૨. સાણવાસિત્થેરપેતવત્થુવણ્ણના

કુણ્ડિનાગરિયો થેરોતિ ઇદં સત્થરિ વેળુવને વિહરન્તે આયસ્મતો સાણવાસિત્થેરસ્સ ઞાતિપેતે આરબ્ભ વુત્તં. અતીતે કિર બારાણસિયં કિતવસ્સ નામ રઞ્ઞો પુત્તો ઉય્યાનકીળં કીળિત્વા નિવત્તન્તો સુનેત્તં નામ પચ્ચેકબુદ્ધં પિણ્ડાય ચરિત્વા નગરતો નિક્ખમન્તં દિસ્વા ઇસ્સરિયમદમત્તો હુત્વા ‘‘કથઞ્હિ નામ મય્હં અઞ્જલિં અકત્વા અયં મુણ્ડકો ગચ્છતી’’તિ પદુટ્ઠચિત્તો હત્થિક્ખન્ધતો ઓતરિત્વા ‘‘કચ્ચિ તે પિણ્ડપાતો લદ્ધો’’તિ આલપન્તો હત્થતો પત્તં ગહેત્વા પથવિયં પાતેત્વા ભિન્દિ. અથ નં સબ્બત્થ તાદિભાવપ્પત્તિયા નિબ્બિકારં કરુણાવિપ્ફારસોમનસ્સનિપાતપસન્નચિત્તમેવ ઓલોકેન્તં અટ્ઠાનાઘાતેન દૂસિતચિત્તો ‘‘કિં મં કિતવસ્સ રઞ્ઞો પુત્તં ન જાનાસિ, ત્વં ઓલોકયન્તો મય્હં કિં કરિસ્સસી’’તિ વત્વા અવહસન્તો પક્કામિ. પક્કન્તમત્તસ્સેવ ચસ્સ નરકગ્ગિદાહપટિભાગો બલવસરીરદાહો ઉપ્પજ્જિ. સો તેન મહાસન્તાપેનાભિભૂતકાયો અતિબાળ્હં દુક્ખવેદનાભિતુન્નો કાલં કત્વા અવીચીમહાનિરયે નિબ્બત્તિ.

સો તત્થ દક્ખિણપસ્સેન વામપસ્સેન ઉત્તાનો અવકુજ્જોતિ બહૂહિ પકારેહિ પરિવત્તિત્વા ચતુરાસીતિ વસ્સસહસ્સાનિ પચ્ચિત્વા તતો ચુતો પેતેસુ અપિરિમિતકાલં ખુપ્પિપાસાદિદુક્ખં અનુભવિત્વા તતો ચુતો ઇમસ્મિં બુદ્ધુપ્પાદે કુણ્ડિનગરસ્સ સમીપે કેવટ્ટગામે નિબ્બત્તિ. તસ્સ જાતિસ્સરઞાણં ઉપ્પજ્જિ, તેન સો પુબ્બે અત્તના અનુભૂતપુબ્બં દુક્ખં અનુસ્સરન્તો વયપ્પત્તોપિ પાપભયેન ઞાતકેહિપિ સદ્ધિં મચ્છબન્ધનત્થં ન ગચ્છતિ. તેસુ ગચ્છન્તેસુ મચ્છે ઘાતેતું અનિચ્છન્તો નિલીયતિ, ગતો ચ જાલં ભિન્દતિ, જીવન્તે વા મચ્છે ગહેત્વા ઉદકે વિસ્સજ્જેતિ, તસ્સ તં કિરિયં અરોચન્તા ઞાતકા ગેહતો તં નીહરિંસુ. એકો પનસ્સ ભાતા સિનેહબદ્ધહદયો અહોસિ.

