૧. વઙ્ગીસત્થેરગાથાવણ્ણના

સત્તતિનિપાતે નિક્ખન્તં વત મં સન્તન્તિઆદિકા આયસ્મતો વઙ્ગીસત્થેરસ્સ ગાથા. કા ઉપ્પત્તિ? અયં કિર પદુમુત્તરબુદ્ધકાલે હંસવતીનગરે મહાભોગકુલે નિબ્બત્તો, પુરિમનયેનેવ વિહારં ગન્ત્વા ધમ્મં સુણન્તો સત્થારં એકં ભિક્ખું પટિભાનવન્તાનં અગ્ગટ્ઠાને ઠપેન્તં દિસ્વા સત્થુ અધિકારકમ્મં કત્વા – ‘‘અહમ્પિ અનાગતે પટિભાનવન્તાનં અગ્ગો ભવેય્ય’’ન્તિ પત્થનં કત્વા, સત્થારા બ્યાકતો યાવજીવં કુસલં કત્વા દેવમનુસ્સેસુ સંસરન્તો ઇમસ્મિં બુદ્ધુપ્પાદે સાવત્થિયં બ્રાહ્મણકુલે નિબ્બત્તિત્વા વઙ્ગીસોતિ લદ્ધનામો તયો બેદે ઉગ્ગણ્હન્તો આચરિયં આરાધેત્વા, છવસીસમન્તં નામ સિક્ખિત્વા છવસીસં નખેન આકોટેત્વા ‘‘અયં સત્તો અસુકયોનિયં નિબ્બત્તો’’તિ જાનાતિ.

બ્રાહ્મણા ‘‘અયં અમ્હાકં જીવિતમગ્ગો’’તિ ઞત્વા વઙ્ગીસં ગહેત્વા પટિચ્છન્નયાને નિસીદાપેત્વા ગામનિગમરાજધાનિયો વિચરન્તિ. વઙ્ગીસોપિ તિવસ્સમત્થકે મતાનમ્પિ સીસં આહરાપેત્વા નખેન આકોટેત્વા ‘‘અયં સત્તો અસુકયોનિયં નિબ્બત્તો’’તિ વત્વા મહાજનસ્સ કઙ્ખચ્છેદનત્થં તે તે જને આવાહેત્વા અત્તનો અત્તનો ગતિં કથાપેતિ. તેન તસ્મિં મહાજનો અભિપ્પસીદતિ. સો તં નિસ્સાય મહાજનસ્સ હત્થતો સતમ્પિ સહસ્સમ્પિ લભતીતિ. બ્રાહ્મણા વઙ્ગીસમાદાય યથારુચિં વિચરિત્વા પુન સાવત્થિં અગમંસુ. વઙ્ગીસો સત્થુ ગુણે સુત્વા સત્થારં ઉપસઙ્કમિતુકામો અહોસિ. બ્રાહ્મણા ‘‘સમણો ગોતમો માયાય તં આવટ્ટેસ્સતી’’તિ પટિક્ખિપિંસુ. વઙ્ગીસો તેસં વચનં અનાદિયિત્વા સત્થુ સન્તિકં ગન્ત્વા મધુરપટિસન્થારં કત્વા એકમન્તં નિસીદિ.

