૧૫. ઉત્તરાથેરીગાથાવણ્ણના

કાયેન સંવુતા આસિન્તિ ઉત્તરાય થેરિયા ગાથા. તસ્સાપિ વત્થુ તિસ્સાથેરિયા વત્થુસદિસં. સાપિ હિ સક્યકુલપ્પસુતા બોધિસત્તસ્સ ઓરોધભૂતા મહાપજાપતિગોતમિયા સદ્ધિં નિક્ખન્તા ઓભાસગાથાય અરહત્તં પત્વા પન –

૧૫. ‘‘કાયેન સંવુતા આસિં, વાચાય ઉદ ચેતસા;

સમૂલં તણ્હમબ્બુય્હ, સીતિભૂતામ્હિ નિબ્બુતા’’તિ. –

ઉદાનવસેન તમેવ ગાથં અભાસિ.

તત્થ કાયેન સંવુતા આસિન્તિ કાયિકેન સંવરેન સંવુતા અહોસિં. વાચાયાતિ વાચસિકેન સંવરેન સંવુતા આસિન્તિ યોજના, પદદ્વયેનાપિ સીલસંવરમાહ. ઉદાતિ અથ. ચેતસાતિ સમાધિચિત્તેન, એતેન વિપસ્સનાભાવનમાહ. સમૂલં તણ્હમબ્બુય્હાતિ સાનુસયં, સહ વા અવિજ્જાય તણ્હં ઉદ્ધરિત્વા. અવિજ્જાય હિ પટિચ્છાદિતાદીનવે ભવત્તયે તણ્હા ઉપ્પજ્જતિ.

અપરો નયો – કાયેન સંવુતાતિ સમ્માકમ્મન્તેન સબ્બસો મિચ્છાકમ્મન્તસ્સ પહાના મગ્ગસંવરેનેવ કાયેન સંવુતા આસિં. વાચાયાતિ સમ્માવાચાય સબ્બસો મિચ્છાવાચાય પહાના મગ્ગસંવરેનેવ વાચાય સંવુતા આસિન્તિ અત્થો. ચેતસાતિ સમાધિના. ચેતોસીસેન હેત્થ સમ્માસમાધિ વુત્તો, સમ્માસમાધિગ્ગહણેનેવ મગ્ગલક્ખણેન એકલક્ખણા સમ્માદિટ્ઠિઆદયો મગ્ગધમ્મા ગહિતાવ હોન્તીતિ, મગ્ગસંવરેન અભિજ્ઝાદિકસ્સ અસંવરસ્સ અનવસેસતો પહાનં દસ્સિતં હોતિ. તેનેવાહ ‘‘સમૂલં તણ્હમબ્બુય્હા’’તિ. સીતિભૂતામ્હિ નિબ્બુતાતિ સબ્બસો કિલેસપરિળાહાભાવેન સીતિભાવપ્પત્તા અનુપાદિસેસાય નિબ્બાનધાતુયા નિબ્બુતા અમ્હીતિ.

ઉત્તરાથેરીગાથાવણ્ણના નિટ્ઠિતા.