તેન ચ સમયેન આયસ્મા આનન્દો કુણ્ડિનગરં ઉપનિસ્સાય સાણપબ્બતે વિહરતિ. અથ સો કેવટ્ટપુત્તો ઞાતકેહિ પરિચ્ચત્તો હુત્વા ઇતો ચિતો ચ પરિબ્ભમન્તો તં પદેસં પત્તો ભોજનવેલાય થેરસ્સ સન્તિકં ઉપસઙ્કમિ. થેરો તં પુચ્છિત્વા ભોજનેન અત્થિકભાવં ઞત્વા તસ્સ ભત્તં દત્વા કતભત્તકિચ્ચો સબ્બં તં પવત્તિં ઞત્વા ધમ્મકથાય પસન્નમાનસં ઞત્વા ‘‘પબ્બજિસ્સસિ, આવુસો’’તિ? ‘‘આમ, ભન્તે, પબ્બજિસ્સામી’’તિ. થેરો તં પબ્બાજેત્વા તેન સદ્ધિં ભગવતો સન્તિકં અગમાસિ. અથ નં સત્થા આહ – ‘‘આનન્દ, ઇમં સામણેરં અનુકમ્પેય્યાસી’’તિ. સો ચ અકતકુસલત્તા અપ્પલાભો અહોસિ. અથ નં સત્થા અનુગ્ગણ્હન્તો ભિક્ખૂનં પરિભોગત્થાય પાનીયઘટાનં પરિપૂરણે નિયોજેસિ. તં દિસ્વા ઉપાસકા તસ્સ બહૂનિ નિચ્ચભત્તાનિ પટ્ઠપેસું.

સો અપરેન સમયેન લદ્ધૂપસમ્પદો અરહત્તં પત્વા થેરો હુત્વા દ્વાદસહિ ભિક્ખૂહિ સદ્ધિં સાણપબ્બતે વસિ. તસ્સ પન ઞાતકા પઞ્ચસતમત્તા અનુપચિતકુસલકમ્મા ઉપચિતમચ્છેરાદિપાપધમ્મા કાલં કત્વા પેતેસુ નિબ્બત્તિંસુ. તસ્સ પન માતાપિતરો ‘‘એસ અમ્હેહિ પુબ્બે ગેહતો નિક્કડ્ઢિતો’’તિ સારજ્જમાના તં અનુપસઙ્કમિત્વા તસ્મિં બદ્ધસિનેહં ભાતિકં પેસેસું. સો થેરસ્સ ગામં પિણ્ડાય પવિટ્ઠસમયે દક્ખિણજાણુમણ્ડલં પથવિયં પતિટ્ઠાપેત્વા કતઞ્જલી અત્તાનં દસ્સેત્વા ‘‘માતા પિતા ચ તે, ભન્તે’’તિઆદિગાથા અવોચ. કુણ્ડિનાગરિયો થેરોતિઆદયો પન આદિતો પઞ્ચ ગાથા તાસં સમ્બન્ધદસ્સનત્થં ધમ્મસઙ્ગાહકેહિ ઠપિતા.

૪૦૮. ‘‘કુણ્ડિનાગરિયો થેરો, સાણવાસિનિવાસિકો;

પોટ્ઠપાદોતિ નામેન, સમણો ભાવિતિન્દ્રિયો.

૪૦૯. ‘‘તસ્સ માતા પિતા ભાતા, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૪૧૦. ‘‘તે દુગ્ગતા સૂચિકટ્ટા, કિલન્તા નગ્ગિનો કિસા;

ઉત્તસન્તા મહત્તાસા, ન દસ્સેન્તિ કુરૂરિનો.

૪૧૧. ‘‘તસ્સ ભાતા વિતરિત્વા, નગ્ગો એકપથેકકો;

ચતુકુણ્ડિકો ભવિત્વાન, થેરસ્સ દસ્સયીતુમં.

૪૧૨. ‘‘થેરો ચામનસિકત્વા, તુણ્હીભૂતો અતિક્કમિ;

સો ચ વિઞ્ઞાપયી થેરં, ‘ભાતા પેતગતો અહં’.

૪૧૩. ‘‘માતા પિતા ચ તે ભન્તે, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૪૧૪. ‘‘તેન દુગ્ગતા સૂચિકટ્ટા, કિલન્તા નગ્ગિનો કિસા;

ઉત્તસન્તા મહત્તાસા, ન દસ્સેન્તિ કુરૂરિનો.

૪૧૫. ‘‘અનુકમ્પસ્સુ કારુણિકો, દત્વા અન્વાદિસાહિ નો;

તવ દિન્નેન દાનેન, યાપેસ્સન્તિ કુરૂરિનો’’તિ.