તં સત્થા પુચ્છિ – ‘‘વઙ્ગીસ, કિઞ્ચિ સિપ્પં જાનાસી’’તિ? ‘‘આમ, ભો ગોતમ, છવસીસમન્તં નામ જાનામિ. તેન તિવસ્સમત્થકે મતાનમ્પિ સીસં નખેન આકોટેત્વા નિબ્બત્તટ્ઠાનં જાનામી’’તિ. સત્થા તસ્સ એકં નિરયે નિબ્બત્તસ્સ સીસં દસ્સેસિ, એકં મનુસ્સેસુ, એકં દેવેસુ, એકં પરિનિબ્બુતસ્સ સીસં દસ્સેસિ. સો પઠમં સીસં આકોટેત્વા, ‘‘ભો ગોતમ, અયં સત્તો નિરયે નિબ્બત્તો’’તિ આહ. ‘‘સાધુ, વઙ્ગીસ, સુટ્ઠુ તયા દિટ્ઠં. અયં સત્તો કુહિં નિબ્બત્તો’’તિ પુચ્છિ. ‘‘મનુસ્સલોકે’’તિ. ‘‘અયં કુહિ’’ન્તિ? ‘‘દેવલોકે’’તિ તિણ્ણન્નમ્પિ નિબ્બત્તટ્ઠાનં કથેસિ. પરિનિબ્બુતસ્સ પન સીસં નખેન આકોટેન્તો નેવ અન્તં ન કોટિં પસ્સિ. અથ નં સત્થા ‘‘ન સક્કોસિ વઙ્ગીસા’’તિ પુચ્છિ. ‘‘ઉપપરિક્ખામિ તાવા’’તિ પુનપ્પુનં પરિવત્તેત્વા આકોટેન્તોપિ બાહિરકમન્તેન ખીણાસવસ્સ ગતિં કથં જાનિસ્સતિ, અથસ્સ મત્થકતો સેદો મુચ્ચિ. સો લજ્જિત્વા તુણ્હીભૂતો અટ્ઠાસિ. અથ નં સત્થા – ‘‘કિલમસિ, વઙ્ગીસા’’તિ આહ. ‘‘આમ, ભો ગોતમ, ઇમસ્સ ઉપ્પન્નટ્ઠાનં જાનિતું ન સક્કોમિ, સચે તુમ્હે જાનાથ, કથેથા’’તિ. ‘‘વઙ્ગીસ, અહં એતમ્પિ જાનામિ, ઇતો ઉત્તરિતરમ્પિ જાનામી’’તિ વત્વા –

‘‘ચુતિં યો વેદિ સત્તાનં, ઉપપત્તિઞ્ચ સબ્બસો;

અસત્તં સુગતં બુદ્ધં, તમહં બ્રૂમિ બ્રાહ્મણં.

‘‘યસ્સ ગતિં ન જાનન્તિ, દેવા ગન્ધબ્બમાનુસા;

ખીણાસવં અરહન્તં, તમહં બ્રૂમિ બ્રાહ્મણ’’ન્તિ. (ધ. પ. ૪૧૯-૪૨૦; સુ. નિ. ૬૪૮-૬૪૯) –

ઇમા દ્વે ગાથા અભાસિ. વઙ્ગીસો ‘‘તેન હિ, ભો ગોતમ, તં વિજ્જં મે દેથા’’તિ અપચિતિં દસ્સેત્વા સત્થુ સન્તિકે નિસીદિ. સત્થા ‘‘અમ્હેહિ સમાનલિઙ્ગસ્સ દેમા’’તિ આહ. વઙ્ગીસો ‘‘યંકિઞ્ચિ કત્વા મયા ઇમં મન્તં ગહેતું વટ્ટતી’’તિ બ્રાહ્મણે આહ – ‘‘તુમ્હે મયિ પબ્બજન્તે મા ચિન્તયિત્થ, અહં મન્તં ઉગ્ગણ્હિત્વા સકલજમ્બુદીપે જેટ્ઠકો ભવિસ્સામિ, તુમ્હાકમ્પિ તેન ભદ્દકમેવ ભવિસ્સતી’’તિ મન્તત્થાય સત્થુસન્તિકં ઉપસઙ્કમિત્વા પબ્બજ્જં યાચિ. તદા ચ થેરો નિગ્રોધકપ્પો ભગવતો સન્તિકે ઠિતો હોતિ, તં ભગવા આણાપેસિ – ‘‘નિગ્રોધકપ્પ, ઇમં પબ્બાજેહી’’તિ. સો સત્થુ આણાય તં પબ્બાજેસિ. અથસ્સ સત્થા ‘‘મન્તપરિવારં તાવ ઉગ્ગણ્હાહી’’તિ દ્વત્તિંસાકારકમ્મટ્ઠાનં વિપસ્સનાકમ્મટ્ઠાનઞ્ચ આચિક્ખિ. સો દ્વત્તિંસાકારં સજ્ઝાયન્તોવ વિપસ્સનં પટ્ઠપેસિ. બ્રાહ્મણા વઙ્ગીસં ઉપસઙ્કમિત્વા ‘‘કિં, ભો વઙ્ગીસ, સમણસ્મ ગોતમસ્સ સન્તિકે સિપ્પં સિક્ખિત’’ન્તિ પુચ્છિંસુ. ‘‘કિં સિપ્પસિક્ખનેન, ગચ્છથ તુમ્હે, ન મય્હં તુમ્હેહિ કત્તબ્બકિચ્ચ’’ન્તિ. બ્રાહ્મણા ‘‘ત્વમ્પિ દાનિ સમણસ્સ ગોતમસ્સ વસં આપન્નો, માયાય આવટ્ટિતો, કિં મયં તવ સન્તિકે કરિસ્સામા’’તિ આગતમગ્ગેનેવ પક્કમિંસુ. વઙ્ગીસત્થેરો વિપસ્સનં વડ્ઢેત્વા અરહત્તં સચ્છાકાસિ. તેન વુત્તં અપદાને (અપ. થેર ૨.૫૫.૯૬-૧૪૨) –

