૧૪. દુતિયસુણિસાવિમાનવણ્ણના

અભિક્કન્તેન વણ્ણેનાતિ દુતિયસુણિસાવિમાનં. એત્થ પન અપુબ્બં નત્થિ, અટ્ઠુપ્પત્તિયં કુમ્માસદાનમેવ વિસેસો. તેન વુત્તં –

૧૧૬. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૧૧૭. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૧૧૮. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૧૧૯. ‘‘સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં’’.

૧૨૦. ‘‘અહં મનુસ્સેસુ મનુસ્સભૂતા, સુણિસા અહોસિં સસુરસ્સ ગેહે.

૧૨૧. ‘‘અદ્દસં વિરજં ભિક્ખું, વિપ્પસન્નમનાવિલં;

તસ્સ અદાસહં ભાગં, પસન્ના સેહિ પાણિભિ;

કુમ્માસપિણ્ડં દત્વાન, મોદામિ નન્દને વને.

૧૨૨. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૧૨૩. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

૧૨૧. તત્થ ભાગન્તિ કુમ્માસકોટ્ઠાસં. તેનાહ ‘‘કુમ્માસપિણ્ડં દત્વાના’’તિ. કુમ્માસોતિ ચ યવકુમ્માસો વુત્તો. સેસં વુત્તનયમેવ.

દુતિયસુણિસાવિમાનવણ્ણના નિટ્ઠિતા.