૧૦. ગણપેતવત્થુવણ્ણના

નગ્ગા દુબ્બણ્ણરૂપાત્થાતિ ઇદં સત્થરિ જેતવને વિહરન્તે સમ્બહુલે પેતે આરબ્ભ વુત્તં. સાવત્થિયં કિર સમ્બહુલા મનુસ્સા ગણભૂતા અસ્સદ્ધા અપ્પસન્ના મચ્છેરમલપરિયુટ્ઠિતચિત્તા દાનાદિસુચરિતવિમુખા હુત્વા ચિરં જીવિત્વા કાયસ્સ ભેદા નગરસ્સ સમીપે પેતયોનિયં નિબ્બત્તિંસુ. અથેકદિવસં આયસ્મા મહામોગ્ગલ્લાનો સાવત્થિયં પિણ્ડાય ગચ્છન્તો અન્તરામગ્ગે પેતે દિસ્વા –

૭૮૨. ‘‘નગ્ગા દુબ્બણરૂપાત્થ, કિસા ધમનિસન્થતા;

ઉપ્ફાસુલિકા કિસિકા, કે નુ તુમ્હેત્થ મારિસા’’તિ. –

ગાથાય પુચ્છિ. તત્થ દુબ્બણ્ણરૂપાત્થાતિ દુબ્બણ્ણસરીરા હોથ. કે નુ તુમ્હેત્થાતિ તુમ્હે કે નુ નામ ભવથ. મારિસાતિ તે અત્તનો સારુપ્પવસેન આલપતિ.

તં સુત્વા પેતા –

૭૮૩. ‘‘મયં ભદન્તે પેતમ્હા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા’’તિ. –

ગાથાય અત્તનો પેતભાવં પકાસેત્વા પુન થેરેન –

૭૮૪. ‘‘કિં નુ કાયેન વાચાય, મનસા દુક્કટં કતં;

કિસ્સકમ્મવિપાકેન, પેતલોકં ઇતો ગતા’’તિ. –

ગાથાય કતકમ્મં પુચ્છિતા –

૭૮૫. ‘‘અનાવટેસુ તિત્થેસુ, વિચિનિમ્હદ્ધમાસકં;

સન્તેસુ દેય્યધમ્મેસુ, દીપં નાકમ્હ અત્તનો.

૭૮૬. ‘‘નદિં ઉપેમ તસિતા, રિત્તકા પરિવત્તતિ;

છાયં ઉપેમ ઉણ્હેસુ, આતપો પરિવત્તતિ.

૭૮૭. ‘‘અગ્ગિવણ્ણો ચ નો વાતો, ડહન્તો ઉપવાયતિ;

એતઞ્ચ ભન્તે અરહામ, અઞ્ઞઞ્ચ પાપકં તતો.

૭૮૮. ‘‘અપિ યોજનાનિ ગચ્છામ, છાતા આહારગેધિનો;

અલદ્ધાવ નિવત્તામ, અહો નો અપ્પપુઞ્ઞતા.

૭૮૯. ‘‘છાતા પમુચ્છિતા ભન્તા, ભૂમિયં પટિસુમ્ભિતા;

ઉત્તાના પટિકિરામ, અવકુજ્જા પતામસે.

૭૯૦. ‘‘તે ચ તત્થેવ પતિતા, ભૂમિયં પટિસુમ્ભિતા;

ઉરં સીસઞ્ચ ઘટ્ટેમ, અહો નો અપ્પપુઞ્ઞતા.

૭૯૧. ‘‘એતઞ્ચ ભન્તે અરહામ, અઞ્ઞઞ્ચ પાપકં તતો;

સન્તેસુ દેય્યધમ્મેસુ, દીપં નાકમ્હ અત્તનો.

૭૯૨. ‘‘તે હિ નૂન ઇતો ગન્ત્વા, યોનિં લદ્ધાન માનુસિં;

વદઞ્ઞૂ સીલસમ્પન્ના, કાહામ કુસલં બહુ’’ન્તિ. –

અત્તના કતકમ્મં કથેસું.

૭૮૮. તત્થ અપિ યોજનાનિ ગચ્છામાતિ અનેકાનિપિ યોજનાનિ ગચ્છામ. કથં? છાતા આહારગેધિનોતિ, ચિરકાલં જિઘચ્છાય જિઘચ્છિતા આહારે ગિદ્ધા અભિગિજ્ઝન્તા હુત્વા, એવં ગન્ત્વાપિ કિઞ્ચિ આહારં અલદ્ધાયેવ નિવત્તામ. અપ્પપુઞ્ઞતાતિ અપુઞ્ઞતા અકતકલ્યાણતા.

૭૮૯. ઉત્તાના પટિકિરામાતિ કદાચિ ઉત્તાના હુત્વા વિકિરિયમાનઙ્ગપચ્ચઙ્ગા વિય વત્તામ. અવકુજ્જા પતામસેતિ કદાચિ અવકુજ્જા હુત્વા પતામ.

૭૯૦. તે ચાતિ તે મયં. ઉરં સીસઞ્ચ ઘટ્ટેમાતિ અવકુજ્જા હુત્વા પતિતા ઉટ્ઠાતું અસક્કોન્તા વેધન્તા વેદનાપ્પત્તા અત્તનો અત્તનો ઉરં સીસઞ્ચ પટિઘંસામ. સેસં હેટ્ઠા વુત્તનયમેવ.

થેરો તં પવત્તિં ભગવતો આરોચેસિ. ભગવા તમત્થં અટ્ઠુપ્પત્તિં કત્વા સમ્પત્તપરિસાય ધમ્મં દેસેસિ. તં સુત્વા મહાજનો મચ્છેરમલં પહાય દાનાદિસુચરિતનિરતો અહોસીતિ.

ગણપેતવત્થુવણ્ણના નિટ્ઠિતા.