૧૦. વેવચનહારસમ્પાતવણ્ણના

૭૨. ‘‘માનસં હદયં પણ્ડરં વિઞ્ઞાણં વિઞ્ઞાણક્ખન્ધો મનોવિઞ્ઞાણધાતૂ’’તિ (ધ. સ. ૬) ચ ચિત્તસ્સ વેવચનં. ‘‘તક્કો વિતક્કો સઙ્કપ્પો અપ્પના બ્યપ્પના ચેતસો અભિનિરોપના’’તિ ચ સમ્માસઙ્કપ્પસ્સ. ‘‘પઞ્ઞા પજાનના વિચયો પવિચયો’’તિઆદિના (ધ. સ. ૧૬) સમ્માદિટ્ઠિયા. ‘‘થિનં થિયના થિયિતત્તં ચિત્તસ્સ અકલ્લતા અકમ્મઞ્ઞતા ઓનાહો પરિનાહો અન્તોસઙ્કોચો’’તિ થિનસ્સ. ‘‘અકલ્લતા અકમ્મઞ્ઞતા કાયાલસિયં સુપ્યં સુપ્યના સુપિતત્ત’’ન્તિ (ધ. સ. ૧૧૬૩) મિદ્ધસ્સ. ‘‘ભિક્ખકો ભિક્ખૂ’’તિઆદિના (પારા. ૪૫) ભિક્ખુપદસ્સ. ‘‘દુગ્ગતિ અપાયો વિનિપાતો વટ્ટદુક્ખં સંસારો’’તિઆદિના દુગ્ગતિયા વેવચનં વેદિતબ્બં.

વેવચનહારસમ્પાતવણ્ણના નિટ્ઠિતા.