૧૧. દુતિયનાગવિમાનવણ્ણના

મહન્તં નાગં અભિરુય્હાતિ દુતિયનાગવિમાનં. તસ્સ કા ઉપ્પત્તિ? ભગવા રાજગહે વિહરતિ વેળુવને. તેન સમયેન રાજગહે અઞ્ઞતરો ઉપાસકો સદ્ધો પસન્નો પઞ્ચસુ સીલેસુ પતિટ્ઠિતો ઉપોસથદિવસેસુ ઉપોસથસીલં સમાદિયિત્વા પુરેભત્તં અત્તનો વિભવાનુરૂપં ભિક્ખૂનં દાનાનિ દત્વા સયં ભુઞ્જિત્વા સુદ્ધવત્થનિવત્થો સુદ્ધુત્તરાસઙ્ગો પચ્છાભત્તં યેભુય્યેન અટ્ઠ પાનાનિ ગાહાપેત્વા વિહારં ગન્ત્વા ભિક્ખુસઙ્ઘસ્સ નિય્યાદેત્વા ભગવન્તં ઉપસઙ્કમિત્વા ધમ્મં સુણાતિ. એવં સો સક્કચ્ચં દાનમયં સીલમયઞ્ચ બહું સુચરિતં ઉપચિનિત્વા ઇતો ચુતો તાવતિંસેસુ ઉપ્પજ્જિ. તસ્સ પુઞ્ઞાનુભાવેન સબ્બસેતો મહન્તો દિબ્બો હત્થિનાગો પાતુરહોસિ. સો તં અભિરુય્હ મહન્તેન પરિવારેન મહન્તેન દિબ્બાનુભાવેન કાલેન કાલં ઉય્યાનકીળં ગચ્છતિ.

અથેકદિવસં કતઞ્ઞુતાય ચોદિયમાનો અડ્ઢરત્તિસમયે તં દિબ્બનાગં અભિરુય્હ મહતા પરિવારેન ‘‘ભગવન્તં વન્દિસ્સામી’’તિ દેવલોકતો આગન્ત્વા કેવલકપ્પં વેળુવનં ઓભાસેત્વા હત્થિક્ખન્ધતો ઓરુય્હ ભગવન્તં ઉપસઙ્કમિત્વા અભિવાદેત્વા અઞ્જલિં પગ્ગય્હ એકમન્તં અટ્ઠાસિ. તં ભગવતો સમીપે ઠિતો આયસ્મા વઙ્ગીસો ભગવતો અનુઞ્ઞાય ઇમાહિ ગાથાહિ પુચ્છિ –

૯૬૮. ‘‘મહન્તં નાગં અભિરુય્હ, સબ્બસેતં ગજુત્તમં;

વના વનં અનુપરિયાસિ, નારીગણપુરક્ખતો;

ઓભાસેન્તો દિસા સબ્બા, ઓસધી વિય તારકા.

૯૬૯. ‘‘કેન તેતાદિસો વણ્ણો…પે…

વણ્ણો ચ તે સબ્બદિસા પભાસતી’’તિ.

તત્થા પુચ્છિતો સોપિ તસ્સ ગાથાહિ એવ બ્યાકાસિ.

૯૭૧. ‘‘સો દેવપુત્તો અત્તમનો, વઙ્ગીસેનેવ પુચ્છિતો;

પઞ્હં પુટ્ઠો વિયાકાસિ, યસ્સ કમ્મસ્સિદં ફલં’’.

૯૭૨. ‘‘અહં મનુસ્સેસુ મનુસ્સભૂતો, ઉપાસકો ચક્ખુમતો અહોસિં;

પાણાતિપાતા વિરતો અહોસિં, લોકે અદિન્નં પરિવજ્જયિસ્સં.

૯૭૩. ‘‘અમજ્જપો નો ચ મુસા અભાણિં, સકેન દારેન ચ તુટ્ઠો અહોસિં;

અન્નઞ્ચ પાનઞ્ચ પસન્નચિત્તો, સક્કચ્ચ દાનં વિપુલં અદાસિં.

૯૭૪. ‘‘તેન મેતાદિસો વણ્ણો…પે…

વણ્ણો ચ મે સબ્બદિસા પભાસતી’’તિ.

તત્થ અપુબ્બં નત્થિ, સેસં હેટ્ઠા વુત્તનયમેવ.

દુતિયનાગવિમાનવણ્ણના નિટ્ઠિતા.