૪૦૮-૯. તત્થ કુણ્ડિનાગરિયો થેરોતિ એવંનામકે નગરે જાતસંવડ્ઢત્થેરો, ‘‘કુણ્ડિકનગરો થેરો’’તિપિ પાઠો, સો એવત્થો. સાણવાસિનિવાસિકોતિ સાણપબ્બતવાસી. પોટ્ઠપાદોતિ નામેનાતિ નામેન પોટ્ઠપાદો નામ. સમણોતિ સમિતપાપો. ભાવિતિન્દ્રિયોતિ અરિયમગ્ગભાવનાય ભાવિતસદ્ધાદિઇન્દ્રિયો, અરહાતિ અત્થો. તસ્સાતિ તસ્સ સાણવાસિત્થેરસ્સ. દુગ્ગતાતિ દુગ્ગતિગતા.

૪૧૦. સૂચિકટ્ટાતિ પૂતિના લૂખગત્તા અટ્ટકા, સૂચિકાતિ લદ્ધનામાય ખુપ્પિપાસાય અટ્ટા પીળિતા. ‘‘સૂચિકણ્ઠા’’તિ કેચિ પઠન્તિ, સૂચિછિદ્દસદિસમુખદ્વારાતિ અત્થો. કિલન્તાતિ કિલન્તકાયચિત્તા. નગ્ગિનોતિ નગ્ગરૂપા નિચ્ચોળા. કિસાતિ અટ્ઠિત્તચમત્તસરીરતાય કિસદેહા. ઉત્તસન્તાતિ ‘‘અયં સમણો અમ્હાકં પુત્તો’’તિ ઓત્તપ્પેન ઉત્રાસં આપજ્જન્તા. મહત્તાસાતિ અત્તના પુબ્બે કતકમ્મં પટિચ્ચ સઞ્જાતમહાભયા. ન દસ્સેન્તીતિ અત્તાનં ન દસ્સેન્તિ, સમ્મુખીભાવં ન ગચ્છન્તિ. કુરૂરિનોતિ દારુણકમ્મન્તા.

૪૧૧. તસ્સ ભાતાતિ સાણવાસિત્થેરસ્સ ભાતા. વિતરિત્વાતિ વિતિણ્ણો હુત્વા, ઓત્તપ્પસન્તાસભયાતિ અત્થો. વિતુરિત્વાતિ વા પાઠો, તુરિતો હુત્વા, તરમાનરૂપો હુત્વાતિ વુત્તં હોતિ. એકપથેતિ એકપદિકમગ્ગે. એકકોતિ એકિકો અદુતિયો. ચતુકુણ્ડિકો ભવિત્વાનાતિ ચતૂહિ અઙ્ગેહિ કુણ્ડેતિ અત્તભાવં પવત્તેતીતિ ચતુકુણ્ડિકો, દ્વીહિ જાણૂહિ દ્વીહિ હત્થેહિ ગચ્છન્તો તિટ્ઠન્તો ચ, એવંભૂતો હુત્વાતિ અત્થો. સો હિ એવં પુરતો કોપીનપટિચ્છાદના હોતીતિ તથા અકાસિ. થેરસ્સ દસ્સયીતુમન્તિ થેરસ્સ અત્તાનં ઉદ્દિસયિ દસ્સેસિ.

૪૧૨. અમનસિકત્વાતિ ‘‘અયં નામ એસો’’તિ એવં મનસિ અકરિત્વા અનાવજ્જેત્વા. સો ચાતિ સો પેતો. ભાતા પેતગતો અહન્તિ ‘‘અહં અતીતત્તભાવે ભાતા, ઇદાનિ પેતભૂતો ઇધાગતો’’તિ વત્વા વિઞ્ઞાપયિ થેરન્તિ યોજના.

૪૧૩-૫. યથા પન વિઞ્ઞાપયિ, તં દસ્સેતું ‘‘માતા પિતા ચા’’તિઆદિના તિસ્સો ગાથા વુત્તા. તત્થ માતા પિતા ચ તેતિ તવ માતા ચ પિતા ચ. અનુકમ્પસ્સૂતિ અનુગ્ગણ્હ અનુદયં કરોહિ. અન્વાદિસાહીતિ આદિસ. નોતિ અમ્હાકં. તવ દિન્નેનાતિ તયા દિન્નેન.

તં સુત્વા થેરો યથા પટિપજ્જિ, તં દસ્સેતું –

૪૧૬. ‘‘થેરો ચરિત્વા પિણ્ડાય, ભિક્ખૂ અઞ્ઞે ચ દ્વાદસ;

એકજ્ઝં સન્નિપતિંસુ, ભત્તવિસ્સગ્ગકારણા.

