૧૫. પિયદસ્સીબુદ્ધવંસવણ્ણના

સુજાતસ્સ પન અપરભાગે ઇતો અટ્ઠકપ્પસતાધિકસહસ્સકપ્પમત્થકે એકસ્મિં કપ્પે પિયદસ્સી, અત્થદસ્સી, ધમ્મદસ્સીતિ તયો બુદ્ધા નિબ્બત્તિંસુ. તત્થ પિયદસ્સી નામ ભગવા પારમિયો પૂરેત્વા તુસિતપુરે નિબ્બત્તિત્વા તતો ચવિત્વા સુધઞ્ઞવતીનગરે સુદત્તસ્સ નામ રઞ્ઞો અગ્ગમહેસિયા ચન્દસદિસવદનાય ચન્દાદેવિયા નામ કુચ્છિસ્મિં પટિસન્ધિં ગહેત્વા દસન્નં માસાનં અચ્ચયેન વરુણુય્યાને માતુકુચ્છિતો નિક્ખમિ. તસ્સ પન નામગ્ગહણદિવસે લોકસ્સ પિયાનં પાટિહારિયવિસેસાનં દસ્સિતત્તા ‘‘પિયદસ્સી’’ત્વેવ નામમકંસુ. સો નવવસ્સસહસ્સાનિ અગારં અજ્ઝાવસિ. તસ્સ કિર સુનિમ્મલવિમલગિરિબ્રહાનામકા તયો પાસાદા અહેસું. વિમલામહાદેવિપ્પમુખાનિ તેત્તિંસ ઇત્થિસહસ્સાનિ પચ્ચુપટ્ઠિતાનિ અહેસું.

સો ચત્તારિ નિમિત્તાનિ દિસ્વા વિમલાદેવિયા કઞ્ચનવેળે નામ પુત્તે ઉપ્પન્ને આજઞ્ઞરથેન મહાભિનિક્ખમનં નિક્ખમિત્વા પબ્બજિ. એકા ચ નં પુરિસકોટિ અનુપબ્બજિ. સો તેહિ પરિવુતો મહાપુરિસો છ માસે પધાનચરિયં ચરિત્વા વિસાખપુણ્ણમાય વરુણબ્રાહ્મણગામે વસભબ્રાહ્મણસ્સ ધીતાય દિન્નં મધુપાયાસં પરિભુઞ્જિત્વા સાલવને દિવાવિહારં વીતિનામેત્વા સુજાતાજીવકેન દિન્ના અટ્ઠ તિણમુટ્ઠિયો ગહેત્વા કકુધબોધિં ઉપસઙ્કમિત્વા તેપઞ્ઞાસહત્થવિત્થતં તિણસન્થરં સન્થરિત્વા પલ્લઙ્કં આભુજિત્વા સબ્બઞ્ઞુતઞ્ઞાણં પટિવિજ્ઝિત્વા ‘‘અનેકજાતિસંસાર’’ન્તિ ઉદાનં ઉદાનેત્વા તત્થેવ સત્તસત્તાહં વીતિનામેત્વા અત્તના સહ પબ્બજિતાનં અરિયધમ્મપટિવેધસમત્થતં ઞત્વા આકાસેન તત્થ ગન્ત્વા ઉસભવતીનગરસમીપે ઉસભવતુય્યાને ઓતરિત્વા ભિક્ખુકોટિપરિવુતો ધમ્મચક્કં પવત્તેસિ. તદા કોટિસતસહસ્સાનં ધમ્માભિસમયો અહોસિ. અયં પઠમો અભિસમયો.

