૯. તિમિરવગ્ગો

૧. તિમિરપુપ્ફિયત્થેરઅપદાનવણ્ણના

ચન્દભાગાનદીતીરેતિઆદિકં આયસ્મતો તિમિરપુપ્ફિયત્થેરસ્સ અપદાનં. કા ઉપ્પત્તિ? અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે એકસ્મિં કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા વસન્તો કામેસુ આદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા ચન્દભાગાય નદિયા સમીપે વસતિ, વિવેકકામતાય હિમવન્તં ગન્ત્વા નિસિન્નં સિદ્ધત્થં ભગવન્તં દિસ્વા વન્દિત્વા તસ્સ ગુણં પસીદિત્વા તિમિરપુપ્ફં ગહેત્વા પૂજેસિ. સો તેન પુઞ્ઞેન દેવેસુ ચ મનુસ્સેસુ ચ સમ્પત્તિમનુભવન્તો સંસરિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો નચિરસ્સેવ અરહા અહોસિ.

૧. સો અપરભાગે પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચન્દભાગાનદીતીરેતિઆદિમાહ. તસ્સત્થો હેટ્ઠા વુત્તોવ. અનુભોતં વજામહન્તિ ગઙ્ગાય આસન્ને વસનભાવેન સબ્બત્થ રમ્મભાવેન ગઙ્ગાતો હેટ્ઠા સોતાનુસારેન અહં વજામિ ગચ્છામિ તત્થ તત્થ વસામીતિ અત્થો. નિસિન્નં સમણં દિસ્વાતિ સમિતપાપત્તા સોસિતપાપત્તા સમણસઙ્ખાતં સમ્માસમ્બુદ્ધં દિસ્વાતિ અત્થો.

૨. એવં ચિન્તેસહં તદાતિ અયં ભગવા સયં તિણ્ણો સબ્બસત્તે તારયિસ્સતિ સંસારતો ઉત્તારેતિ સયં કાયદ્વારાદીહિ દમિતો અયં ભગવા પરે દમેતિ.

૩. સયં અસ્સત્થો અસ્સાસમ્પત્તો, કિલેસપરિળાહતો મુત્તો સબ્બસત્તે અસ્સાસેતિ, સન્તભાવં આપાપેતિ. સયં સન્તો સન્તકાયચિત્તો પરેસં સન્તકાયચિત્તં પાપેતિ. સયં મુત્તો સંસારતો મુચ્ચિતો પરે સંસારતો મોચયિસ્સતિ. સો અયં ભગવા સયં નિબ્બુતો કિલેસગ્ગીહિ નિબ્બુતો પરેસમ્પિ કિલેસગ્ગીહિ નિબ્બાપેસ્સતીતિ અહં તદા એવં ચિન્તેસિન્તિ અત્થો.

૪. ગહેત્વા તિમિરપુપ્ફન્તિ સકલં વનન્તં નીલકાળરંસીહિ અન્ધકારં વિય કુરુમાનં ખાયતીતિ તિમિરં પુપ્ફં તં ગહેત્વા કણ્ણિકાવણ્ટં ગહેત્વા મત્થકે સીસસ્સ ઉપરિ આકાસે ઓકિરિં પૂજેસિન્તિ અત્થો. સેસં ઉત્તાનત્થમેવાતિ.

તિમિરપુપ્ફિયત્થેરઅપદાનવણ્ણના સમત્તા.

૨. ગતસઞ્ઞકત્થેરઅપદાનવણ્ણના

જાતિયા સત્તવસ્સોહન્તિઆદિકં આયસ્મતો ગતસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં કુલગેહે નિબ્બત્તો પુરાકતવાસનાવસેન સદ્ધાજાતો સત્તવસ્સિકકાલેયેવ પબ્બજિતો ભગવતો પણામકરણેનેવ પાકટો અહોસિ. સો એકદિવસં અતીવ નીલમણિપ્પભાનિ નઙ્ગલકસિતટ્ઠાને ઉટ્ઠિતસત્તપુપ્ફાનિ ગહેત્વા આકાસે પૂજેસિ. સો યાવતાયુકં સમણધમ્મં કત્વા તેન પુઞ્ઞેન દેવમનુસ્સેસુ સંસરન્તો ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વિઞ્ઞુતં પત્તો સત્થરિ પસીદિત્વા પબ્બજિતો નચિરસ્સેવ અરહા અહોસિ.

૧૦. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો જાતિયા સત્તવસ્સોહન્તિઆદિમાહ. તત્થ જાતિયા સત્તવસ્સોતિ માતુગબ્ભતો નિક્ખન્તકાલતો પટ્ઠાય પરિપુણ્ણસત્તવસ્સિકોતિ અત્થો. પબ્બજિં અનગારિયન્તિ અગારસ્સ હિતં આગારિયં કસિવાણિજ્જાદિકમ્મં નત્થિ આગારિયન્તિ અનગારિયં, બુદ્ધસાસને પબ્બજિં અહન્તિ અત્થો.

