૫. નન્દુત્તરાથેરીગાથાવણ્ણના

અગ્ગિં ચન્દઞ્ચાતિઆદિકા નન્દુત્તરાય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનિત્વા ઇમસ્મિં બુદ્ધુપ્પાદે કુરુરટ્ઠે કમ્માસધમ્મનિગમે બ્રાહ્મણકુલે નિબ્બત્તિત્વા, એકચ્ચાનિ વિજ્જાટ્ઠાનાનિ સિપ્પાયતનાનિ ચ ઉગ્ગહેત્વા નિગણ્ઠપબ્બજ્જં ઉપગન્ત્વા, વાદપ્પસુતા જમ્બુસાખં ગહેત્વા ભદ્દાકુણ્ડલકેસા વિય જમ્બુદીપતલે વિચરન્તી મહામોગ્ગલ્લાનત્થેરં ઉપસઙ્કમિત્વા પઞ્હં પુચ્છિત્વા પરાજયં પત્તા થેરસ્સ ઓવાદે ઠત્વા સાસને પબ્બજિત્વા સમણધમ્મં કરોન્તી ન ચિરસ્સેવ સહ પટિસમ્ભિદાહિ અરહત્તં પત્વા અત્તનો પટિપત્તિં પચ્ચવેક્ખિત્વા ઉદાનવસેન –

૮૭. ‘‘અગ્ગિં ચન્દઞ્ચ સૂરિયઞ્ચ, દેવતા ચ નમસ્સિહં;

નદીતિત્થાનિ ગન્ત્વાન, ઉદકં ઓરુહામિહં.

૮૮. ‘‘બહૂવતસમાદાના, અડ્ઢં સીસસ્સ ઓલિખિં;

છમાય સેય્યં કપ્પેમિ, રત્તિં ભત્તં ન ભુઞ્જહં.

૮૯. ‘‘વિભૂસામણ્ડનરતા, ન્હાપનુચ્છાદનેહિ ચ;

ઉપકાસિં ઇમં કાયં, કામરાગેન અટ્ટિતા.

૯૦. ‘‘તતો સદ્ધં લભિત્વાન, પબ્બજિં અનગારિયં;

દિસ્વા કાયં યથાભૂતં, કામરાગો સમૂહતો.

૯૧. ‘‘સબ્બે ભવા સમુચ્છિન્ના, ઇચ્છા ચ પત્થનાપિ ચ;

સબ્બયોગવિસંયુત્તા, સન્તિં પાપુણિ ચેતસો’’તિ. –

ઇમા પઞ્ચ ગાથા અભાસિ.

તત્થ અગ્ગિં ચન્દઞ્ચ સૂરિયઞ્ચ, દેવતા ચ નમસ્સિહન્તિ અગ્ગિપ્પમુખા દેવાતિ ઇન્દાનં દેવાનં આરાધનત્થં આહુતિં પગ્ગહેત્વા અગ્ગિઞ્ચ, માસે માસે સુક્કપક્ખસ્સ દુતિયાય ચન્દઞ્ચ, દિવસે દિવસે સાયં પાતં સૂરિયઞ્ચ, અઞ્ઞા ચ બાહિરા હિરઞ્ઞગબ્ભાદયો દેવતા ચ, વિસુદ્ધિમગ્ગં ગવેસન્તી નમસ્સિહં નમક્કારં અહં અકાસિં. નદીતિત્થાનિ ગન્ત્વાન, ઉદકં ઓરુહામિહન્તિ ગઙ્ગાદીનં નદીનં પૂજાતિત્થાનિ ઉપગન્ત્વા સાયં પાતં ઉદકં ઓતરામિ ઉદકે નિમુજ્જિત્વા અઙ્ગસિઞ્ચનં કરોમિ.

બહૂવતસમાદાનાતિ પઞ્ચાતપતપ્પનાદિ બહુવિધવતસમાદાના. ગાથાસુખત્થં બહૂતિ દીઘકરણં. અડ્ઢં સીસસ્સ ઓલિખિન્તિ મય્હં સીસસ્સ અડ્ઢમેવ મુણ્ડેમિ. કેચિ ‘‘અડ્ઢં સીસસ્સ ઓલિખિન્તિ કેસકલાપસ્સ અડ્ઢં જટાબન્ધનવસેન બન્ધિત્વા અડ્ઢં વિસ્સજ્જેસિ’’ન્તિ અત્થં વદન્તિ. છમાય સેય્યં કપ્પેમીતિ થણ્ડિલસાયિની હુત્વા અનન્તરહિતાય ભૂમિયા સયામિ. રત્તિં ભત્તં ન ભુઞ્જહન્તિ રત્તૂપરતા હુત્વા રત્તિયં ભોજનં ન ભુઞ્જિં.

વિભૂસામણ્ડનરતાતિ ચિરકાલં અત્તકિલમથાનુયોગેન કિલન્તકાયા ‘‘એવં સરીરસ્સ કિલમનેન નત્થિ પઞ્ઞાસુદ્ધિ. સચે પન ઇન્દ્રિયાનં તોસનવસેન સરીરસ્સ તપ્પનેન સુદ્ધિ સિયા’’તિ મન્ત્વા ઇમં કાયં અનુગ્ગણ્હન્તી વિભૂસાયં મણ્ડને ચ રતા વત્થાલઙ્કારેહિ અલઙ્કરણે ગન્ધમાલાદીહિ મણ્ડને ચ અભિરતા. ન્હાપનુચ્છાદનેહિ ચાતિ સમ્બાહનાદીનિ કારેત્વા ન્હાપનેન ઉચ્છાદનેન ચ. ઉપકાસિં ઇમં કાયન્તિ ઇમં મમ કાયં અનુગ્ગણ્હિં સન્તપ્પેસિં. કામરાગેન અટ્ટિતાતિ એવં કાયદળ્હીબહુલા હુત્વા અયોનિસોમનસિકારપચ્ચયા પરિયુટ્ઠિતેન કામરાગેન અટ્ટિતા અભિણ્હં ઉપદ્દુતા અહોસિં.

તતો સદ્ધં લભિત્વાનાતિ એવં સમાદિન્નવતાનિ ભિન્દિત્વા કાયદળ્હીબહુલા વાદપ્પસુતા હુત્વા તત્થ તત્થ વિચરન્તી તતો પચ્છા અપરભાગે મહામોગ્ગલ્લાનત્થેરસ્સ સન્તિકે લદ્ધોવાદાનુસાસના સદ્ધં પટિલભિત્વા. દિસ્વા કાયં યથાભૂતન્તિ સહ વિપસ્સનાય મગ્ગપઞ્ઞાય ઇમં મમ કાયં યથાભૂતં દિસ્વા અનાગામિમગ્ગેન સબ્બસો કામરાગો સમૂહતો. તતો પરં અગ્ગમગ્ગેન સબ્બે ભવા સમુચ્છિન્ના, ઇચ્છા ચ પત્થનાપિ ચાતિ પચ્ચુપ્પન્નવિસયાભિલાસસઙ્ખાતા ઇચ્છા ચ આયતિભવાભિલાસસઙ્ખાતા પત્થનાપિ સબ્બે ભવાપિ સમુચ્છિન્નાતિ યોજના. સન્તિં પાપુણિ ચેતસોતિ અચ્ચન્તં સન્તિં અરહત્તફલં પાપુણિં અધિગચ્છિન્તિ અત્થો.

નન્દુત્તરાથેરીગાથાવણ્ણના નિટ્ઠિતા.