પુન ઉસભવતિયા નામ નગરસ્સ અવિદૂરે સુદસ્સનપબ્બતે સુદસ્સનો નામ દેવરાજા પટિવસતિ. સો મિચ્છાદિટ્ઠિકો અહોસિ. સકલજમ્બુદીપે પન મનુસ્સા તસ્સ અનુસંવચ્છરં સતસહસ્સગ્ઘનિકં બલિં ઉપસંહરન્તિ. સો સુદસ્સનો દેવરાજા નરરાજેન સદ્ધિં એકાસને નિસીદિત્વા બલિં સમ્પટિચ્છતિ. અથ પિયદસ્સી ભગવા ‘‘તસ્સ સુદસ્સનસ્સ દેવરાજસ્સ તં દિટ્ઠિગતં વિનોદેસ્સામી’’તિ તસ્મિં દેવરાજે યક્ખસમાગમં ગતે તસ્સ ભવનં પવિસિત્વા સિરિસયનં આરુહિત્વા છબ્બણ્ણરંસિયો મુઞ્ચન્તો યુગન્ધરપબ્બતે સરદસમયે સૂરિયો વિય નિસીદિ. તસ્સ પરિવારપરિચારિકા દેવતાયો માલાગન્ધવિલેપનાદીહિ દસબલં પૂજેત્વા પરિવારેત્વા અટ્ઠંસુ.

સુદસ્સનોપિ દેવરાજા યક્ખસમાગમતો આગચ્છન્તો અત્તનો ભવનતો છબ્બણ્ણરસ્મિયો નિચ્છરન્તે દિસ્વા ચિન્તેસિ – ‘‘અઞ્ઞેસુ પન દિવસેસુ મમ ભવનસ્સ એદિસી અનેકરંસિજાલસમુજ્જલવિભૂતિ ન દિટ્ઠપુબ્બા. કો નુ ખો ઇધ પવિટ્ઠો દેવો વા મનુસ્સો વા’’તિ ઓલોકેન્તો ઉદયગિરિસિખરમત્થકે સરદસમયદિવસકરમિવ છબ્બણ્ણરંસિજાલેન અભિજ્જલન્તં નિસિન્નં ભગવન્તં દિસ્વા ચિન્તેસિ – ‘‘અયં મુણ્ડકસમણો મમ પરિવારેન પરિજનેન પરિવુતો વરસયને નિસિન્નો’’તિ કોધાભિભૂતમાનસો – ‘‘હન્દાહં ઇમસ્સ અત્તનો બલં દસ્સેસ્સામી’’તિ ચિન્તેત્વા સકલં તં પબ્બતં એકજાલમકાસિ. ‘‘ઇમિના અગ્ગિજાલેન છારિકાભૂતો મુણ્ડકસમણો’’તિ ઓલોકેન્તો અનેકરંસિજાલવિસરવિપ્ફુરિતવરસરીરં પસન્નવદનવણ્ણસોભં વિપ્પસન્નચ્છવિરાગં દસબલમભિજ્જલન્તં દિસ્વા ચિન્તેસિ – ‘‘અયં સમણો અગ્ગિદાહં સહતિ, હન્દાહં ઇમં સમણં ઉદકોઘેન ઓસાદેત્વા મારેસ્સામી’’તિ અતિગમ્ભીરં ઉદકોઘં વિમાનાભિમુખં પવત્તેસિ.

તતો ઉદકોઘેન પુણ્ણે તસ્મિં વિમાને નિસિન્નસ્સ તસ્સ ભગવતો ચીવરે અંસુમત્તં વા સરીરે લોમમત્તં વા ન તેમિત્થ. તતો સુદસ્સનો દેવરાજા – ‘‘ઇમિના સમણો નિરસ્સાસો મતો ભવિસ્સતી’’તિ મન્ત્વા ઉદકં સઙ્ખિપિત્વા ઓલોકેન્તો ભગવન્તં અસિતજલધરવિવરગતં સરદસમયરજનિકરમિવ વિવિધરંસિજાલવિસરેન વિરોચમાનં સકપરિસપરિવુતં નિસિન્નં દિસ્વા અત્તનો મક્ખં અસહમાનો – ‘‘હન્દ મારેસ્સામિ ન’’ન્તિ કોધેન નવવિધઆવુધવસ્સં વસ્સેસિ. અથસ્સ ભગવતો આનુભાવેન સબ્બાવુધાનિ નાનાવિધપરમરુચિરદસ્સના સુરભિકુસુમમાલા હુત્વા દસબલસ્સ પાદમૂલે નિપતિંસુ.

