૭. સત્તપુત્તખાદકપેતિવત્થુવણ્ણના

નગ્ગા દુબ્બણ્ણરૂપાસીતિ ઇદં સત્થરિ સાવત્થિયં વિહરન્તે સત્તપુત્તખાદકપેતિં આરબ્ભ વુત્તં. સાવત્થિયા કિર અવિદૂરે અઞ્ઞતરસ્મિં ગામકે અઞ્ઞતરસ્સ ઉપાસકસ્સ દ્વે પુત્તા અહેસું – પઠમવયે ઠિતા રૂપસમ્પન્ના સીલાચારેન સમન્નાગતા. તેસં માતા ‘‘પુત્તવતી અહ’’ન્તિ પુત્તબલેન ભત્તારં અતિમઞ્ઞતિ. સો ભરિયાય અવમાનિતો નિબ્બિન્નમાનસો અઞ્ઞં કઞ્ઞં આનેસિ. સા નચિરસ્સેવ ગબ્ભિની અહોસિ. અથસ્સ જેટ્ઠભરિયા ઇસ્સાપકતા અઞ્ઞતરં વેજ્જં આમિસેન ઉપલાપેત્વા તેન તસ્સા તેમાસિકં ગબ્ભં પાતેસિ. અથ સા ઞાતીહિ ચ ભત્તારા ચ ‘‘તયા ઇમિસ્સા ગબ્ભો પાતિતો’’તિ પુટ્ઠા ‘‘નાહં પાતેમી’’તિ મુસા વત્વા તેહિ અસદ્દહન્તેહિ ‘‘સપથં કરોહી’’તિ વુત્તા ‘‘સાયં પાતં સત્ત સત્ત પુત્તે વિજાયિત્વા પુત્તમંસાનિ ખાદામિ, નિચ્ચં દુગ્ગન્ધા ચ મક્ખિકાપરિકિણ્ણા ચ ભવેય્ય’’ન્તિ સપથં અકાસિ.

સા અપરેન સમયેન કાલં કત્વા તસ્સ ગબ્ભપાતનસ્સ મુસાવાદસ્સ ચ ફલેનેવ પેતયોનિયં નિબ્બત્તિત્વા પુત્તનયેન પુત્તમંસાનિ ખાદન્તી તસ્સેવ ગામસ્સ અવિદૂરે વિચરતિ. તેન ચ સમયેન સમ્બહુલા થેરા ગામકાવાસે વુત્થવસ્સા ભગવન્તં દસ્સનાય સાવત્થિં આગચ્છન્તા તસ્સ ગામસ્સ અવિદૂરે એકસ્મિં પદેસે રત્તિયં વાસં કપ્પેસું. અથ સા પેતી તેસં થેરાનં અત્તાનં દસ્સેસિ. તં મહાથેરો ગાથાય પુચ્છિ –

૩૫. ‘‘નગ્ગા દુબ્બણ્ણરૂપાસિ, દુગ્ગન્ધા પૂતિ વાયસિ;

મક્ખિકાહિ પરિકિણ્ણા, કા નુ ત્વં ઇધ તિટ્ઠસી’’તિ.

સા થેરેન પુટ્ઠા તીહિ ગાથાહિ પટિવચનં અદાસિ –

૩૬. ‘‘અહં ભદન્તે પેતીમ્હિ, દુગ્ગતા યમલોકિકા;

પાપકમ્મં કરિત્વાન, પેતલોકં ઇતો ગતા.

૩૭. ‘‘કાલેન સત્ત પુત્તાનિ, સાયં સત્ત પુનાપરે;

વિજાયિત્વાન ખાદામિ, તેપિ ના હોન્તિ મે અલં.

૩૮. ‘‘પરિડય્હતિ ધૂમાયતિ, ખુદાય હદયં મમ;

નિબ્બુતિં નાધિગચ્છામિ, અગ્ગિદડ્ઢાવ આતપે’’તિ.

૩૮. તત્થ નિબ્બુતિન્તિ ખુપ્પિપાસાદુક્ખસ્સ વૂપસમં. નાધિગચ્છામીતિ ન લભામિ. અગ્ગિદડ્ઢાવ આતપેતિ અતિઉણ્હઆતપે અગ્ગિના ડય્હમાના વિય નિબ્બુતિં નાધિગચ્છામીતિ યોજના.

તં સુત્વા મહાથેરો તાય કતકમ્મં પુચ્છન્તો –

૩૯. ‘‘કિં નુ કાયેન વાચાય, મનસા દુક્કટં કતં;

કિસ્સકમ્મવિપાકેન, પુત્તમંસાનિ ખાદસી’’તિ. – ગાથમાહ;

અથ સા પેતી અત્તનો પેતલોકૂપપત્તિઞ્ચ પુત્તમંસખાદનકારણઞ્ચ કથેન્તી –

૪૦. ‘‘અહૂ મય્હં દુવે પુત્તા, ઉભો સમ્પત્તયોબ્બના;

સાહં પુત્તબલૂપેતા, સામિકં અતિમઞ્ઞિસં.

૪૧. ‘‘તતો મે સામિકો કુદ્ધો, સપતિં મય્હમાનયિ;

સા ચ ગબ્ભં અલભિત્થ, તસ્સા પાપં અચેતયિં.

૪૨. ‘‘સાહં પદુટ્ઠમનસા, અકરિં ગબ્ભપાતનં;

તસ્સ તેમાસિકો ગબ્ભો, પૂતિલોહિતકો પતિ.

૪૩. ‘‘તદસ્સા માતા કુપિતા, મય્હં ઞાતી સમાનયિ;

સપથઞ્ચ મં કારેસિ, પરિભાસાપયી ચ મં.

૪૪. ‘‘સાહં ઘોરઞ્ચ સપથં, મુસાવાદં અભાસિસં;

‘પુત્તમંસાનિ ખાદામિ, સચે તં પકતં મયા’.

૪૫. ‘‘તસ્સ કમ્મસ્સ વિપાકેન, મુસાવાદસ્સ ચૂભયં;

પુત્તમંસાનિ ખાદામિ, પુબ્બલોહિતમક્ખિતા’’તિ. – ઇમા ગાથા અભાસિ;

૪૦-૪૫. તત્થ પુત્તબલૂપેતાતિ પુત્તબલેન ઉપેતા, પુત્તાનં વસેન લદ્ધબલા. અતિમઞ્ઞિસન્તિ અતિક્કમિત્વા મઞ્ઞિં અવમઞ્ઞિં. પૂતિલોહિતકો પતીતિ કુણપલોહિતં હુત્વા ગબ્ભો પરિપતિ. સેસં સબ્બં અનન્તરસદિસમેવ. તત્થ અટ્ઠ થેરા, ઇધ સમ્બહુલા. તત્થ પઞ્ચ પુત્તા, ઇધ સત્તાતિ અયમેવ વિસેસોતિ.

સત્તપુત્તખાદકપેતિવત્થુવણ્ણાના નિટ્ઠિતા.