૭. ગણકમોગ્ગલ્લાનસુત્તવણ્ણના

૭૪. એવં મે સુતન્તિ ગણકમોગ્ગલ્લાનસુત્તં. તત્થ યાવ પચ્છિમસોપાનકળેવરાતિ યાવ પઠમસોપાનફલકા એકદિવસેનેવ સત્તભૂમિકો પાસાદો ન સક્કા કાતું, વત્થું સોધેત્વા થમ્ભુસ્સાપનતો પટ્ઠાય પન યાવ ચિત્તકમ્મકરણા અનુપુબ્બકિરિયા ચેત્થ પઞ્ઞાયતીતિ દસ્સેતિ. યદિદં અજ્ઝેનેતિ તયોપિ વેદા ન સક્કા એકદિવસેનેવ અધીયિતું, એતેસં અજ્ઝેનેપિ પન અનુપુબ્બકિરિયાવ પઞ્ઞાયતીતિ દસ્સેતિ. ઇસ્સત્થેતિ આવુધવિજ્જાયપિ એકદિવસેનેવ વાલવેધિ નામ ન સક્કા કાતું, ઠાનસમ્પાદનમુટ્ઠિકરણાદીહિ પન એત્થાપિ અનુપુબ્બકિરિયા પઞ્ઞાયતીતિ દસ્સેતિ. સઙ્ખાનેતિ ગણનાય. તત્થ અનુપુબ્બકિરિયં અત્તનાવ દસ્સેન્તો એવં ગણાપેમાતિઆદિમાહ.

૭૫. સેય્યથાપિ બ્રાહ્મણાતિ ઇધ ભગવા યસ્મા બાહિરસમયે યથા યથા સિપ્પં ઉગ્ગણ્હન્તિ, તથા તથા કેરાટિકા હોન્તિ, તસ્મા અત્તનો સાસનં બાહિરસમયેન અનુપમેત્વા ભદ્રઅસ્સાજાનીયેન ઉપમેન્તો સેય્યથાપીતિઆદિમાહ. ભદ્રો હિ અસ્સાજાનીયો યસ્મિં કારણે દમિતો હોતિ, તં જીવિતહેતુપિ નાતિક્કમતિ. એવમેવ સાસને સમ્માપટિપન્નો કુલપુત્તો સીલવેલં નાતિક્કમતિ. મુખાધાનેતિ મુખટ્ઠપને.

૭૬. સતિસમ્પજઞ્ઞાય ચાતિ સતિસમ્પજઞ્ઞાહિ સમઙ્ગિભાવત્થાય. દ્વે હિ ખીણાસવા સતતવિહારી ચ નોસતતવિહારી ચ. તત્થ સતતવિહારી યંકિઞ્ચિ કમ્મં કત્વાપિ ફલસમાપત્તિં સમાપજ્જિતું સક્કોતિ, નો સતતવિહારી પન અપ્પમત્તકેપિ કિચ્ચે કિચ્ચપ્પસુતો હુત્વા ફલસમાપત્તિં અપ્પેતું ન સક્કોતિ.

તત્રિદં વત્થુ – એકો કિર ખીણાસવત્થેરો ખીણાસવસામણેરં ગહેત્વા અરઞ્ઞવાસં ગતો, તત્થ મહાથેરસ્સ સેનાસનં પત્તં, સામણેરસ્સ ન પાપુણાતિ, તં વિતક્કેન્તો થેરો એકદિવસમ્પિ ફલસમાપત્તિં અપ્પેતું નાસક્ખિ. સામણેરો પન તેમાસં ફલસમાપત્તિરતિયા વીતિનામેત્વા ‘‘સપ્પાયો, ભન્તે, અરઞ્ઞવાસો જાતો’’તિ થેરં પુચ્છિ. થેરો ‘‘ન જાતો, આવુસો’’તિ આહ. ઇતિ યો એવરૂપો ખીણાસવો, સો ઇમે ધમ્મે આદિતો પટ્ઠાય આવજ્જિત્વાવ સમાપજ્જિતું સક્ખિસ્સતીતિ દસ્સેન્તો ‘‘સતિસમ્પજઞ્ઞાય ચા’’તિ આહ.

૭૮. યેમે, ભો ગોતમાતિ તથાગતે કિર કથયન્તેવ બ્રાહ્મણસ્સ ‘‘ઇમે પુગ્ગલા ન આરાધેન્તિ, ઇમે આરાધેન્તી’’તિ નયો ઉદપાદિ, તં દસ્સેન્તો એવં વત્તુમારદ્ધો.

પરમજ્જધમ્મેસૂતિ અજ્જધમ્મા નામ છસત્થારધમ્મા, તેસુ ગોતમવાદોવ, પરમો ઉત્તમોતિ અત્થો. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

ગણકમોગ્ગલ્લાનસુત્તવણ્ણના નિટ્ઠિતા.