‘‘પદુમુત્તરો નામ જિનો, સબ્બધમ્મેસુ ચક્ખુમા;

ઇતો સતસહસ્સમ્હિ, કપ્પે ઉપ્પજ્જિ નાયકો.

‘‘યથાપિ સાગરે ઊમિ, ગગને વિય તારકા;

એવં પાવચનં તસ્સ, અરહન્તેહિ ચિત્તિતં.

‘‘સદેવાસુરનાગેહિ, મનુજેહિ પુરક્ખતો;

સમણબ્રાહ્મણાકિણ્ણે, જનમજ્ઝે જિનુત્તમો.

‘‘પભાહિ અનુરઞ્જન્તો, લોકે લોકન્તગૂ જિનો;

વચનેન વિબોધેન્તો, વેનેય્યપદુમાનિ સો.

‘‘વેસારજ્જેહિ સમ્પન્નો, ચતૂહિ પુરિસુત્તમો;

પહીનભયસારજ્જો, ખેમપ્પત્તો વિસારદો.

‘‘આસભં પવરં ઠાનં, બુદ્ધભૂમિઞ્ચ કેવલં;

પટિજાનાતિ લોકગ્ગો, નત્થિ સઞ્ચોદકો ક્વચિ.

‘‘સીહનાદમસમ્ભીતં, નદતો તસ્સ તાદિનો;

દેવા નરો વા બ્રહ્મા વા, પટિવત્તા ન વિજ્જતિ.

‘‘દેસેન્તો પવરં ધમ્મં, સન્તારેન્તો સદેવકં;

ધમ્મચક્કં પવત્તેતિ, પરિસાસુ વિસારદો.

‘‘પટિભાનવતં અગ્ગં, સાવકં સાધુસમ્મતં;

ગુણં બહું પકિત્તેત્વા, એતદગ્ગે ઠપેસિ તં.

‘‘તદાહં હંસવતિયં, બ્રાહ્મણો સાધુસમ્મતો;

સબ્બવેદવિદૂ જાતો, વાગીસો વાદિસૂદનો.

‘‘ઉપેચ્ચ તં મહાવીરં, સુત્વાહં ધમ્મદેસનં;

પીતિવરં પટિલભિં, સાવકસ્સ ગુણે રતો.

‘‘નિમન્તેત્વાવ સુગતં, સસઙ્ઘં લોકનન્દનં;

સત્તાહં ભોજયિત્વાહં, દુસ્સેહચ્છાદયિં તદા.

‘‘નિપચ્ચ સિરસા પાદે, કતોકાસો કતઞ્જલી;

એકમન્તં ઠિતો હટ્ઠો, સન્થવિં જિનમુત્તમં.

‘‘નમો તે વાદિમદ્દન, નમો તે ઇસિસત્તમ;

નમો તે સબ્બલોકગ્ગ, નમો તે અભયં કર.

‘‘નમો તે મારમથન, નમો તે દિટ્ઠિસૂદન;

નમો તે સન્તિસુખદ, નમો તે સરણં કર.

‘‘અનાથાનં ભવં નાથો, ભીતાનં અભયપ્પદો;

વિસ્સામભૂમિ સન્તાનં, સરણં સરણેસિનં.

‘‘એવમાદીહિ સમ્બુદ્ધં, સન્થવિત્વા મહાગુણં;

અવોચં વાદિસૂદસ્સ, ગતિં પપ્પોમિ ભિક્ખુનો.