૪૧૭. ‘‘થેરો સબ્બેવ તે આહ, યથાલદ્ધં દદાથ મે;

સઙ્ઘભત્તં કરિસ્સામિ, અનુકમ્પાય ઞાતિનં.

૪૧૮. ‘‘નિય્યાદયિંસુ થેરસ્સ, થેરો સઙ્ઘં નિમન્તયિ;

દત્વા અન્વાદિસિ થેરો, માતુ પિતુ ચ ભાતુનો;

‘ઇદં મે ઞાતીનં હોતુ, સુખિતા હોન્તુ ઞાતયો’.

૪૧૯. ‘‘સમનન્તરાનુદ્દિટ્ઠે, ભોજનં ઉદપજ્જથ;

સુચિં પણીતં સમ્પન્નં, અનેકરસબ્યઞ્જનં.

૪૨૦. ‘‘તતો ઉદ્દસ્સયી ભાતા, વણ્ણવા બલવા સુખી;

પહૂતં ભોજનં ભન્તે, પસ્સ નગ્ગામ્હસે મયં;

તથા ભન્તે પરક્કમ, યથા વત્થં લભામસે.

૪૨૧. ‘‘થેરો સઙ્કારકૂટમ્હા, ઉચ્ચિનિત્વાન નન્તકે;

પિલોતિકં પટં કત્વા, સઙ્ઘે ચાતુદ્દિસે અદા.

૪૨૨. ‘‘દત્વા અન્વાદિસી થેરો, માતુ પિતુ ચ ભાતુનો;

‘ઇદં મે ઞાતીનં હોતુ, સુખિતા હોન્તુ ઞાતયો’.

૪૨૩. ‘‘સમનન્તરાનુદ્દિટ્ઠે, વત્થાનિ ઉદપજ્જિસું;

તતો સુવત્થવસનો, થેરસ્સ દસ્સયીતુમં.

૪૨૪. ‘‘યાવતા નન્દરાજસ્સ, વિજિતસ્મિં પટિચ્છદા;

તતો બહુતરા ભન્તે, વત્થાનચ્છાદનાનિ નો.

૪૨૫. ‘‘કોસેય્યકમ્બલીયાનિ, ખોમકપ્પાસિકાનિ ચ;

વિપુલા ચ મહગ્ઘા ચ, તેપાકાસેવલમ્બરે.

૪૨૬. ‘‘તે મયં પરિદહામ, યં યઞ્હિ મનસો પિયં;

તથા ભન્તે પરક્કમ, યથા ગેહં લભામસે.

૪૨૭. ‘‘થેરો પણ્ણકુટિં કત્વા, સઙ્ઘે ચાતુદ્દિસે અદા;

દત્વા ચ અન્વાદિસી થેરો, માતુ પિતુ ચ ભાતુનો;

‘ઇદં મે ઞાતીનં હોતુ, સુખિતા હોન્તુ ઞાતયો’.

૪૨૮. ‘‘સમનન્તરાનુદ્દિટ્ઠે, ઘરાનિ ઉદપજ્જિસું;

કૂટાગારનિવેસના, વિભત્તા ભાગસો મિતા.

૪૨૯. ‘‘ન મનુસ્સેસુ ઈદિસા, યાદિસા નો ઘરા ઇધ;

અપિ દિબ્બેસુ યાદિસા, તાદિસા નો ઘરા ઇધ.

૪૩૦. ‘‘દદ્દલ્લમાના આભેન્તિ, સમન્તા ચતુરો દિસા;

તથા ભન્તે પરક્કમ, યથા પાનીયં લભામસે.

૪૩૧. ‘‘થેરો કરણં પૂરેત્વા, સઙ્ઘે ચાતુદ્દિસે અદા;

દત્વા અન્વાદિસી થેરો, માતુ પિતુ ચ ભાતુનો;

‘ઇદં મે ઞાતીનં હોતુ, સુખિતા હોન્તુ ઞાતયો’.

૪૩૨. ‘‘સમનન્તરાનુદ્દિટ્ઠે, પાનીયં ઉદપજ્જથ;

ગમ્ભીરા ચતુરસ્સા ચ, પોક્ખરઞ્ઞો સુનિમ્મિતા.

૪૩૩. ‘‘સીતોદિકા સુપ્પતિત્થા, સીતા અપ્પટિગન્ધિયા;

પદુમુપ્પલસઞ્છન્ના, વારિકિઞ્જક્ખપૂરિતા.

