૧૦. વેખનસસુત્તવણ્ણના

૨૭૮. એવં મે સુતન્તિ વેખનસસુત્તં. તત્થ વેખનસોતિ અયં કિર સકુલુદાયિસ્સ આચરિયો, સો ‘‘સકુલુદાયી પરિબ્બાજકો પરમવણ્ણપઞ્હે પરાજિતો’’તિ સુત્વા ‘‘મયા સો સાધુકં ઉગ્ગહાપિતો, તેનાપિ સાધુકં ઉગ્ગહિતં, કથં નુ ખો પરાજિતો, હન્દાહં સયં ગન્ત્વા સમણં ગોતમં પરમવણ્ણપઞ્હં પુચ્છિત્વા જાનિસ્સામી’’તિ રાજગહતો પઞ્ચચત્તાલીસયોજનં સાવત્થિં ગન્ત્વા યેન ભગવા, તેનુપસઙ્કમિ, ઉપસઙ્કમિત્વા પન ઠિતકોવ ભગવતો સન્તિકે ઉદાનં ઉદાનેસિ. તત્થ પુરિમસદિસં વુત્તનયેનેવ વેદિતબ્બં.

૨૮૦. પઞ્ચ ખો ઇમેતિ કસ્મા આરભિ? અગારિયોપિ એકચ્ચો કામગરુકો કામાધિમુત્તો હોતિ, એકચ્ચો નેક્ખમ્મગરુકો નેક્ખમ્માધિમુત્તો હોતિ. પબ્બજિતોપિ ચ એકચ્ચો કામગરુકો કામાધિમુત્તો હોતિ, એકચ્ચો નેક્ખમ્મગરુકો નેક્ખમ્માધિમુત્તો હોતિ. અયં પન કામગરુકો કામાધિમુત્તો હોતિ. સો ઇમાય કથાય કથિયમાનાય અત્તનો કામાધિમુત્તત્તં સલ્લક્ખેસ્સતિ, એવમસ્સાયં દેસના સપ્પાયા ભવિસ્સતીતિ ઇમં દેસનં આરભિ. કામગ્ગસુખન્તિ નિબ્બાનં અધિપ્પેતં.

૨૮૧. પાપિતો ભવિસ્સતીતિ અજાનનભાવં પાપિતો ભવિસ્સતિ. નામકંયેવ સમ્પજ્જતીતિ નિરત્થકવચનમત્તમેવ સમ્પજ્જતિ. તિટ્ઠતુ પુબ્બન્તો તિટ્ઠતુ અપરન્તોતિ યસ્મા તુય્હં અતીતકથાય અનુચ્છવિકં પુબ્બેનિવાસઞાણં નત્થિ, અનાગતકથાય અનુચ્છવિકં દિબ્બચક્ખુઞાણં નત્થિ, તસ્મા ઉભયમ્પેતં તિટ્ઠતૂતિ આહ. સુત્તબન્ધનેહીતિ સુત્તમયબન્ધનેહિ. તસ્સ હિ આરક્ખત્થાય હત્થપાદેસુ ચેવ ગીવાય ચ સુત્તકાનિ બન્ધન્તિ. તાનિ સન્ધાયેતં વુત્તં. મહલ્લકકાલે પનસ્સ તાનિ સયં વા પૂતીનિ હુત્વા મુઞ્ચન્તિ, છિન્દિત્વા વા હરન્તિ.

એવમેવ ખોતિ ઇમિના ઇદં દસ્સેતિ – દહરસ્સ કુમારસ્સ સુત્તબન્ધનાનં અજાનનકાલો વિય અવિજ્જાય પુરિમાય કોટિયા અજાનનં, ન હિ સક્કા અવિજ્જાય પુરિમકોટિ ઞાતું, મોચનકાલે જાનનસદિસં પન અરહત્તમગ્ગેન અવિજ્જાબન્ધનસ્સ પમોક્ખો જાતોતિ જાનનં. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

વેખનસસુત્તવણ્ણના નિટ્ઠિતા.

તતિયવગ્ગવણ્ણના નિટ્ઠિતા.