તતો તં અચ્છરિયં દિસ્વા સુદસ્સનો દેવરાજા પરમકુપિતમાનસો ભગવન્તં ઉભોહિ હત્થેહિ પાદેસુ ગહેત્વા અત્તનો ભવનતો નીહરિતુકામો ઉક્ખિપિત્વા મહાસમુદ્દં અતિક્કમિત્વા ચક્કવાળપબ્બતં ગન્ત્વા – ‘‘કિં નુ ખો સમણો જીવતિ વા મતો વા’’તિ ઓલોકેન્તો તસ્મિંયેવ આસને નિસિન્નં દિસ્વા – ‘‘અહો મહાનુભાવો અયં સમણો, નાહં ઇમં સમણં ઇતો નિક્કડ્ઢિતું સક્કોમિ. યદિ હિ મં કોચિ જાનિસ્સતિ, અનપ્પકો મે અયસો ભવિસ્સતિ. યાવિમં કોચિ ન પસ્સતિ, તાવ નં વિસ્સજ્જેત્વા ગમિસ્સામી’’તિ ચિન્તેસિ.

અથ દસબલો તસ્સ ચિત્તાચારં ઞત્વા તથા અધિટ્ઠાસિ, યથા નં સબ્બે દેવમનુસ્સા પસ્સન્તિ. તસ્મિઞ્ચ દિવસે સકલજમ્બુદીપે એકસતરાજાનો તસ્સેવ ઉપહારદાનત્થાય સન્નિપતિંસુ. તે ભગવતો પાદે ગહેત્વા નિસિન્નં સુદસ્સનં દેવરાજાનં નરરાજાનો દિસ્વા – ‘‘અમ્હાકં દેવરાજા મુનિરાજસ્સ પિયદસ્સિસ્સ સત્થુનો પાદપરિચરિયં કરોતિ, અહો બુદ્ધા નામ અચ્છરિયા, અહો બુદ્ધગુણા વિસિટ્ઠા’’તિ ભગવતિ, પસન્નચિત્તા સબ્બે ભગવન્તં નમસ્સમાના સિરસ્મિં અઞ્જલિં કત્વા અટ્ઠંસુ. તત્થ પિયદસ્સી ભગવા તં સુદસ્સનં દેવરાજાનં પમુખં કત્વા ધમ્મં દેસેસિ. તદા દેવમનુસ્સાનં નવુતિકોટિસહસ્સાનિ અરહત્તં પાપુણિંસુ. સો દુતિયો અભિસમયો અહોસિ.

યદા પન નવયોજનપ્પમાણે કુમુદનગરે બુદ્ધપચ્ચત્થિકો દેવદત્તો વિય સોણત્થેરો નામ મહાપદુમકુમારેન સદ્ધિં મન્તેત્વા તસ્સ પિતરં ઘાતેત્વા પુન પિયદસ્સીબુદ્ધસ્સ વધાય નાનપ્પકારં પયોગં કત્વાપિ ઘાતેતું અસક્કોન્તો સો દોણમુખનાગરાજારોહં પક્કોસાપેત્વા તં પલોભેત્વા તમત્થં આરોચેસિ – ‘‘યદા પનાયં સમણો પિયદસ્સી ઇમં નગરં પિણ્ડાય પવિસતિ, તદા દોણમુખં નામ ગજવરં વિસ્સજ્જેત્વા પિયદસ્સીસમણં મારેહી’’તિ.

