૧. અઞ્ઞતરાથેરીગાથાવણ્ણના

પઞ્ચકનિપાતે પણ્ણવીસતિ વસ્સાનીતિઆદિકા અઞ્ઞતરાય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનન્તી ઇમસ્મિં બુદ્ધુપ્પાદે દેવદહનગરે મહાપજાપતિગોતમિયા ધાતી હુત્વા વડ્ઢેસિ. નામગોત્તતો પન અપઞ્ઞાતા અહોસિ. સા મહાપજાપતિગોતમિયા પબ્બજિતકાલે સયમ્પિ પબ્બજિત્વા પઞ્ચવીસતિ સંવચ્છરાનિ કામરાગેન ઉપદ્દુતા અચ્છરાસઙ્ઘાતમત્તમ્પિ કાલં ચિત્તેકગ્ગતં અલભન્તી બાહા પગ્ગય્હ કન્દમાના ધમ્મદિન્નાથેરિયા સન્તિકે ધમ્મં સુત્વા કામેહિ વિનિવત્તિતમાનસા કમ્મટ્ઠાનં ગહેત્વા ભાવનમનુયઞ્જન્તી ન ચિરસ્સેવ છળભિઞ્ઞા હુત્વા અત્તનો પટિપત્તિં પચ્ચવેક્ખિત્વા ઉદાનવસેન –

૬૭. ‘‘પણ્ણવીસતિ વસ્સાનિ, યતો પબ્બજિતા અહં;

નાચ્છરાસઙ્ઘાતમત્તમ્પિ, ચિત્તસ્સૂપસમજ્ઝગં.

૬૮. ‘‘અલદ્ધા ચેતસો સન્તિં, કામરાગેનવસ્સુતા;

બાહા પગ્ગય્હ કન્દન્તી, વિહારં પાવિસિં અહં.

૬૯. ‘‘સા ભિક્ખુનિં ઉપાગચ્છિં, યા મે સદ્ધાયિકા અહુ;

સા મે ધમ્મમદેસેસિ, ખન્ધાયતનધાતુયો.

૭૦. ‘‘તસ્સા ધમ્મં સુણિત્વાન, એકમન્તે ઉપાવિસિં;

પુબ્બેનિવાસં જાનામિ, દિબ્બચક્ખુ વિસોધિતં.

૭૧. ‘‘ચેતોપરિચ્ચઞાણઞ્ચ, સોતધાતુ વિસોધિતા;

ઇદ્ધીપિ મે સચ્છિકતા, પત્તો મે આસવક્ખયો;

છળભિઞ્ઞા સચ્છિકતા, કતં બુદ્ધસ્સ સાસન’’ન્તિ. –

ઇમા ગાથા અભાસિ.

તત્થ નાચ્છરાસઙ્ઘાતમત્તમ્પીતિ અચ્છરાઘટિતમત્તમ્પિ ખણં અઙ્ગુલિફોટનમત્તમ્પિ કાલન્તિ અત્થો. ચિત્તસ્સૂપસમજ્ઝગન્તિ ચિત્તસ્સ ઉપસમં ચિત્તેકગ્ગં ન અજ્ઝગન્તિ યોજના, ન પટિલભિન્તિ અત્થો.

કામરાગેનવસ્સુતાતિ કામગુણસઙ્ખાતેસુ વત્થુકામેસુ દળ્હતરાભિનિવેસિતાય બહલેન છન્દરાગેન તિન્તચિત્તા.

ભિક્ખુનિન્તિ ધમ્મદિન્નત્થેરિં સન્ધાય વદતિ.

ચેતોપરિચ્ચઞાણઞ્ચાતિ ચેતોપરિયઞાણઞ્ચ વિસોધિતન્તિ સમ્બન્ધો, અધિગતન્તિ અત્થો. સેસં વુત્તનયમેવ.

અઞ્ઞતરાથેરીગાથાવણ્ણના નિટ્ઠિતા.