૧૨. દુતિયપતિબ્બતાવિમાનવણ્ણના

વેળુરિયથમ્ભન્તિ દુતિયપતિબ્બતાવિમાનં. તસ્સ કા ઉપ્પત્તિ? સાવત્થિયં કિર અઞ્ઞતરા ઉપાસિકા પતિબ્બતા હુત્વા સદ્ધા પસન્ના પઞ્ચ સીલાનિ સુવિસુદ્ધાનિ કત્વા રક્ખિ, યથાવિભવઞ્ચ દાનાનિ અદાસિ, સા કાલં કત્વા તાવતિંસભવને ઉપ્પજ્જિ. સેસં હેટ્ઠા વુત્તનયમેવ.

૧૦૧. ‘‘વેળુરિયથમ્ભં રુચિરં પભસ્સરં, વિમાનમારુય્હ અનેકચિત્તં;

તત્થચ્છસિ દેવિ મહાનુભાવે, ઉચ્ચાવચા ઇદ્ધિ વિકુબ્બમાના;

ઇમા ચ તે અચ્છરાયો સમન્તતો, નચ્ચન્તિ ગાયન્તિ પમોદયન્તિ ચ.

૧૦૨. ‘‘દેવિદ્ધિપત્તાસિ મહાનુભાવે,

મનુસ્સભૂતા કિમકાસિ પુઞ્ઞં;

કેનાસિ એવં જલિતાનુભાવા,

વણ્ણો ચ તે સબ્બદિસા પભાસતી’’તિ. – પુચ્છિ;

૧૦૩. ‘‘સા દેવતા અત્તમના, મોગ્ગલ્લાનેન પુચ્છિતા;

પઞ્હં પુટ્ઠા વિયાકાસિ, યસ્સ કમ્મસ્સિદં ફલં’’.

૧૦૪. ‘‘અહં મનુસ્સેસુ મનુસ્સભૂતા, ઉપાસિકા ચક્ખુમતો અહોસિં;

પાણાતિપાતા વિરતા અહોસિં, લોકે અદિન્નં પરિવજ્જયિસ્સં.

૧૦૫. ‘‘અમજ્જપા નો ચ મુસા અભાણિં, સકેન સામિના અહોસિં તુટ્ઠા;

અન્નઞ્ચ પાનઞ્ચ પસન્નચિત્તા, સક્કચ્ચ દાનં વિપુલં અદાસિં.

૧૦૬. ‘‘તેન મેતાદિસો વણ્ણો, તેન મે ઇધ મિજ્ઝતિ;

ઉપ્પજ્જન્તિ ચ મે ભોગા, યે કેચિ મનસો પિયા.

૧૦૭. ‘‘અક્ખામિ તે ભિક્ખુ મહાનુભાવ,

મનુસ્સભૂતા યમકાસિ પુઞ્ઞં;

તેનમ્હિ એવં જલિતાનુભાવા,

વણ્ણો ચ મે સબ્બદિસા પભાસતી’’તિ. – વિસ્સજ્જેસિ;

૧૦૧. તત્થ વેળુરિયથમ્ભન્તિ વેળુરિયમણિમયથમ્ભં. રુચિરન્તિ રમણીયં. પભસ્સરન્તિ અતિવિય ભાસુરં. ઉચ્ચાવચાતિ ઉચ્ચા ચ અવચા ચ, વિવિધાતિ અત્થો.

૧૦૪-૫. ઉપાસિકાતિ સરણગમનેન ઉપાસિકાલક્ખણે ઠિતા. વુત્તઞ્હિ –

‘‘યતો ખો, મહાનામ, અરિયસાવકો બુદ્ધં સરણં ગતો હોતિ, ધમ્મં સરણં ગતો હોતિ, સઙ્ઘં સરણં ગતો હોતિ, એત્તાવતા ખો, મહાનામ, અરિયસાવકો ઉપાસકો હોતી’’તિ (સં. નિ. ૫.૧૦૩૩).

ચક્ખુમતોતિ પઞ્ચહિ ચક્ખૂહિ ચક્ખુમતો બુદ્ધસ્સ ભગવતો. એવં ઉપાસિકાભાવકિત્તનેન આસયસુદ્ધિં દસ્સેત્વા પયોગસુદ્ધિં દસ્સેતું ‘‘પાણાતિપાતા વિરતા’’તિઆદિ વુત્તં. તત્થ સકેન સામિના અહોસિં તુટ્ઠાતિ મિચ્છાચારાવેરમણિમાહ. સેસં હેટ્ઠા વુત્તસદિસમેવ.

દુતિયપતિબ્બતાવિમાનવણ્ણના નિટ્ઠિતા.