૧૪. ભોગસંહરણપેતિવત્થુવણ્ણના

મયં ભોગે સંહરિમ્હાતિ ઇદં ભોગસંહરણપેતિવત્થુ. તસ્સ કા ઉપ્પત્તિ? ભગવતિ વેળુવને વિહરન્તે રાજગહે કિર ચતસ્સો ઇત્થિયો માનકૂટાદિવસેન સપ્પિમધુતેલધઞ્ઞાદીહિ વોહારં કત્વા અયોનિસો ભોગે સંહરિત્વા જીવન્તિ. તા કાયસ્સ ભેદા પરં મરણા બહિનગરે પરિખાપિટ્ઠે પેતિયો હુત્વા નિબ્બત્તિંસુ. તા રત્તિયં દુક્ખાભિભૂતા –

૮૦૧. ‘‘મયં ભોગે સંહરિમ્હા, સમેન વિસમેન ચ;

તે અઞ્ઞે પરિભુઞ્જન્તિ, મયં દુક્ખસ્સ ભાગિની’’તિ. –

વિપ્પલપન્તિયો ભેરવેન મહાસદ્દેન વિરવિંસુ. મનુસ્સા તં સુત્વા ભીતતસિતા વિભાતાય રત્તિયા બુદ્ધપ્પમુખસ્સ ભિક્ખુસઙ્ઘસ્સ મહાદાનં સજ્જેત્વા સત્થારં ભિક્ખુસઙ્ઘઞ્ચ નિમન્તેત્વા પણીતેન ખાદનીયેન ભોજનીયેન પરિવિસિત્વા ભગવન્તં ભુત્તાવિં ઓનીતપત્તપાણિં ઉપનિસીદિત્વા તં પવત્તિં નિવેદેસું. ભગવા ‘‘ઉપાસકા તેન વો સદ્દેન કોચિ અન્તરાયો નત્થિ, ચતસ્સો પન પેતિયો દુક્ખાભિભૂતા અત્તના દુક્કટં કમ્મં કથેત્વા પરિદેવનવસેન વિસ્સરેન વિરવન્તિયો –

‘‘મયં ભોગે સંહરિમ્હા, સમેન વિસમેન ચ;

તે અઞ્ઞે પરિભુઞ્જન્તિ, મયં દુક્ખસ્સ ભાગિની’’તિ. –

ઇમં ગાથમાહંસૂતિ અવોચ.

તત્થ ભોગેતિ પરિભુઞ્જિતબ્બટ્ઠેન ‘‘ભોગા’’તિ લદ્ધનામે વત્થાભરણાદિકે વિત્તૂપકરણવિસેસે. સંહરિમ્હાતિ મચ્છેરમલેન પરિયાદિન્નચિત્તા કસ્સચિ કિઞ્ચિ અદત્વા સઞ્ચિનિમ્હ. સમેન વિસમેન ચાતિ ઞાયેન ચ અઞ્ઞાયેન ચ, ઞાયપતિરૂપકેન વા અઞ્ઞાયેન તે ભોગે અમ્હેહિ સંહરિતે ઇદાનિ અઞ્ઞે પરિભુઞ્જન્તિ. મયં દુક્ખસ્સ ભાગિનીતિ મયં પન કસ્સચિપિ સુચરિતસ્સ અકતત્તા દુચ્ચરિતસ્સ ચ કતત્તા એતરહિ પેતયોનિપરિયાપન્નસ્સ મહતો દુક્ખસ્સ ભાગિનિયો ભવામ, મહાદુક્ખં અનુભવામાતિ અત્થો.

એવં ભગવા તાહિ પેતીહિ વુત્તં ગાથં વત્વા તાસં પવત્તિં કથેત્વા તં અટ્ઠુપ્પત્તિં કત્વા સમ્પત્તપરિસાય ધમ્મં દેસેત્વા ઉપરિ સચ્ચાનિ પકાસેસિ, સચ્ચપરિયોસાને બહૂ સોતાપત્તિફલાદીનિ પાપુણિંસૂતિ.

ભોગસંહરણપેતિવત્થુવણ્ણના નિટ્ઠિતા.