૧૭. ધમ્માથેરીગાથાવણ્ણના

પિણ્ડપાતં ચરિત્વાનાતિ ધમ્માય થેરિયા ગાથા. અયમ્પિ પુરિમબુદ્ધેસુ કતાધિકારા તત્થ તત્થ ભવે વિવટ્ટૂપનિસ્સયં કુસલં ઉપચિનિત્વા સમ્ભતપુઞ્ઞસમ્ભારા ઇમસ્મિં બુદ્ધુપ્પાદે સાવત્થિયં કુલઘરે નિબ્બત્તિત્વા વયપ્પત્તા પતિરૂપસ્સ સામિકસ્સ ગેહં ગન્ત્વા સાસને પટિલદ્ધસદ્ધા પબ્બજિતુકામા હુત્વા સામિકેન અનનુઞ્ઞાતા પચ્છા સામિકે કાલઙ્કતે પબ્બજિત્વા વિપસ્સનાય કમ્મં કરોન્તી એકદિવસં ભિક્ખાય ચરિત્વા વિહારં આગચ્છન્તી પરિપતિત્વા તમેવ આરમ્મણં કત્વા વિપસ્સનં વડ્ઢેત્વા સહ પટિસમ્ભિદાહિ અરહત્તં પત્વા –

૧૭. ‘‘પિણ્ડપાતં ચરિત્વાન, દણ્ડમોલુબ્ભ દુબ્બલા;

વેધમાનેહિ ગત્તેહિ, તત્થેવ નિપતિં છમા;

દિસ્વા આદીનવં કાયે, અથ ચિત્તં વિમુચ્ચિ મે’’તિ. –

ઉદાનવસેન ઇમં ગાથં અભાસિ.

તત્થ પિણ્ડપાતં ચરિત્વાન, દણ્ડમોલુબ્ભાતિ પિણ્ડપાતત્થાય યટ્ઠિં ઉપત્થમ્ભેન નગરે વિચરિત્વા ભિક્ખાય આહિણ્ડિત્વા. છમાતિ છમાયં ભૂમિયં, પાદાનં અવસેન ભૂમિયં નિપતિન્તિ અત્થો. દિસ્વા આદીનવં કાયેતિ અસુભાનિચ્ચદુક્ખાનત્તતાદીહિ નાનપ્પકારેહિ સરીરે દોસં પઞ્ઞાચક્ખુના દિસ્વા. અથ ચિત્તં વિમુચ્ચિ મેતિ આદીનવાનુપસ્સનાય પરતો પવત્તેહિ નિબ્બિદાનુપસ્સનાદીહિ વિક્ખમ્ભનવસેન મમ ચિત્તં કિલેસેહિ વિમુચ્ચિત્વા પુન મગ્ગફલેહિ યથાક્કમં સમુચ્છેદવસેન ચેવ પટિપ્પસ્સદ્ધિવસેન ચ સબ્બસો વિમુચ્ચિ વિમુત્તં, ન દાનિસ્સા વિમોચેતબ્બં અત્થીતિ. ઇદમેવ ચસ્સા અઞ્ઞાબ્યાકરણં અહોસીતિ.

ધમ્માથેરીગાથાવણ્ણના નિટ્ઠિતા.