૧૦. પઠમભિક્ખાદાયિકાવિમાનવણ્ણના

અભિક્કન્તેન વણ્ણેનાતિ ભિક્ખાદાયિકાવિમાનં. તસ્સ કા ઉપ્પત્તિ? ભગવા સાવત્થિયં વિહરતિ જેતવને. તેન ચ સમયેન ઉત્તરમધુરાયં અઞ્ઞતરા ઇત્થી ખીણાયુકા હોતિ અપાયે ઉપ્પજ્જનારહા. ભગવા પચ્ચૂસવેલાયં મહાકરુણાસમાપત્તિતો વુટ્ઠાય લોકં વોલોકેન્તો તં ઇત્થિં અપાયે ઉપ્પજ્જનારહં દિસ્વા મહાકરુણાય સઞ્ચોદિતમાનસો તં સુગતિયં પતિટ્ઠાપેતુકામો એકો અદુતિયો મધુરં અગમાસિ. ગન્ત્વા પુબ્બણ્હસમયં નિવાસેત્વા પત્તચીવરં આદાય બહિનગરં પિણ્ડાય પાવિસિ. તેન સમયેન સા ઇત્થી ગેહે આહારં સમ્પાદેત્વા એકમન્તે પટિસામેત્વા ઘટં ગહેત્વા ઉદકતિત્થં ગન્ત્વા ન્હાયિત્વા ઘટેન ઉદકં ગહેત્વા અત્તનો ગેહં ગચ્છન્તી અન્તરામગ્ગે ભગવન્તં પસ્સિત્વા ‘‘અપિ, ભન્તે, પિણ્ડો લદ્ધો’’તિ વત્વા ‘‘લભિસ્સામી’’તિ ચ ભગવતા વુત્તે અલદ્ધભાવં ઞત્વા ઘટં ઠપેત્વા ભગવન્તં ઉપસઙ્કમિત્વા વન્દિત્વા ‘‘અહં, ભન્તે, પિણ્ડપાતં દસ્સામિ, અધિવાસેથા’’તિ આહ. અધિવાસેસિ ભગવા તુણ્હીભાવેન. સા ભગવતો અધિવાસનં વિદિત્વા પઠમતરં ગન્ત્વા સિત્તસમ્મટ્ઠે પદેસે આસનં પઞ્ઞાપેત્વા ભગવતો પવેસનં ઉદિક્ખમાના અટ્ઠાસિ. ભગવા ગેહં પવિસિત્વા પઞ્ઞત્તે આસને નિસીદિ. અથ સા ભગવન્તં ભોજેસિ. ભગવા કતભત્તકિચ્ચો ઓનીતપત્તપાણી તસ્સા અનુમોદનં કત્વા પક્કામિ. સા અનુમોદનં સુત્વા અનપ્પકં પીતિસોમનસ્સં પટિસંવેદેન્તી યાવ ચક્ખુપથસમતિક્કમા બુદ્ધારમ્મણં પીતિં અવિજહન્તી નમસ્સમાના અટ્ઠાસિ. સા કતિપયદિવસાતિક્કમેનેવ કાલં કત્વા તાવતિંસભવને નિબ્બત્તિ, અચ્છરાસહસ્સઞ્ચસ્સા પરિવારો અહોસિ. તં આયસ્મા મહામોગ્ગલ્લાનો –

૨૭૦. ‘‘અભિક્કન્તેન વણ્ણેન…પે… ઓસધી વિય તારકા.

૨૭૧. ‘‘કેન તેતાદિસો વણ્ણો…પે…

વણ્ણો ચ તે સબ્બદિસા પભાસતી’’તિ. – ગાથાહિ પુચ્છિ;

૨૭૩. ‘‘સા દેવતા અત્તમના…પે… યસ્સ કમ્મસ્સિદં ફલં’’.

૨૭૪. ‘‘અહં મનુસ્સેસુ મનુસ્સભૂતા,

પુરિમાય જાતિયા મનુસ્સલોકે.

૨૭૫. ‘‘અદ્દસં વિરજં બુદ્ધં, વિપ્પસન્નમનાવિલં;

તસ્સ અદાસહં ભિક્ખં, પસન્ના સેહિ પાણિભિ.

૨૭૬. ‘‘તેન મેતાદિસો વણ્ણો…પે…

વણ્ણો ચ મે સબ્બદિસા પભાસતી’’તિ. –

દેવતા બ્યાકાસિ. સેસં સબ્બં હેટ્ઠા વુત્તનયત્તા ઉત્તાનત્થમેવ.

પઠમભિક્ખાદાયિકાવિમાનવણ્ણના નિટ્ઠિતા.