૪૩૪. ‘‘તત્થ ન્હત્વા પિવિત્વા ચ, થેરસ્સ પટિદસ્સયું;

પહૂતં પાનીયં ભન્તે, પાદા દુક્ખા ફલન્તિ નો.

૪૩૫. ‘‘આહિણ્ડમાના ખઞ્જામ, સક્ખરે કુસકણ્ટકે;

તથા ભન્તે પરક્કમ, યથા યાનં લભામસે.

૪૩૬. ‘‘થેરો સિપાટિકં લદ્ધા, સઙ્ઘે ચાતુદ્દિસે અદા;

દત્વા અન્વાદિસી થેરો, માતુ પિતુ ચ ભાતુનો;

‘ઇદં મે ઞાતીનં હોતુ, સુખિતા હોન્તુ ઞાતયો’.

૪૩૭. ‘‘સમનન્તરાનુદ્દિટ્ઠે, પેતા રથેન માગમું;

અનુકમ્પિતમ્હ ભદન્તે, ભત્તેનચ્છાદનેન ચ.

૪૩૮. ‘‘ઘરેન પાનીયદાનેન, યાનદાનેન ચૂભયં;

મુનિં કારુણિકં લોકે, ભન્તે વન્દિતુમાગતા’’તિ. – ગાથાયો આહંસુ;

૪૧૬-૭. તત્થ થેરો ચરિત્વા પિણ્ડાયાતિ થેરો પિણ્ડાપાતચારિકાય ચરિત્વા. ભિક્ખૂ અઞ્ઞે ચ દ્વાદસાતિ થેરેન સહ વસન્તા અઞ્ઞે ચ દ્વાદસ ભિક્ખૂ એકજ્ઝં એકતો સન્નિપતિંસુ. કસ્માતિ ચે? ભત્તવિસ્સગ્ગકારણાતિ ભત્તકિચ્ચકારણા ભુઞ્જનનિમિત્તં. તેતિ તે ભિક્ખૂ. યથાલદ્ધન્તિ યં યં લદ્ધં. દદાથાતિ દેથ.

૪૧૮. નિય્યાદયિંસૂતિ અદંસુ. સઙ્ઘં નિમન્તયીતિ તે એવ દ્વાદસ ભિક્ખૂ સઙ્ઘુદ્દેસવસેન તં ભત્તં દાતું નિમન્તેસિ. અન્વાદિસીતિ આદિસિ. તત્થ યેસં અન્વાદિસિ, તે દસ્સેતું ‘‘માતુ પિતુ ચ ભાતુનો, ઇદં મે ઞાતીનં હોતુ, સુખિતા હોન્તુ ઞાતયો’’તિ વુત્તં.

૪૧૯. સમનન્તરાનુદ્દિટ્ઠેતિ ઉદ્દિટ્ઠસમનન્તરમેવ. ભોજનં ઉદપજ્જથાતિ તેસં પેતાનં ભોજનં ઉપ્પજ્જિ. કીદિસન્તિ આહ ‘‘સુચિ’’ન્તિઆદિ. તત્થ અનેકરસબ્યઞ્જનન્તિ નાનારસેહિ બ્યઞ્જનેહિ યુત્તં, અથ વા અનેકરસં અનેકબ્યઞ્જનઞ્ચ. તતોતિ ભોજનલાભતો પચ્છા.

૪૨૦. ઉદ્દસ્સયી ભાતાતિ ભાતિકભૂતો પેતો થેરસ્સ અત્તાનં દસ્સેસિ. વણ્ણવા બલવા સુખીતિ તેન ભોજનલાભેન તાવદેવ રૂપસમ્પન્નો બલસમ્પન્નો સુખિતોવ હુત્વા. પહૂતં ભોજનં, ભન્તેતિ, ભન્તે, તવ દાનાનુભાવેન પહૂતં અનપ્પકં ભોજનં અમ્હેહિ લદ્ધં. પસ્સ નગ્ગામ્હસેતિ ઓલોકેહિ, નગ્ગિકા પન અમ્હ, તસ્મા તથા, ભન્તે, પરક્કમ પયોગં કરોહિ. યથા વત્થં લભામસેતિ યેન પકારેન યાદિસેન પયોગેન સબ્બેવ મયં વત્થાનિ લભેય્યામ, તથા વાયમથાતિ અત્થો.