‘‘તદા અવોચ ભગવા, અનન્તપટિભાનવા;

યો સો બુદ્ધં અભોજેસિ, સત્તાહં સહસાવકં.

‘‘ગુણઞ્ચ મે પકિત્તેસિ, પસન્નો સેહિ પાણિભિ;

એસો પત્થયતે ઠાનં, વાદિસૂદસ્સ ભિક્ખુનો.

‘‘અનાગતમ્હિ અદ્ધાને, લચ્છસે તં મનોરથં;

દેવમાનુસસમ્પત્તિં, અનુભોત્વા અનપ્પકં.

‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

‘‘તસ્સ ધમ્મેસુ દાયાદો, ઓરસો ધમ્મનિમ્મિતો;

વઙ્ગીસો નામ નામેન, હેસ્સતિ સત્થુ સાવકો.

‘‘તં સુત્વા મુદિતો હુત્વા, યાવજીવં તદા જિનં;

પચ્ચયેહિ ઉપટ્ઠાસિં, મેત્તચિત્તો તથાગતં.

‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તુસિતં અગમાસહં.

‘‘પચ્છિમે ચ ભવે દાનિ, જાતો વિપ્પકુલે અહં;

પચ્ચાજાતો યદા આસિં, જાતિયા સત્તવસ્સિકો.

‘‘સબ્બવેદવિદૂ જાતો, વાદસત્થવિસારદો;

વાદિસ્સરો ચિત્તકથી, પરવાદપ્પમદ્દનો.

‘‘વઙ્ગે જાતોતિ વઙ્ગીસો, વચને ઇસ્સરોતિ વા;

વઙ્ગીસો ઇતિ મે નામં, અભવી લોકસમ્મતં.

‘‘યદાહં વિઞ્ઞુતં પત્તો, ઠિતો પઠમયોબ્બને;

તદા રાજગહે રમ્મે, સારિપુત્તમહદ્દસં.

‘‘પિણ્ડાય વિચરન્તં તં, પત્તપાણિં સુસંવુતં;

અલોલક્ખિં મિતભાણિં, યુગમત્તં નિદક્ખિતં.

‘‘તં દિસ્વા વિમ્હિતો હુત્વા, અવોચં મમનુચ્છવં;

કણિકારંવ નિચિતં, ચિત્તં ગાથાપદં અહં.

‘‘આચિક્ખિ સો મે સત્થારં, સમ્બુદ્ધં લોકનાયકં;

તદા સો પણ્ડિતો વીરો, ઉત્તરિં સમવોચ મે.

‘‘વિરાગસંહિતં વાક્યં, કત્વા દુદ્દસમુત્તમં;

વિચિત્તપટિભાનેહિ, તોસિતો તેન તાદિના.

‘‘નિપચ્ચ સિરસા પાદે, પબ્બાજેહીતિ મં બ્રવિ;

તતો મં સ મહાપઞ્ઞો, બુદ્ધસેટ્ઠમુપાનયિ.

‘‘નિપચ્ચ સિરસા પાદે, નિસીદિં સત્થુ સન્તિકે;

મમાહ વદતં સેટ્ઠો, કચ્ચિ વઙ્ગીસ જાનાસિ.

‘‘કિઞ્ચિ સિપ્પન્તિ તસ્સાહં, જાનામીતિ ચ અબ્રવિં;

મતસીસં વનચ્છુદ્ધં, અપિ બારસવસ્સિકં;

તવ વિજ્જાવિસેસેન, સચે સક્કોસિ વાચય.

‘‘આમોતિ મે પટિઞ્ઞાતે, તીણિ સીસાનિ દસ્સયિ;

નિરયનરદેવેસુ, ઉપપન્ને અવાચયિં.

‘‘તદા ખીણાસવસ્સેવ, સીસં દસ્સેસિ નાયકો;

તતોહં વિહતારબ્ભો, પબ્બજ્જં સમયાચિસં.

‘‘પબ્બજિત્વાન સુગતં, સન્થવામિ તહિં તહિં;

તતો મં કબ્બવિત્તોસિ, ઉજ્ઝાયન્તિહ ભિક્ખવો.

