસુત્તવણ્ણના

૩૮૯. એવં મે સુતન્તિ છન્નોવાદસુત્તં. તત્થ છન્નોતિ એવંનામકો થેરો, ન અભિનિક્ખમનં નિક્ખન્તત્થેરો. પટિસલ્લાનાતિ ફલસમાપત્તિતો. ગિલાનપુચ્છકાતિ ગિલાનુપટ્ઠાનં નામ બુદ્ધવણ્ણિતં, તસ્મા એવમાહ. સત્થન્તિ જીવિતહારકસત્થં. નાવકઙ્ખામીતિ ઇચ્છામિ.

૩૯૦. અનુપવજ્જન્તિ અનુપ્પત્તિકં અપ્પટિસન્ધિકં.

૩૯૧. એતં મમાતિઆદીનિ તણ્હામાનદિટ્ઠિગાહવસેન વુત્તાનિ. નિરોધં દિસ્વાતિ ખયવયં ઞત્વા. નેતં મમ નેસોહમસ્મિ ન મેસો અત્તાતિ સમનુપસ્સામીતિ અનિચ્ચં દુક્ખં અનત્તાતિ સમનુપસ્સામિ.

૩૯૩. તસ્માતિ યસ્મા મારણન્તિકવેદનં અધિવાસેતું અસક્કોન્તો સત્થં આહરામીતિ વદતિ, તસ્મા. પુથુજ્જનો આયસ્મા, તેન ઇદમ્પિ મનસિ કરોહીતિ દીપેતિ. નિચ્ચકપ્પન્તિ નિચ્ચકાલં. નિસ્સિતસ્સાતિ તણ્હાદિટ્ઠીહિ નિસ્સિતસ્સ. ચલિતન્તિ વિપ્ફન્દિતં હોતિ. પસ્સદ્ધીતિ કાયચિત્તપસ્સદ્ધિ, કિલેસપસ્સદ્ધિ નામ હોતીતિ અત્થો. નતીતિ તણ્હાનતિ. નતિયા અસતીતિ ભવત્થાય આલયનિકન્તિપરિયુટ્ઠાનેસુ અસતિ. આગતિગતિ ન હોતીતિ પટિસન્ધિવસેન આગતિ નામ ન હોતિ, ચુતિવસેન ગમનં નામ ન હોતિ. ચુતૂપપાતોતિ ચવનવસેન ચુતિ, ઉપપજ્જનવસેન ઉપપાતો. નેવિધ ન હુરં ન ઉભયમન્તરેનાતિ નયિધ લોકે, ન પરલોકે, ન ઉભયત્થ હોતિ. એસેવન્તો દુક્ખસ્સાતિ વટ્ટદુક્ખકિલેસદુક્ખસ્સ અયમેવ અન્તો અયં પરિચ્છેદો પરિવટુમભાવો હોતિ. અયમેવ હિ એત્થ અત્થો. યે પન ‘‘ન ઉભયમન્તરેના’’તિ વચનં ગહેત્વા અન્તરાભવં ઇચ્છન્તિ, તેસં ઉત્તરં હેટ્ઠા વુત્તમેવ.

૩૯૪. સત્થં આહરેસીતિ જીવિતહારકં સત્થં આહરિ, કણ્ઠનાળિં છિન્દિ. અથસ્સ તસ્મિં ખણે મરણભયં ઓક્કમિ, ગતિનિમિત્તં ઉપટ્ઠાસિ. સો અત્તનો પુથુજ્જનભાવં ઞત્વા સંવિગ્ગો વિપસ્સનં પટ્ઠપેત્વા સઙ્ખારે પરિગ્ગણ્હન્તો અરહત્તં પત્વા સમસીસી હુત્વા પરિનિબ્બાયિ. સમ્મુખાયેવ અનુપવજ્જતા બ્યાકતાતિ કિઞ્ચાપિ ઇદં થેરસ્સ પુથુજ્જનકાલે બ્યાકરણં હોતિ, એતેન પન બ્યાકરણેન અનન્તરાયમસ્સ પરિનિબ્બાનં અહોસિ. તસ્મા ભગવા તમેવ બ્યાકરણં ગહેત્વા કથેસિ. ઉપવજ્જકુલાનીતિ ઉપસઙ્કમિતબ્બકુલાનિ. ઇમિના થેરો, – ‘‘ભન્તે, એવં ઉપટ્ઠાકેસુ ચ ઉપટ્ઠાયિકાસુ ચ વિજ્જમાનાસુ સો ભિક્ખુ તુમ્હાકં સાસને પરિનિબ્બાયિસ્સતી’’તિ પુચ્છતિ. અથસ્સ ભગવા કુલેસુ સંસગ્ગાભાવં દીપેન્તો હોન્તિ હેતે સારિપુત્તાતિઆદિમાહ. ઇમસ્મિં કિર ઠાને થેરસ્સ કુલેસુ અસંસટ્ઠભાવો પાકટો અહોસિ. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

છન્નોવાદસુત્તવણ્ણના નિટ્ઠિતા.