૯. ગોલિયાનિસુત્તવણ્ણના

૧૭૩. એવં મે સુતન્તિ ગોલિયાનિસુત્તં. તત્થ પદસમાચારોતિ દુબ્બલસમાચારો ઓળારિકાચારો, પચ્ચયેસુ સાપેક્ખો મહારક્ખિતત્થેરો વિય. તં કિર ઉપટ્ઠાકકુલે નિસિન્નં ઉપટ્ઠાકો આહ ‘‘અસુકત્થેરસ્સ મે, ભન્તે, ચીવરં દિન્ન’’ન્તિ. સાધુ તે કતં તંયેવ તક્કેત્વા વિહરન્તસ્સ ચીવરં દેન્તેનાતિ. તુમ્હાકમ્પિ, ભન્તે, દસ્સામીતિ. સાધુ કરિસ્સસિ તંયેવ તક્કેન્તસ્સાતિ આહ. અયમ્પિ એવરૂપો ઓળારિકાચારો અહોસિ. સપ્પતિસ્સેનાતિ સજેટ્ઠકેન, ન અત્તાનં જેટ્ઠકં કત્વા વિહરિતબ્બં. સેરિવિહારેનાતિ સચ્છન્દવિહારેન નિરઙ્કુસવિહારેન.

નાનૂપખજ્જાતિ ન અનુપખજ્જ ન અનુપવિસિત્વા. તત્થ યો દ્વીસુ મહાથેરેસુ ઉભતો નિસિન્નેસુ તે અનાપુચ્છિત્વાવ ચીવરેન વા જાણુના વા ઘટ્ટેન્તો નિસીદતિ, અયં અનુપખજ્જ નિસીદતિ નામ. એવં અકત્વા પન અત્તનો પત્તઆસનસન્તિકે ઠત્વા નિસીદાવુસોતિ વુત્તે નિસીદિતબ્બં. સચે ન વદન્તિ, નિસીદામિ, ભન્તેતિ આપુચ્છિત્વા નિસીદિતબ્બં આપુચ્છિતકાલતો પટ્ઠાય નિસીદાતિ વુત્તેપિ અવુત્તેપિ નિસીદિતું વટ્ટતિયેવ. ન પટિબાહિસ્સામીતિ એત્થ યો અત્તનો પત્તાસનં અતિક્કમિત્વા નવકાનં પાપુણનટ્ઠાને નિસીદતિ, અયં નવે ભિક્ખૂ આસનેન પટિબાહતિ નામ. તસ્મિઞ્હિ તથા નિસિન્ને નવા ભિક્ખૂ ‘‘અમ્હાકં નિસીદિતું ન દેતી’’તિ ઉજ્ઝાયન્તા તિટ્ઠન્તિ વા આસનં વા પરિયેસન્તા આહિણ્ડન્તિ. તસ્મા અત્તનો પત્તાસનેયેવ નિસીદિતબ્બં. એવં ન પટિબાહતિ નામ.