‘‘તતો વીમંસનત્થં મે, આહ બુદ્ધો વિનાયકો;

તક્કિકા પનિમા ગાથા, ઠાનસો પટિભન્તિ તં.

‘‘ન કબ્બવિત્તોહં વીર, ઠાનસો પટિભન્તિ મં;

તેન હિ દાનિ વઙ્ગીસ, ઠાનસો સન્થવાહિ મં.

‘‘તદાહં સન્થવિં વીરં, ગાથાહિ ઇસિસત્તમં;

ઠાનસો મે તદા તુટ્ઠો, જિનો અગ્ગે ઠપેસિ મં.

‘‘પટિભાનેન ચિત્તેન, અઞ્ઞેસમતિમઞ્ઞહં;

પેસલે તેન સંવિગ્ગો, અરહત્તમપાપુણિં.

‘‘પટિભાનવતં અગ્ગો, અઞ્ઞો કોચિ ન વિજ્જતિ;

યથાયં ભિક્ખુ વઙ્ગીસો, એવં ધારેથ ભિક્ખવો.

‘‘સતસહસ્સે કતં કમ્મં, ફલં દસ્સેસિ મે ઇધ;

સુમુત્તો સરવેગોવ, કિલેસે ઝાપયિં મમ.

‘‘કિલેસા ઝાપિતા મય્હં, ભવા સબ્બે સમૂહતા;

નાગોવ બન્ધનં છેત્વા, વિહરામિ અનાસવો.

‘‘સ્વાગતં વત મે આસિ, બુદ્ધસેટ્ઠસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસન’’ન્તિ.

અરહા પન હુત્વા થેરો સત્થુ સન્તિકં ગચ્છન્તો ચક્ખુપથતો પટ્ઠાય ચન્દેન, સૂરિયેન, આકાસેન, મહાસમુદ્દેન, સિનેરુના પબ્બતરાજેન, સીહેન મિગરઞ્ઞા, હત્થિનાગેનાતિ તેન તેન સદ્ધિં ઉપમેન્તો અનેકેહિ પદસતેહિ સત્થારં વણ્ણેન્તોવ ઉપગચ્છતિ. તેન તં સત્થા સઙ્ઘમજ્ઝે નિસિન્નો પટિભાનવન્તાનં અગ્ગટ્ઠાને ઠપેસિ. અથ થેરેન અરહત્તપ્પત્તિતો પુબ્બે ચ પચ્છા ચ તં તં ચિત્તં આગમ્મ ભાસિતા. થેરં ઉદ્દિસ્સ આનન્દત્થેરાદીહિ ભાસિતા ચ –

૧૨૧૮. ‘‘નિક્ખન્તં વત મં સન્તં, અગારસ્માનગારિયં;

વિતક્કા ઉપધાવન્તિ, પગબ્ભા કણ્હતો ઇમે.

૧૨૧૯. ‘‘ઉગ્ગપુત્તા મહિસ્સાસા, સિક્ખિતા દળ્હધમ્મિનો;

સમન્તા પરિકિરેય્યું, સહસ્સં અપલાયિનં.

૧૨૨૦. ‘‘સચેપિ એત્તકા ભિય્યો, આગમિસ્સન્તિ ઇત્થિયો;

નેવ મં બ્યાધયિસ્સન્તિ, ધમ્મે સમ્હિ પતિટ્ઠિતો.

૧૨૨૧. ‘‘સક્ખી હિ મે સુતં એતં, બુદ્ધસ્સાદિચ્ચબન્ધુનો;

નિબ્બાનગમનં મગ્ગં, તત્થ મે નિરતો મનો.

૧૨૨૨. ‘‘એવઞ્ચે મં વિહરન્તં, પાપિમ ઉપગચ્છસિ;

તથા મચ્ચુ કરિસ્સામિ, ન મે મગ્ગમ્પિ દક્ખસિ.

૧૨૨૩. ‘‘અરતિઞ્ચ રતિઞ્ચ પહાય, સબ્બસો ગેહસિતઞ્ચ વિતક્કં;

વનથં ન કરેય્ય કુહિઞ્ચિ, નિબ્બનથો અવનથો સ ભિક્ખુ.

