૧૪. બહુપુત્તિકત્થેરીવત્થુ
યો ચ વસ્સસતં જીવેતિ ઇમં ધમ્મદેસનં સત્થા જેતવને વિહરન્તો બહુપુત્તિકં થેરિં આરબ્ભ કથેસિ.
સાવત્થિયં કિરેકસ્મિં કુલે સત્ત પુત્તા સત્ત ચ ધીતરો અહેસું. તે સબ્બેપિ વયપ્પત્તા ગેહે પતિટ્ઠહિત્વા અત્તનો ધમ્મતાય સુખપ્પત્તા અહેસું. તેસં અપરેન સમયેન પિતા કાલમકાસિ. મહાઉપાસિકા સામિકે નટ્ઠેપિ ન તાવ કુટુમ્બં વિભજતિ. અથ નં પુત્તા આહંસુ – ‘‘અમ્મ, અમ્હાકં પિતરિ નટ્ઠે તુય્હં કો અત્થો કુટુમ્બેન, કિં મયં તં ઉપટ્ઠાતું ન સક્કોમા’’તિ. સા તેસં કથં સુત્વા તુણ્હી હુત્વા પુનપ્પુનં તેહિ વુચ્ચમાના ‘‘પુત્તા મં પટિજગ્ગિસ્સન્તિ, કિં મે વિસું કુટુમ્બેના’’તિ સબ્બં સાપતેય્યં મજ્ઝે ભિન્દિત્વા અદાસિ. અથ નં કતિપાહચ્ચયેન જેટ્ઠપુત્તસ્સ ભરિયા ‘‘અહો અમ્હાકં, અય્યા, ‘જેટ્ઠપુત્તો મે’તિ દ્વે કોટ્ઠાસે દત્વા વિય ઇમમેવ ગેહં આગચ્છતી’’તિ આહ. સેસપુત્તાનં ભરિયાપિ એવમેવ વદિંસુ. જેટ્ઠધીતરં આદિં કત્વા તાસં ગેહં ગતકાલેપિ નં એવમેવ વદિંસુ. સા અવમાનપ્પત્તા હુત્વા ‘‘કિં ઇમેસં સન્તિકે વુટ્ઠેન, ભિક્ખુની હુત્વા જીવિસ્સામી’’તિ ભિક્ખુનીઉપસ્સયં ગન્ત્વા પબ્બજ્જં યાચિ. તા નં પબ્બાજેસું. સા લદ્ધૂપસમ્પદા હુત્વા બહુપુત્તિકત્થેરીતિ પઞ્ઞાયિ. સા ‘‘અહં મહલ્લકકાલે પબ્બજિતા, અપ્પમત્તાય મે ભવિતબ્બ’’ન્તિ ભિક્ખુનીનં વત્તપટિવત્તં કરોન્તી ‘‘સબ્બરત્તિં સમણધમ્મં કરિસ્સામી’’તિ હેટ્ઠાપાસાદે એકં થમ્ભં હત્થેન ગહેત્વા તં આવિઞ્છમાનાવ સમણધમ્મં કરોતિ, ચઙ્કમમાનાપિ ‘‘અન્ધકારટ્ઠાને મે રુક્ખે વા કત્થચિ વા સીસં પટિહઞ્ઞેય્યા’’તિ તં રુક્ખં હત્થેન ગહેત્વા તં આવિઞ્છમાનાવ સમણધમ્મં કરોતિ, ‘‘સત્થારા દેસિતધમ્મમેવ કરિસ્સામી’’તિ ધમ્મં આવજ્જેત્વા ધમ્મં અનુસ્સરમાનાવ સમણધમ્મં કરોતિ. અથ સત્થા ગન્ધકુટિયં નિસિન્નોવ ઓભાસં ફરિત્વા સમ્મુખે નિસિન્નો વિય તાય સદ્ધિં કથેન્તો ‘‘બહુપુત્તિકે મયા દેસિતં ધમ્મં અનાવજ્જેન્તસ્સ અપસ્સન્તસ્સ વસ્સસતં જીવનતો મયા દેસિતં ધમ્મં પસ્સન્તસ્સ મુહુત્તમ્પિ જીવિતં સેય્યો’’તિ વત્વા અનુસન્ધિં ઘટેત્વા ધમ્મં દેસેન્તો ઇમં ગાથમાહ –
૧૧૫. ‘‘યો ચ વસ્સસતં જીવે, અપસ્સં ધમ્મમુત્તમં;
એકાહં જીવિતં સેય્યો, પસ્સતો ધમ્મમુત્તમ’’ન્તિ.
તત્થ ધમ્મમુત્તમન્તિ નવવિધં લોકુત્તરધમ્મં. સો હિ ઉત્તમો ધમ્મો નામ. યો હિ તં ન પસ્સતિ, તસ્સ વસ્સસતમ્પિ જીવનતો તં ધમ્મં પસ્સન્તસ્સ પટિવિજ્ઝન્તસ્સ એકાહમ્પિ એકક્ખણમ્પિ જીવિતં સેય્યોતિ.
ગાથાપરિયોસાને બહુપુત્તિકત્થેરી સહ પટિસમ્ભિદાહિ અરહત્તે પતિટ્ઠહીતિ.
બહુપુત્તિકત્થેરીવત્થુ ચુદ્દસમં.
સહસ્સવગ્ગવણ્ણના નિટ્ઠિતા.
અટ્ઠમો વગ્ગો.
નમો તસ્સ ભગવતો અરહતો સમ્માસમ્બુદ્ધસ્સ