૭. દુતિયનાવાવિમાનવણ્ણના

સુવણ્ણચ્છદનં નાવન્તિ દુતિયનાવાવિમાનં. તસ્સ કા ઉપ્પત્તિ? ભગવતિ સાવત્થિયં વિહરન્તે અઞ્ઞતરો ખીણાસવત્થેરો ઉપકટ્ઠાય વસ્સૂપનાયિકાય ગામકાવાસે વસ્સં ઉપગન્તુકામો સાવત્થિતો તં ગામં ઉદ્દિસ્સ પચ્છાભત્તં અદ્ધાનમગ્ગપટિપન્નો, મગ્ગપરિસ્સમેન કિલન્તો તસિતો અન્તરામગ્ગે અઞ્ઞતરં ગામં સમ્પત્તો, બહિગામે તાદિસં છાયૂદકસમ્પન્નટ્ઠાનં અપસ્સન્તો પરિસ્સમેન ચ અભિભુય્યમાનો ચીવરં પારુપિત્વા ગામં પવિસિત્વા ધુરગેહસ્સેવ દ્વારે અટ્ઠાસિ. તત્થ અઞ્ઞતરા ઇત્થી થેરં પસ્સિત્વા ‘‘કુતો, ભન્તે, આગતત્થા’’તિ પુચ્છિત્વા મગ્ગપરિસ્સમં પિપાસિતભાવઞ્ચ ઞત્વા ‘‘એથ, ભન્તે’’તિ ગેહં પવેસેત્વા ‘‘ઇધ નિસીદથા’’તિ આસનં પઞ્ઞાપેત્વા અદાસિ. તત્થ નિસિન્ને પાદોદકં પાદબ્ભઞ્જનતેલઞ્ચ દત્વા તાલવણ્ટં ગહેત્વા બીજિ. પરિળાહે વૂપસન્તે મધુરં સીતલં સુગન્ધં પાનકં યોજેત્વા અદાસિ. થેરો તં પિવિત્વા પટિપ્પસ્સદ્ધકિલમથો અનુમોદનં કત્વા પક્કામિ. સા અપરભાગે કાલં કત્વા તાવતિંસભવને નિબ્બત્તીતિ સબ્બં અનન્તરવિમાનસદિસન્તિ વેદિતબ્બં. ગાથાસુપિ અપુબ્બં નત્થિ. તેન વુત્તં –

૫૩. ‘‘સુવણ્ણચ્છદનં નાવં, નારિ આરુય્હ તિટ્ઠસિ;

ઓગાહસિ પોક્ખરણિં, પદ્મં છિન્દસિ પાણિના.

૫૪. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૫૫. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૫૬. ‘‘સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં’’.

૫૭. ‘‘અહં મનુસ્સેસુ મનુસ્સભૂતા, પુરિમાય જાતિયા મનુસ્સલોકે;

દિસ્વાન ભિક્ખું તસિતં કિલન્તં, ઉટ્ઠાય પાતું ઉદકં અદાસિં.

૫૮. ‘‘યો વે કિલન્તસ્સ પિપાસિતસ્સ, ટ્ઠાય પાતું ઉદકં દદાતિ;

સીતોદકા તસ્સ ભવન્તિ નજ્જો, પહૂતમલ્યા બહુપુણ્ડરીકા.

૫૯. ‘‘તં આપગા અનુપરિયન્તિ સબ્બદા, સીતોદકા વાલુકસન્થતા નદી;

અમ્બા ચ સાલા તિલકા ચ જમ્બુયો, ઉદ્દાલકા પાટલિયો ચ ફુલ્લા.

૬૦. ‘‘તંભૂમિભાગેહિ ઉપેતરૂપં, વિમાનસેટ્ઠં ભુસ સોભમાનં;

તસ્સીધ કમ્મસ્સ અયં વિપાકો, એતાદિસં પુઞ્ઞકતા લભન્તિ.

૬૧. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૬૨. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

અત્થવણ્ણનાસુપિ ઇધ એકોવ થેરોતિ અપુબ્બં નત્થિ.

દુતિયનાવાવિમાનવણ્ણના નિટ્ઠિતા.