અથ સો આરોહો હિતાહિતવિચારણરહિતો રાજવલ્લભો – ‘‘અયં સમણો ઠાનન્તરાપિ મં ચાવેય્યા’’તિ મન્ત્વા ‘‘સાધૂ’’તિ સમ્પટિચ્છિત્વા દુતિયદિવસે દસબલસ્સ નગરપ્પવેસનસમયં સલ્લક્ખેત્વા સુજાતમત્થકપિણ્ડકુમ્ભનલાટં ધનુસદિસદીઘસુણ્ડતટં સુવિપુલમુદુકણ્ણં મધુપિઙ્ગલનયનં સુન્દરક્ખન્ધાસનં અનુવટ્ટઘનજઘનં નિચિતગૂળ્હજાણુઅન્તરં ઈસાસદિસરુચિરદન્તં સુવાલધિં અપચિતમેચકં સબ્બલક્ખણસમ્પન્નં અસિતજલધરસદિસચારુદસ્સનં સીહવિક્કન્તલલિતગામિનં જઙ્ગમમિવ ધરાધરં સત્તપ્પતિટ્ઠં સત્તધા પભિન્નં સબ્બસો વિસ્સવન્તં વિગ્ગહવન્તમિવ અન્તકં ઉપસઙ્કમિત્વા પિણ્ડકબળઞ્જનધૂપલેપાદિવિસેસેહિ ભિય્યોપિ મત્તપ્પમત્તં કત્વા અરિવારણવારણં એરાવણવારણમિવ અરિજનવારણં મુનિવારણં મારણત્થાય પેસેસિ. અથ સો દ્વિરદવરો મુત્તમત્તોવ ગજમહિંસતુરઙ્ગનરનારિયો હન્ત્વા હતરુધિરપરિરઞ્જિતસદન્તકરસરીરો અન્તજાલપરિયોનદ્ધનયનો સકટકવાટકૂટાગારદ્વારતોરણાદીનિ ભઞ્જિત્વા કાક-કુલલ-ગિજ્ઝાદીહિ અનુપરિયાયમાનો હતમહિંસનરતુરઙ્ગદિરદાદીનં અઙ્ગાનિ આલુમ્પિત્વા મનુસ્સભક્ખો યક્ખો વિય ભક્ખયન્તો દૂરતોવ દસબલં સિસ્સગણપરિવુતં આગચ્છન્તં દિસ્વા અનિલગરુળસદિસવેગો વેગેન ભગવન્તમભિગઞ્છિ.

અથ પુરવાસિનો પન જના ભયસન્તાપપરિપૂરિતમાનસા પાસાદપાકારચયતરૂપગતા તથાગતાભિમુખમભિધાવન્તં દિસ્વા હાહાકારસદ્દમકંસુ. કેચિ પન ઉપાસકા તં નાનપ્પકારેહિ નયેહિ નિવારયિતુમારભિંસુ. અથ સો બુદ્ધનાગો હત્થિનાગમાયન્તમોલોકેત્વા કરુણાવિપ્ફારસીતલહદયો મેત્તાય તં ફરિ. તતો સો હત્થિનાગો મેત્તાફરણેન મુદુકતહદયસન્તાનો અત્તનો દોસાપરાધં ઞત્વા લજ્જાય ભગવતો પુરતો ઠાતું અસક્કોન્તો પથવિયં પવિસન્તો વિય સિરસા ભગવતો પાદેસુ નિપતિ. એવં નિપન્નો પન સો તિમિરનિકરસદિસસરીરો સઞ્છાપ્પભાનુરઞ્જિતવરકનકગિરિસિખરસમીપમુપગતો અસિતસલિલધરનિકરો વિય વિરોચિત્થ.

અથેવં મુનિરાજપાદમૂલે કરિરાજાનં સિરસા નિપતન્તં દિસ્વા નાગરજના પરમપીતિપૂરિતહદયા સાધુકારસીહનાદં ઉક્કુટ્ઠિસદ્દં પવત્તયિંસુ. સુરભિકુસુમમાલાચન્દનગન્ધચુણ્ણાલઙ્કારાદીહિ તં અનેકપ્પકારં પૂજેસું. સમન્તતો ચેલુક્ખેપા પવત્તિંસુ. ગગનતલે સુરદુન્દુભિયો અભિનદિંસુ. અથ ભગવા તમસિતગિરિસિખરમિવ પાદમૂલે નિપન્નં દિરદવરં ઓલોકેત્વા અઙ્કુસધજજાલસઙ્ખચક્કાલઙ્કતેન કરતલેન ગજવરમત્થકં પરામસિત્વા તસ્સ ચિત્તાચારાનુકૂલાય ધમ્મદેસનાય તં અનુસાસિ –