૧૨૨૪. ‘‘યમિધ પથવિઞ્ચ વેહાસં, રૂપગતં જગતોગધં કિઞ્ચિ;

પરિજીયતિ સબ્બમનિચ્ચં, એવં સમેચ્ચ ચરન્તિ મુતત્તા.

૧૨૨૫. ‘‘ઉપધીસુ જના ગધિતાસે, દિટ્ઠસુતે પટિઘે ચ મુતે ચ;

એત્થ વિનોદય છન્દમનેજો, યો હેત્થ ન લિમ્પતિ મુનિ તમાહુ.

૧૨૨૬. ‘‘અથ સટ્ઠિસિતા સવિતક્કા, પુથુજ્જનતાય અધમ્મા નિવિટ્ઠા;

ન ચ વગ્ગગતસ્સ કુહિઞ્ચિ, નો પન દુટ્ઠુલ્લગાહી સ ભિક્ખુ.

૧૨૨૭. ‘‘દબ્બો ચિરરત્તસમાહિતો, અકુહકો નિપકો અપિહાલુ;

સન્તં પદં અજ્ઝગમા મુનિ, પટિચ્ચ પરિનિબ્બુતો કઙ્ખતિ કાલં.

૧૨૨૮. ‘‘માનં પજહસ્સુ ગોતમ, માનપથઞ્ચ જહસ્સુ અસેસં;

માનપથમ્હિ સ મુચ્છિતો, વિપ્પટિસારીહુવા ચિરરત્તં.

૧૨૨૯. ‘‘મક્ખેન મક્ખિતા પજા, માનહતા નિરયં પપતન્તિ;

સોચન્તિ જના ચિરરત્તં, માનહતા નિરયં ઉપપન્ના.

૧૨૩૦. ‘‘ન હિ સોચતિ ભિક્ખુ કદાચિ, મગ્ગજિનો સમ્મા પટિપન્નો;

કિત્તિઞ્ચ સુખઞ્ચાનુભોતિ, ધમ્મદસોતિ તમાહુ તથત્તં.

૧૨૩૧. ‘‘તસ્મા અખિલો ઇધ પધાનવા, નીવરણાનિ પહાય વિસુદ્ધો;

માનઞ્ચ પહાય અસેસં, વિજ્જાયન્તકરો સમિતાવી.

૧૨૩૨. ‘‘કામરાગેન ડય્હામિ, ચિત્તં મે પરિડય્હતિ;

સાધુ નિબ્બાપનં બ્રૂહિ, અનુકમ્પાય ગોતમ.

૧૨૩૩. ‘‘સઞ્ઞાય વિપરિયેસા, ચિત્તં તે પરિડય્હતિ;

નિમિત્તં પરિવજ્જેહિ, સુભં રાગૂપસંહિતં.

૧૨૩૪. ‘‘અસુભાય ચિત્તં ભાવેહિ, એકગ્ગં સુસમાહિતં;

સતિ કાયગતા ત્યત્થુ, નિબ્બિદાબહુલો ભવ.

૧૨૩૫. ‘‘અનિમિત્તઞ્ચ ભાવેહિ, માનાનુસયમુજ્જહ;

તતો માનાભિસમયા, ઉપસન્તો ચરિસ્સસિ.

૧૨૩૬. ‘‘તમેવ વાચં ભાસેય્ય, યાયત્તાનં ન તાપયે;

પરે ચ ન વિહિંસેય્ય, સા વે વાચા સુભાસિતા.

૧૨૩૭. ‘‘પિયવાચમેવ ભાસેય્ય, યા વાચા પટિનન્દિતા;

યં અનાદાય પાપાનિ, પરેસં ભાસતે પિયં.

૧૨૩૮. ‘‘સચ્ચં વે અમતા વાચા, એસ ધમ્મો સનન્તનો;

સચ્ચે અત્થે ચ ધમ્મે ચ, આહુ સન્તો પતિટ્ઠિતા.

૧૨૩૯. ‘‘યં બુદ્ધો ભાસતિ વાચં, ખેમં નિબ્બાનપત્તિયા;

દુક્ખસ્સન્તકિરિયાય, સા વે વાચાનમુત્તમા.

૧૨૪૦. ‘‘ગમ્ભીરપઞ્ઞો મેધાવી, મગ્ગામગ્ગસ્સ કોવિદો;