૪. અઞ્ઞતરબ્રાહ્મણવત્થુ

ઝાયિન્તિ ઇમં ધમ્મદેસનં સત્થા જેતવને વિહરન્તો અઞ્ઞતરં બ્રાહ્મણં આરબ્ભ કથેસિ.

સો કિર ચિન્તેસિ – ‘‘સત્થા અત્તનો સાવકે, ‘બ્રાહ્મણા’તિ વદતિ, અહઞ્ચમ્હિ જાતિગોત્તેન બ્રાહ્મણો, મમ્પિ નુ ખો એવં વત્તું વટ્ટતી’’તિ. સો સત્થારં ઉપસઙ્કમિત્વા તમત્થં પુચ્છિ. સત્થા ‘‘નાહં જાતિગોત્તમત્તેન બ્રાહ્મણં વદામિ, ઉત્તમત્થં અરહત્તં અનુપ્પત્તમેવ પનેવં વદામી’’તિ વત્વા ઇમં ગાથમાહ –

૩૮૬. ‘‘ઝાયિં વિરજમાસીનં, કતકિચ્ચમનાસવં;

ઉત્તમત્થમનુપ્પત્તં, તમહં બ્રૂમિ બ્રાહ્મણ’’ન્તિ.

તત્થ ઝાયિન્તિ દુવિધેન ઝાનેન ઝાયન્તં કામરજેન વિરજં વને એકકમાસીનં ચતૂહિ મગ્ગેહિ સોળસન્નં કિચ્ચાનં કતત્તા કતકિચ્ચં આસવાનં અભાવેન અનાસવં ઉત્તમત્થં અરહત્તં અનુપ્પત્તં અહં બ્રાહ્મણં વદામીતિ અત્થો.

દેસનાવસાને સો બ્રાહ્મણો સોતાપત્તિફલે પતિટ્ઠહિ, સમ્પત્તાનમ્પિ સાત્થિકા ધમ્મદેસના અહોસીતિ.

અઞ્ઞતરબ્રાહ્મણવત્થુ ચતુત્થં.