‘‘ગજવર વદતો સુણોહિ વાચં, મમ હિતમત્થયુતઞ્ચ તં ભજાહિ;

તવ વધનિરતં પદુટ્ઠભાવં, અપનય સન્તમુપેહિ ચારુદન્તિ.

‘‘લોભેન દોસેન ચ મોહતો વા, યો પાણિનો હિંસતિ વારણિન્દ;

સો પાણઘાતી સુચિરમ્પિ કાલં, દુક્ખં સુઘોરં નરકેનુભોતિ.

‘‘માકાસિ માતઙ્ગ પુનેવરૂપં, કમ્મં પમાદેન મદેન વાપિ;

અવીચિયં દુક્ખમસય્હ કપ્પં, પપ્પોતિ પાણં અતિપાતયન્તો.

‘‘દુક્ખં સુઘોરં નરકેનુભોત્વા, મનુસ્સલોકં યદિ યાતિ ભિય્યો;

અપ્પાયુકો હોતિ વિરૂપરૂપો, વિહિંસકો દુક્ખવિસેસભાગી.

‘‘યથા ચ પાણા પરમં પિયા તે, મહાજને કુઞ્જર મન્દનાગ;

તથા પરસ્સાપિ પિયાતિ ઞત્વા, પાણાતિપાતો પરિવજ્જનીયો.

‘‘દોસે ચ હિંસાનિરતે વિદિત્વા, પાણાતિપાતા વિરતે ગુણે ચ;

પાણાતિપાતં પરિવજ્જય ત્વં, સગ્ગે સુખં ઇચ્છસિ ચે પરત્થ.

‘‘પાણાતિપાતા વિરતો સુદન્તો, પિયો મનાપો ભવતીધ લોકે;

કાયસ્સ ભેદા ચ પરં પનસ્સ, સગ્ગાધિવાસં કથયન્તિ બુદ્ધા.

‘‘દુક્ખાગમં નિચ્છતિ કોચિ લોકે, સબ્બોપિ જાતો સુખમેસતેવ;

તસ્મા મહાનાગ વિહાય હિંસં, ભાવેહિ મેત્તં કરુણઞ્ચ કાલે’’તિ.

અથેવં દસબલેનાનુસાસિયમાનો દન્તિવરો સઞ્ઞં પટિલભિત્વા પરમવિનીતો વિનયાચારસમ્પન્નો સિસ્સો વિય અહોસિ. એવં સો પિયદસ્સી ભગવા અમ્હાકં સત્થા વિય ધનપાલં દોણમુખં કરિવરં દમિત્વા તત્થ મહાજનસમાગમે ધમ્મં દેસેસિ. તદા અસીતિકોટિસહસ્સાનં ધમ્માભિસમયો અહોસિ. અયં તતિયો અભિસમયો અહોસિ. તેન વુત્તં –

૧. ‘‘સુજાતસ્સ અપરેન, સયમ્ભૂ લોકનાયકો;

દુરાસદો અસમસમો, પિયદસ્સી મહાયસો.

૨. ‘‘સોપિ બુદ્ધો અમિતયસો, આદિચ્ચોવ વિરોચતિ;

સબ્બં તમં નિહન્ત્વાન, ધમ્મચક્કં પવત્તયિ.

૩. ‘‘તસ્સાપિ અતુલતેજસ્સ, અહેસું અભિસમયા તયો;

કોટિસતસહસ્સાનં, પઠમાભિસમયો અહુ.

૪. ‘‘સુદસ્સનો દેવરાજા, મિચ્છાદિટ્ઠિમરોચયિ;

તસ્સ દિટ્ઠિં વિનોદેન્તો, સત્થા ધમ્મમદેસયિ.