આભિસમાચારિકમ્પિ ધમ્મન્તિ અભિસમાચારિકં વત્તપટિપત્તિમત્તમ્પિ. નાતિકાલેનાતિ ન અતિપાતો પવિસિતબ્બં, ન અતિદિવા પટિક્કમિતબ્બં, ભિક્ખુસઙ્ઘેન સદ્ધિંયેવ પવિસિતબ્બઞ્ચ નિક્ખમિતબ્બઞ્ચ. અતિપાતો પવિસિત્વા અતિદિવા નિક્ખમન્તસ્સ હિ ચેતિયઙ્ગણબોધિયઙ્ગણવત્તાદીનિ પરિહાયન્તિ. કાલસ્સેવ મુખં ધોવિત્વા મક્કટકસુત્તાનિ છિન્દન્તેન ઉસ્સાવબિન્દૂ નિપાતેન્તેન ગામં પવિસિત્વા યાગું પરિયેસિત્વા યાવ ભિક્ખાકાલા અન્તોગામેયેવ નાનપ્પકારં તિરચ્છાનકથં કથેન્તેન નિસીદિત્વા ભત્તકિચ્ચં કત્વા દિવા નિક્ખમ્મ ભિક્ખૂનં પાદધોવનવેલાય વિહારં પચ્ચાગન્તબ્બં હોતિ. ન પુરેભત્તં પચ્છાભત્તં કુલેસુ ચારિત્તં આપજ્જિતબ્બન્તિ ‘‘યો પન ભિક્ખુ નિમન્તિતો સભત્તો સમાનો સન્તં ભિક્ખું અનાપુચ્છા પુરેભત્તં વા પચ્છાભત્તં વા કુલેસુ ચારિત્તં આપજ્જેય્ય, અઞ્ઞત્ર સમયા પાચિત્તિય’’ન્તિ (પાચિ. ૨૯૯) ઇમં સિક્ખાપદં રક્ખન્તેન તસ્સ વિભઙ્ગે વુત્તં પુરેભત્તઞ્ચ પચ્છાભત્તઞ્ચ ચારિત્તં ન આપજ્જિતબ્બં. ઉદ્ધતો હોતિ ચપલોતિ ઉદ્ધચ્ચપકતિકો ચેવ હોતિ ચીવરમણ્ડન-પત્તમણ્ડન-સેનાસનમણ્ડના ઇમસ્સ વા પૂતિકાયસ્સ કેલાયના મણ્ડનાતિ એવં વુત્તેન ચ તરુણદારકાવચાપલ્યેન સમન્નાગતો.

પઞ્ઞવતા ભવિતબ્બન્તિ ચીવરકમ્માદીસુ ઇતિકત્તબ્બેસુ ઉપાયપઞ્ઞાય સમન્નાગતેન ભવિતબ્બં. અભિધમ્મે અભિવિનયેતિ અભિધમ્મપિટકે ચેવ વિનયપિટકે ચ પાળિવસેન ચેવ અટ્ઠકથાવસેન ચ યોગો કરણીયો. સબ્બન્તિમેન હિ પરિચ્છેદેન અભિધમ્મે દુકતિકમાતિકાહિ સદ્ધિં ધમ્મહદયવિભઙ્ગં વિના ન વટ્ટતિ. વિનયે પન કમ્માકમ્મવિનિચ્છયેન સદ્ધિં સુવિનિચ્છિતાનિ દ્વે પાતિમોક્ખાનિ વિના ન વટ્ટતિ.

આરુપ્પાતિ એત્તાવતા અટ્ઠપિ સમાપત્તિયો વુત્તા હોન્તિ. તા પન સબ્બેન સબ્બં અસક્કોન્તેન સત્તસુપિ યોગો કરણીયો, છસુપિ…પે… પઞ્ચસુપિ. સબ્બન્તિમેન પરિચ્છેદેન એકં કસિણે પરિકમ્મકમ્મટ્ઠાનં પગુણં કત્વા આદાય વિચરિતબ્બં, એત્તકં વિના ન વટ્ટતિ. ઉત્તરિમનુસ્સધમ્મેતિ ઇમિના સબ્બેપિ લોકુત્તરધમ્મે દસ્સેતિ. તસ્મા અરહન્તેન હુત્વા વિહાતબ્બં, અરહત્તં અનભિસમ્ભુણન્તેન અનાગામિફલે સકદાગામિફલે સોતાપત્તિફલે વા પતિટ્ઠાતબ્બં. સબ્બન્તિમેન પરિયાયેન એકં વિપસ્સનામુખં યાવ અરહત્તા પગુણં કત્વા આદાય વિચરિતબ્બં. સેસં સબ્બત્થ ઉત્તાનમેવ. ઇમં પન દેસનં આયસ્મા સારિપુત્તો નેય્યપુગ્ગલસ્સ વસેન આભિસમાચારિકવત્તતો પટ્ઠાય અનુપુબ્બેન અરહત્તં પાપેત્વા નિટ્ઠાપેસીતિ.

પપઞ્ચસૂદનિયા મજ્ઝિમનિકાયટ્ઠકથાય

ગોલિયાનિસુત્તવણ્ણના નિટ્ઠિતા.