૪૨૧. સઙ્કારકૂટમ્હાતિ તત્થ તત્થ સઙ્કારટ્ઠાનતો. ઉચ્ચિનિત્વાનાતિ ગવેસનવસેન ગહેત્વા. નન્તકેતિ છિન્નપરિયન્તે છડ્ડિતદુસ્સખણ્ડે. તે પન યસ્મા ખણ્ડભૂતા પિલોતિકા નામ હોન્તિ, તાહિ ચ થેરો ચીવરં કત્વા સઙ્ઘસ્સ અદાસિ, તસ્મા આહ ‘‘પિલોતિકં પટં કત્વા, સઙ્ઘે ચાતુદ્દિસે અદા’’તિ. તત્થ સઙ્ઘે ચાતુદ્દિસે અદાતિ ચતૂહિપિ દિસાહિ આગતભિક્ખુસઙ્ઘસ્સ અદાસિ. સમ્પદાનત્થે હિ ઇદં ભુમ્મવચનં.

૪૨૩-૪. સુવત્થવસનોતિ સુન્દરવત્થવસનો. થેરસ્સ દસ્સયીતુમન્તિ થેરસ્સ અત્તાનં દસ્સયિ દસ્સેસિ, પાકટો અહોસિ. પટિચ્છાદયતિ એત્થાતિ પટિચ્છદા.

૪૨૮-૯. કૂટાગારનિવેસનાતિ કૂટાગારભૂતા તદઞ્ઞનિવેસનસઙ્ખાતા ચ ઘરા. લિઙ્ગવિપલ્લાસવસેન હેતં વુત્તં. વિભત્તાતિ સમચતુરસ્સઆયતવટ્ટસણ્ઠાનાદિવસેન વિભત્તા. ભાગસો મિતાતિ ભાગેન પરિચ્છિન્ના. નોતિ અમ્હાકં. ઇધાતિ ઇમસ્મિં પેતલોકે. અપિ દિબ્બેસૂતિ અપીતિ નિપાતમત્તં, દેવલોકેસૂતિ અત્થો.

૪૩૧. કરણન્તિ ધમકરણં. પૂરેત્વાતિ ઉદકસ્સ પૂરેત્વા. વારિકિઞ્જક્ખપૂરિતાતિ તત્થ તત્થ વારિમત્થકે પદુમુપ્પલાદીનં કેસરભારેહિ સઞ્છાદિતવસેન પૂરિતા. ફલન્તીતિ પુપ્ફન્તિ, પણ્હિકપરિયન્તાદીસુ વિદાલેન્તીતિ અત્થો.

૪૩૫-૬. આહિણ્ડમાનાતિ વિચરમાના. ખઞ્જામાતિ ખઞ્જનવસેન ગચ્છામ. સક્ખરે કુસકણ્ટકેતિ સક્ખરવતિ કુસકણ્ટકવતિ ચ ભૂમિભાગે, સક્ખરે કુસકણ્ટકે ચ અક્કમન્તાતિ અત્થો. યાનન્તિ રથવય્હાદિકં યંકિઞ્ચિ યાનં. સિપાટિકન્તિ એકપટલઉપાહનં.

૪૩૭-૮. રથેન માગમુન્તિ મકારો પદસન્ધિકરો, રથેન આગમંસુ. ઉભયન્તિ ઉભયેન દાનેન, યાનદાનેન ચેવ ભત્તાદિચતુપચ્ચયદાનેન ચ. પાનીયદાનેન હેત્થ ભેસજ્જદાનમ્પિ સઙ્ગહિતં. સેસં હેટ્ઠા વુત્તનયત્તા ઉત્તાનમેવાતિ.

થેરો તં પવત્તિં ભગવતો આરોચેસિ. ભગવા તમત્થં અટ્ઠુપ્પત્તિં કત્વા ‘‘યથા ઇમે એતરહિ, એવં ત્વમ્પિ ઇતો અનન્તરાતીતે અત્તભાવે પેતો હુત્વા મહાદુક્ખં અનુભવી’’તિ વત્વા થેરેન યાચિતો સુત્તપેતવત્થું કથેત્વા સમ્પત્તપરિસાય ધમ્મં દેસેસિ. તં સુત્વા મહાજનો સઞ્જાતસંવેગો દાનસીલાદિપુઞ્ઞકમ્મનિરતો અહોસીતિ.

સાણવાસિત્થેરપેતવત્થુવણ્ણના નિટ્ઠિતા.