૫. ‘‘જનસન્નિપાતો અતુલો, મહાસન્નિપતી તદા;

નવુતિકોટિસહસ્સાનં, દુતિયાભિસમયો અહુ.

૬. ‘‘યદા દોણમુખં હત્થિં, વિનેસિ નરસારથિ;

અસીતિકોટિસહસ્સાનં, તતિયાભિસમયો અહૂ’’તિ.

સુમઙ્ગલનગરે પાલિતો નામ રાજપુત્તો ચ પુરોહિતપુત્તો સબ્બદસ્સિકુમારો ચાતિ દ્વે સહાયકા અહેસું. તે પિયદસ્સિમ્હિ સમ્માસમ્બુદ્ધે ચારિકં ચરન્તે ‘‘અત્તનો નગરં સમ્પત્તો’’તિ સુત્વા કોટિસતસહસ્સપરિવારા પચ્ચુગ્ગમનં કત્વા તસ્સ ધમ્મં સુત્વા સત્તાહં મહાદાનં દત્વા સત્તમે દિવસે ભગવતો ભત્તાનુમોદનાવસાને કોટિસતસહસ્સેહિ સદ્ધિં પબ્બજિત્વા અરહત્તં પાપુણિંસુ. તેસં પન મજ્ઝે ભગવા પાતિમોક્ખં ઉદ્દિસિ, સો પઠમો સન્નિપાતો અહોસિ. અથાપરેન સમયેન સુદસ્સનદેવરાજસ્સ સમાગમે નવુતિકોટિયો અરહત્તં પાપુણિંસુ. તેહિ પરિવુતો સત્થા પાતિમોક્ખં ઉદ્દિસિ, અયં દુતિયો સન્નિપાતો અહોસિ. પુન દોણમુખવિનયને અસીતિકોટિયો પબ્બજિત્વા અરહત્તં પાપુણિંસુ. તેસં મજ્ઝે ભગવા પાતિમોક્ખં ઉદ્દિસિ, અયં તતિયો સન્નિપાતો અહોસિ. તેન વુત્તં –

૭. ‘‘સન્નિપાતા તયો આસું, તસ્સાપિ પિયદસ્સિનો;

કોટિસતસહસ્સાનં, પઠમો આસિ સમાગમો.

૮. ‘‘તતો પરં નવુતિકોટી, સમિંસુ એકતો મુની;

તતિયે સન્નિપાતમ્હિ, અસીતિકોટિયો અહૂ’’તિ.

તદા અમ્હાકં બોધિસત્તો કસ્સપો નામ બ્રાહ્મણમાણવો ઇતિહાસપઞ્ચમાનં તિણ્ણં વેદાનં પારગૂ હુત્વા સત્થુ ધમ્મદેસનં સુત્વા કોટિસતસહસ્સપરિચ્ચાગેન પરમારામં સઙ્ઘારામં કારેત્વા સરણેસુ ચ પઞ્ચસીલેસુ ચ પતિટ્ઠાસિ. અથ નં સત્થા – ‘‘ઇતો અટ્ઠારસકપ્પસતચ્ચયેન ગોતમો નામ બુદ્ધો લોકે ભવિસ્સતી’’તિ બ્યાકાસિ. તેન વુત્તં –

૯. ‘‘અહં તેન સમયેન, કસ્સપો નામ બ્રાહ્મણો;

અજ્ઝાયકો મન્તધરો, તિણ્ણં વેદાન પારગૂ.

૧૦. ‘‘તસ્સ ધમ્મં સુણિત્વાન, પસાદં જનયિં અહં;

કોટિસતસહસ્સેહિ, સઙ્ઘારામં અમાપયિં.

૧૧. ‘‘તસ્સ દત્વાન આરામં, હટ્ઠો સંવિગ્ગમાનસો;

સરણે પઞ્ચસીલે ચ, દળહં કત્વા સમાદિયિં.

