૧૩. પઠમસુણિસાવિમાનવણ્ણના

અભિક્કન્તેન વણ્ણેનાતિ સુણિસાવિમાનં. તસ્સ કા ઉપ્પત્તિ? સાવત્થિયં અઞ્ઞતરસ્મિં ગેહે એકા કુલસુણ્હા ગેહં પિણ્ડાય પવિટ્ઠં ખીણાસવત્થેરં દિસ્વા સઞ્જાતપીતિસોમનસ્સા ‘‘ઇદં મય્હં ઉત્તમં પુઞ્ઞક્ખેત્તં ઉપટ્ઠિત’’ન્તિ અત્તના લદ્ધં પૂવભાગં આદાય આદરેન થેરસ્સ ઉપનેસિ, થેરો તં પટિગ્ગહેત્વા અનુમોદનં કત્વા ગતો. સા અપરભાગે કાલં કત્વા તાવતિંસભવને ઉપ્પજ્જિ. સેસં સબ્બં હેટ્ઠા વુત્તસદિસમેવ. તેન વુત્તં –

૧૦૮. ‘‘અભિક્કન્તેન વણ્ણેન, યા ત્વં તિટ્ઠસિ દેવતે;

ઓભાસેન્તી દિસા સબ્બા, ઓસધી વિય તારકા.

૧૦૯. ‘‘કેન તેતાદિસો વણ્ણો, કેન તે ઇધ મિજ્ઝતિ;

ઉપ્પજ્જન્તિ ચ તે ભોગા, યે કેચિ મનસો પિયા.

૧૧૦. ‘‘પુચ્છામિ તં દેવિ મહાનુભાવે, મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા, વણ્ણો ચ તે સબ્બદિસા પભાસતી’’તિ.

૧૧૧. ‘‘સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં’’.

૧૧૨. ‘‘અહં મનુસ્સેસુ મનુસ્સભૂતા, સુણિસા અહોસિં સસુરસ્સ ગેહે.

૧૧૩. ‘‘અદ્દસં વિરજં ભિક્ખું, વિપ્પસન્નમનાવિલં;

તસ્સ અદાસહં પૂવં, પસન્ના સેહિ પાણિભિ;

ભાગડ્ઢભાગં દત્વાન, મોદામિ નન્દને વને.

૧૧૪. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૧૧૫. ‘‘અક્ખામિ તે ભિક્ખુ મહાનુભાવ, મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા, વણ્ણો ચ મે સબ્બદિસા પભાસતી’’તિ.

૧૧૨. તત્થ સુણિસાતિ પુત્તસ્સ ભરિયા. ઇત્થિયા હિ સામિકસ્સ પિતા ‘‘સસુરો’’તિ વુચ્ચતિ, તસ્સ ચ સા ‘‘સુણિસા’’તિ. તં સન્ધાય ‘‘સુણિસા અહોસિં સસુરસ્સ ગેહે’’તિ.

૧૧૩. ભાગડ્ઢભાગન્તિ અત્તના લદ્ધપટિવીસતો ઉપડ્ઢભાગં. મોદામિ નન્દને વનેતિ થેરેન નન્દનવને દિટ્ઠતાય આહ. સેસં વુત્તનયમેવ.

સુણિસાવિમાનવણ્ણના નિટ્ઠિતા.