૧૦. ચૂળઅસ્સપુરસુત્તવણ્ણના

૪૩૫. એવં મે સુતન્તિ ચૂળઅસ્સપુરસુત્તં. તસ્સ દેસનાકારણં પુરિમસદિસમેવ. સમણસામીચિપ્પટિપદાતિ સમણાનં અનુચ્છવિકા સમણાનં અનુલોમપ્પટિપદા.

૪૩૬. સમણમલાનન્તિઆદીસુ એતે ધમ્મા ઉપ્પજ્જમાના સમણે મલિને કરોન્તિ મલગ્ગહિતે, તસ્મા ‘‘સમણમલા’’તિ વુચ્ચન્તિ. એતેહિ સમણા દુસ્સન્તિ, પદુસ્સન્તિ, તસ્મા સમણદોસાતિ વુચ્ચન્તિ. એતે ઉપ્પજ્જિત્વા સમણે કસટે નિરોજે કરોન્તિ મિલાપેન્તિ, તસ્મા સમણકસટાતિ વુચ્ચન્તિ. આપાયિકાનં ઠાનાનન્તિ અપાયે નિબ્બત્તાપકાનં કારણાનં. દુગ્ગતિવેદનિયાનન્તિ દુગ્ગતિયં વિપાકવેદનાય પચ્ચયાનં. મતજં નામાતિ મનુસ્સા તિખિણં અયં અયેન સુઘંસિત્વા તં અયચુણ્ણં મંસેન સદ્ધિં મદ્દિત્વા કોઞ્ચસકુણે ખાદાપેન્તિ. તે ઉચ્ચારં કાતું અસક્કોન્તા મરન્તિ. નો ચે મરન્તિ, પહરિત્વા મારેન્તિ. અથ તેસં કુચ્છિં ફાલેત્વા નં ઉદકેન ધોવિત્વા ચુણ્ણં ગહેત્વા મંસેન સદ્ધિં મદ્દિત્વા પુન ખાદાપેન્તીતિ એવં સત્ત વારે ખાદાપેત્વા ગહિતેન અયચુણ્ણેન આવુધં કરોન્તિ. સુસિક્ખિતા ચ નં અયકારા બહુહત્થકમ્મમૂલં લભિત્વા કરોન્તિ. તં મતસકુણતો જાતત્તા ‘‘મતજ’’ન્તિ વુચ્ચતિ, અતિતિખિણં હોતિ. પીતનિસિતન્તિ ઉદકપીતઞ્ચેવ સિલાય ચ સુનિઘંસિતં. સઙ્ઘાટિયાતિ કોસિયા. સમ્પારુતન્તિ પરિયોનદ્ધં. સમ્પલિવેઠિતન્તિ સમન્તતો વેઠિતં.

૪૩૭. રજોજલ્લિકસ્સાતિ રજોજલ્લધારિનો. ઉદકોરોહકસ્સાતિ દિવસસ્સ તિક્ખત્તું ઉદકં ઓરોહન્તસ્સ. રુક્ખમૂલિકસ્સાતિ રુક્ખમૂલવાસિનો. અબ્ભોકાસિકસ્સાતિ અબ્ભોકાસવાસિનો. ઉબ્ભટ્ઠકસ્સાતિ ઉદ્ધં ઠિતકસ્સ. પરિયાયભત્તિકસ્સાતિ માસવારેન વા અડ્ઢમાસવારેન વા ભુઞ્જન્તસ્સ. સબ્બમેતં બાહિરસમયેનેવ કથિતં. ઇમસ્મિઞ્હિ સાસને ચીવરધરો ભિક્ખુ સઙ્ઘાટિકોતિ ન વુચ્ચતિ. રજોજલ્લધારણાદિવતાનિ ઇમસ્મિં સાસને નત્થિયેવ. બુદ્ધવચનસ્સ બુદ્ધવચનમેવ નામં, ન મન્તાતિ. રુક્ખમૂલિકો, અબ્ભોકાસિકોતિ એત્તકંયેવ પન લબ્ભતિ. તમ્પિ બાહિરસમયેનેવ કથિતં. જાતમેવ નન્તિ તંદિવસે જાતમત્તંયેવ નં. સઙ્ઘાટિકં કરેય્યુન્તિ સઙ્ઘાટિકં વત્થં નિવાસેત્વા ચ પારુપિત્વા ચ સઙ્ઘાટિકં કરેય્યું. એસ નયો સબ્બત્થ.

૪૩૮. વિસુદ્ધમત્તાનં સમનુપસ્સતીતિ અત્તાનં વિસુજ્ઝન્તં પસ્સતિ. વિસુદ્ધોતિ પન ન તાવ વત્તબ્બો. પામોજ્જં જાયતીતિ તુટ્ઠાકારો જાયતિ. પમુદિતસ્સ પીતીતિ તુટ્ઠસ્સ સકલસરીરં ખોભયમાના પીતિ જાયતિ. પીતિમનસ્સ કાયોતિ પીતિસમ્પયુત્તસ્સ પુગ્ગલસ્સ નામકાયો. પસ્સમ્ભતીતિ વિગતદરથો હોતિ. સુખં વેદેતીતિ કાયિકમ્પિ ચેતસિકમ્પિ સુખં વેદિયતિ. ચિત્તં સમાધિયતીતિ ઇમિના નેક્ખમ્મસુખેન સુખિતસ્સ ચિત્તં સમાધિયતિ, અપ્પનાપત્તં વિય હોતિ. સો મેત્તાસહગતેન ચેતસાતિ હેટ્ઠા કિલેસવસેન આરદ્ધા દેસના પબ્બતે વુટ્ઠવુટ્ઠિ વિય નદિં યથાનુસન્ધિના બ્રહ્મવિહારભાવનં ઓતિણ્ણા. તત્થ યં વત્તબ્બં સિયા, તં સબ્બં વિસુદ્ધિમગ્ગે વુત્તમેવ. સેય્યથાપિ, ભિક્ખવે, પોક્ખરણીતિ મહાસીહનાદસુત્તે મગ્ગો પોક્ખરણિયા ઉપમિતો, ઇધ સાસનં ઉપમિતન્તિ વેદિતબ્બં. આસવાનં ખયા સમણો હોતીતિ સબ્બકિલેસાનં સમિતત્તા પરમત્થસમણો હોતીતિ. સેસં સબ્બત્થ ઉત્તાનમેવાતિ.

પપઞ્ચસૂદનિયા મજ્ઝિમનિકાયટ્ઠકથાય

ચૂળઅસ્સપુરસુત્તવણ્ણના નિટ્ઠિતા.

ચતુત્થવગ્ગવણ્ણના નિટ્ઠિતા.