૧૬. વુડ્ઢપબ્બજિતસુમનાથેરીગાથાવણ્ણના

સુખં ત્વં વુડ્ઢિકે સેહીતિ સુમનાય વુડ્ઢપબ્બજિતાય ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે કુસલં ઉપચિનિત્વા ઇમસ્મિં બુદ્ધુપ્પાદે સાવત્થિયં મહાકોસલરઞ્ઞો ભગિની હુત્વા નિબ્બત્તિ. સા સત્થારા રઞ્ઞો પસેનદિસ્સ કોસલસ્સ ‘‘ચત્તારો ખો મે, મહારાજ, દહરાતિ ન ઉઞ્ઞાતબ્બા’’તિઆદિના (સં. નિ. ૧.૧૧૨) દેસિતં ધમ્મં સુત્વા લદ્ધપ્પસાદા સરણેસુ ચ સીલેસુ ચ પતિટ્ઠાય પબ્બજિતુકામાપિ ‘‘અય્યિકં પટિજગ્ગિસ્સામી’’તિ ચિરકાલં વીતિનામેત્વા અપરભાગે અય્યિકાય કાલઙ્કતાય રઞ્ઞા સદ્ધિં મહગ્ઘાનિ અત્થરણપાવુરણાનિ ગાહાપેત્વા વિહારં ગન્ત્વા સઙ્ઘસ્સ દાપેત્વા સત્થુ સન્તિકે ધમ્મં સુત્વા અનાગામિફલે પતિટ્ઠિતા પબ્બજ્જં યાચિ. સત્થા તસ્સા ઞાણપરિપાકં દિસ્વા –

૧૬. ‘‘સુખં ત્વં વુડ્ઢિકે સેહિ, કત્વા ચોળેન પારુતા;

ઉપસન્તો હિ તે રાગો, સીતિભૂતાસિ નિબ્બુતા’’તિ. –

ઇમં ગાથં અભાસિ. સા ગાથાપરિયોસાને સહ પટિસમ્ભિદાહિ અરહત્તં પત્વા ઉદાનવસેન તમેવ ગાથં અભાસિ. ઇદમેવ ચસ્સા અઞ્ઞાબ્યાકરણં અહોસિ, સા તાવદેવ પબ્બજિ. ગાથાય પન વુડ્ઢિકેતિ વુડ્ઢે, વયોવુડ્ઢેતિ અત્થો. અયં પન સીલાદિગુણેહિપિ વુડ્ઢા, થેરિયા વુત્તગાથાય ચતુત્થપાદે સીતિભૂતાસિ નિબ્બુતાતિ યોજેતબ્બં. સેસં વુત્તનયમેવ.

વુડ્ઢપબ્બજિતસુમનાથેરીગાથાવણ્ણના નિટ્ઠિતા.