૮. બાહિતિકસુત્તવણ્ણના

૩૫૮. એવં મે સુતન્તિ બાહિતિકસુત્તં. તત્થ એકપુણ્ડરીકં નાગન્તિ એવંનામકં હત્થિં. તસ્સ કિર ફાસુકાનં ઉપરિ તાલફલમત્તં પણ્ડરટ્ઠાનં અત્થિ, તેનસ્સ એકપુણ્ડરીકોતિ નામં અકંસુ. સિરિવડ્ઢં મહામત્તન્તિ પચ્ચેકહત્થિં અભિરુહિત્વા કથાફાસુકત્થં સદ્ધિં ગચ્છન્તં એવંનામકં મહામત્તં. આયસ્માનોતિ એત્થ નોતિ પુચ્છાય નિપાતો. મહામત્તો થેરસ્સ સઙ્ઘાટિપત્તધારણાકારં સલ્લક્ખેત્વા ‘‘એવં, મહારાજા’’તિ આહ.

૩૫૯. ઓપારમ્ભોતિ ઉપારમ્ભં દોસં આરોપનારહો. કિં પુચ્છામીતિ રાજા પુચ્છતિ. સુન્દરિવત્થુસ્મિં ઉપ્પન્નમિદં સુત્તં, તં પુચ્છામીતિ પુચ્છતિ. યઞ્હિ મયં, ભન્તેતિ, ભન્તે, યં મયં વિઞ્ઞૂહીતિ ઇદં પદં ગહેત્વા પઞ્હેન પરિપૂરેતું નાસક્ખિમ્હા, તં કારણં આયસ્મતા એવં વદન્તેન પરિપૂરિતં.

૩૬૦. અકુસલોતિ અકોસલ્લસમ્ભૂતો. સાવજ્જોતિ સદોસો. સબ્યાબજ્ઝોતિ સદુક્ખો. દુક્ખવિપાકોતિ ઇધ નિસ્સન્દવિપાકો કથિતો. તસ્સાતિ તસ્સ એવં અત્તબ્યાબાધાદીનં અત્થાય પવત્તકાયસમાચારસ્સ.

સબ્બાકુસલધમ્મપહીનો ખો, મહારાજ, તથાગતો કુસલધમ્મસમન્નાગતોતિ એત્થ સબ્બેસંયેવ અકુસલાનં ધમ્માનં પહાનં વણ્ણેતીતિ. આમ વણ્ણેતીતિ વુત્તે યથા પુચ્છા, તથા અત્થો વુત્તો ભવેય્ય. એવં બ્યાકરણં પન ન ભારિયં. અપ્પહીનઅકુસલોપિ હિ પહાનં વણ્ણેય્ય, ભગવા પન પહીનાકુસલતાય યથાકારી તથાવાદીતિ દસ્સેતું એવં બ્યાકાસિ. સુક્કપક્ખેપિ એસેવ નયો.

૩૬૨. બાહિતિકાતિ બાહિતિરટ્ઠે ઉટ્ઠિતવત્થસ્સેતં નામં. સોળસસમા આયામેનાતિ આયામેન સમસોળસહત્થા. અટ્ઠસમા વિત્થારેનાતિ વિત્થારેન સમઅટ્ઠહત્થા.

૩૬૩. ભગવતો પાદાસીતિ ભગવતો નિય્યાતેસિ. દત્વા ચ પન ગન્ધકુટિયં વિતાનં કત્વા બન્ધિ. તતો પટ્ઠાય ગન્ધકુટિ ભિય્યોસોમત્તાય સોભિ. સેસં સબ્બત્થ ઉત્તાનમેવ. નેય્યપુગ્ગલસ્સ પન વસેન અયં દેસના નિટ્ઠિતાતિ.

પપઞ્ચસૂદનિયા મજ્ઝિમનિકાયટ્ઠકથાય

બાહિતિકસુત્તવણ્ણના નિટ્ઠિતા.