૩૫. નટપુત્તકત્થેરવત્થુ

હિત્વાતિ ઇમં ધમ્મદેસનં સત્થા વેળુવને વિહરન્તો એકં નટપુત્તકં આરબ્ભ કથેસિ.

સો કિર એકં નટકીળં કીળયમાનો વિચરન્તો સત્થુ ધમ્મકથં સુત્વા પબ્બજિત્વા અરહત્તં પાપુણિ. તસ્મિં બુદ્ધપ્પમુખેન ભિક્ખુસઙ્ઘેન સદ્ધિં પિણ્ડાય પવિસન્તે ભિક્ખૂ એકં નટપુત્તં કીળન્તં દિસ્વા, ‘‘આવુસો, એસ તયા કીળિતકીળિતં કીળતિ, અત્થિ નુ ખો તે એત્થ સિનેહો’’તિ પુચ્છિત્વા ‘‘નત્થી’’તિ વુત્તે ‘‘અયં, ભન્તે, અભૂતં વત્વા અઞ્ઞં બ્યાકરોતી’’તિ આહંસુ. સત્થા તેસં કથં સુત્વા, ‘‘ભિક્ખવે, મમ પુત્તો સબ્બયોગે અતિક્કન્તો’’તિ વત્વા ઇમં ગાથમાહ –

૪૧૭. ‘‘હિત્વા માનુસકં યોગં, દિબ્બં યોગં ઉપચ્ચગા;

સબ્બયોગવિસંયુત્તં, તમહં બ્રૂમિ બ્રાહ્મણ’’ન્તિ.

તત્થ માનુસકં યોગન્તિ માનુસકં આયુઞ્ચેવ પઞ્ચ કામગુણે ચ. દિબ્બયોગેપિ એસેવ નયો. ઉપચ્ચગાતિ યો માનુસકં યોગં હિત્વા દિબ્બં યોગં અતિક્કન્તો, તં સબ્બેહિ ચતૂહિપિ યોગેહિ વિસંયુત્તં અહં બ્રાહ્મણં વદામીતિ અત્થો.

દેસનાવસાને બહૂ સોતાપત્તિફલાદીનિ પાપુણિંસૂતિ.

નટપુત્તકત્થેરવત્થુ પઞ્ચતિંસતિમં.