૧૨. ‘‘સોપિ મં બુદ્ધો બ્યાકાસિ, સઙ્ઘમજ્ઝે નિસીદિય;

અટ્ઠારસે કપ્પસતે, અયં બુદ્ધો ભવિસ્સતિ.

૧૩. ‘‘પધાનં પદહિત્વાન…પે… હેસ્સામ સમ્મુખા ઇમં.

૧૪. ‘‘તસ્સાપિ વચનં સુત્વા, ભિય્યો ચિત્તં પસાદયિં;

ઉત્તરિં વતમધિટ્ઠાસિં, દસપારમિપૂરિયા’’તિ.

તત્થ સરણે પઞ્ચસીલે ચાતિ તીણિ સરણાનિ પઞ્ચ સીલાનિ ચાતિ અત્થો. અટ્ઠારસે કપ્પસતેતિ ઇતો અટ્ઠસતાધિકસ્સ કપ્પસહસ્સસ્સ અચ્ચયેનાતિ અત્થો.

તસ્સ પન ભગવતો સુધઞ્ઞં નામ નગરં અહોસિ. પિતા સુદત્તો નામ રાજા, માતા સુચન્દા નામ દેવી, પાલિતો ચ સબ્બદસ્સી ચ દ્વે અગ્ગસાવકા, સોભિતો નામુપટ્ઠાકો, સુજાતા ચ ધમ્મદિન્ના ચ દ્વે અગ્ગસાવિકા, કકુધરુક્ખો બોધિ, સરીરં અસીતિહત્થુબ્બેધં અહોસિ, નવુતિવસ્સસહસ્સાનિ આયુ, વિમલા નામસ્સ અગ્ગમહેસી અહોસિ, કઞ્ચનાવેળો નામ પુત્તો, સો આજઞ્ઞરથેન નિક્ખમીતિ. તેન વુત્તં –

૧૫. ‘‘સુધઞ્ઞં નામ નગરં, સુદત્તો નામ ખત્તિયો;

ચન્દા નામાસિ જનિકા, પિયદસ્સિસ્સ સત્થુનો.

૨૦. ‘‘પાલિતો સબ્બદસ્સી ચ, અહેસું અગ્ગસાવકા;

સોભિતો નામુપટ્ઠાકો, પિયદસ્સિસ્સ સત્થુનો.

૨૧. ‘‘સુજાતા ધમ્મદિન્ના ચ, અહેસું અગ્ગસાવિકા;

બોધિ તસ્સ ભગવતો, કકુધોતિ પવુચ્ચતિ.

૨૩. ‘‘સોપિ બુદ્ધો અમિતયસો, દ્વત્તિંસવરલક્ખણો;

અસીતિહત્થમુબ્બેધો, સાલરાજાવ દિસ્સતિ.

૨૪. ‘‘અગ્ગિચન્દસૂરિયાનં, નત્થિ તાદિસિકા પભા;

યથા અહુ પભા તસ્સ, અસમસ્સ મહેસિનો.

૨૫. ‘‘તસ્સાપિ દેવદેવસ્સ, આયુ તાવતકં અહુ;

નવુતિવસ્સસહસ્સાનિ, લોકે અટ્ઠાસિ ચક્ખુમા.

૨૬. ‘‘સોપિ બુદ્ધો અસમસમો, યુગાનિપિ તાનિ અતુલિયાનિ;

સબ્બં તમન્તરહિતં, નનુ રિત્તા સબ્બસઙ્ખારા’’તિ.

તત્થ સાલરાજા વાતિ સબ્બફાલિફુલ્લો પરમરમણીયદસ્સનો સમવટ્ટક્ખન્ધો સાલરાજા વિય દિસ્સતિ. યુગાનિપિ તાનીતિ અગ્ગસાવકયુગાદીનિ યુગળાનિ. સેસગાથાસુ સબ્બત્થ ઉત્તાનમેવાતિ.

પિયદસ્સીબુદ્ધવંસવણ્ણના નિટ્ઠિતા.

નિટ્ઠિતો તેરસમો બુદ્ધવંસો.