૧૨. સુગતાનુગતં મગ્ગન્તિ બુદ્ધેન ગતં મગ્ગં. અથ વા સુગતેન દેસિતં ધમ્માનુધમ્મપટિપત્તિપૂરણવસેન હટ્ઠમાનસો તુટ્ઠચિત્તો પૂજેત્વાતિ સમ્બન્ધો. સેસં સબ્બત્થ ઉત્તાનત્થમેવાતિ.

ગતસઞ્ઞકત્થેરઅપદાનવણ્ણના સમત્તા.

૩. નિપન્નઞ્જલિકત્થેરઅપદાનવણ્ણના

રુક્ખમૂલે નિસિન્નોહન્તિઆદિકં આયસ્મતો નિપન્નઞ્જલિકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે કુલગેહે નિબ્બત્તો વુદ્ધિપ્પત્તો પબ્બજિત્વા રુક્ખમૂલિકઙ્ગં પૂરયમાનો અરઞ્ઞે વિહરતિ. તસ્મિં સમયે ખરો આબાધો ઉપ્પજ્જિ, તેન પીળિતો પરમકારુઞ્ઞપ્પત્તો અહોસિ. તદા ભગવા તસ્સ કારુઞ્ઞેન તત્થ અગમાસિ. અથ સો નિપન્નકોવ ઉટ્ઠિતું અસક્કોન્તો સિરસિ અઞ્જલિં કત્વા ભગવતો પણામં અકાસિ. સો તતો ચુતો તુસિતભવને ઉપ્પન્નો તત્થ સમ્પત્તિમનુભવિત્વા એવં છ કામાવચરસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિપ્પત્તો સત્થરિ પસીદિત્વા પબ્બજિતો નચિરસ્સેવ અરહા અહોસિ, પુરાકતપુઞ્ઞવસેન નિપન્નઞ્જલિકત્થેરોતિ પાકટો.

૧૬. સો અપરભાગે અત્તનો પુઞ્ઞસમ્પત્તિયો ઓલોકેત્વા સોમનસ્સજાતો પુબ્બચરિતાપદાનં પકાસેન્તો રુક્ખમૂલે નિસિન્નોહન્તિઆદિમાહ. તત્થ રુહતિ પટિરુહતિ ઉદ્ધમુદ્ધં આરોહતીતિ રુક્ખો, તસ્સ રુક્ખસ્સ મૂલે સમીપેતિ અત્થો. બ્યાધિતો પરમેન ચાતિ પરમેન અધિકેન ખરેન કક્ખળેન બ્યાધિના રોગેન બ્યાધિતો, બ્યાધિના અહં સમન્નાગતોતિ અત્થો. પરમકારુઞ્ઞપ્પત્તોમ્હીતિ પરમં અધિકં કારુઞ્ઞં દીનભાવં દુક્ખિતભાવં પત્તોમ્હિ અરઞ્ઞે કાનનેતિ સમ્બન્ધો.

૨૦. પઞ્ચેવાસું મહાસિખાતિ સિરસિ પિળન્ધનત્થેન સિખા વુચ્ચતિ ચૂળા. મણીતિ જોતમાનં મકુટં તસ્સ અત્થીતિ સિખો, ચક્કવત્તિનો એકનામકા પઞ્ચેવ ચક્કવત્તિનો આસું અહેસુન્તિ અત્થો. સેસં સબ્બત્થ ઉત્તાનત્થમેવાતિ.

નિપન્નઞ્જલિકત્થેરઅપદાનવણ્ણના સમત્તા.

૪. અધોપુપ્ફિયત્થેરઅપદાનવણ્ણના

અભિભૂ નામ સો ભિક્ખૂતિઆદિકં આયસ્મતો અધોપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા અપરભાગે કામેસુ આદીનવં દિસ્વા તં પહાય ઇસિપબ્બજ્જં પબ્બજિત્વા પઞ્ચાભિઞ્ઞાઅટ્ઠસમાપત્તિલાભી ઇદ્ધીસુ ચ વસીભાવં પત્વા હિમવન્તસ્મિં પટિવસતિ. તસ્સ સિખિસ્સ ભગવતો અભિભૂ નામ અગ્ગસાવકો વિવેકાભિરતો હિમવન્તમગમાસિ. અથ સો તાપસો તં અગ્ગસાવકત્થેરં દિસ્વા થેરસ્સ ઠિતપબ્બતં આરુહન્તો પબ્બતસ્સ હેટ્ઠાતલતો સુગન્ધાનિ વણ્ણસમ્પન્નાનિ સત્ત પુપ્ફાનિ ગહેત્વા પૂજેસિ. અથ સો થેરો તસ્સાનુમોદનમકાસિ. સોપિ તાપસો સકસ્સમં અગમાસિ. તત્થ એકેન અજગરેન પીળિતો અપરભાગે અપરિહીનજ્ઝાનો તેનેવ ઉપદ્દવેન ઉપદ્દુતો કાલં કત્વા બ્રહ્મલોકપરાયનો હુત્વા બ્રહ્મસમ્પત્તિં છકામાવચરસમ્પત્તિઞ્ચ અનુભવિત્વા મનુસ્સેસુ મનુસ્સસમ્પત્તિયો ચ ખેપેત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિપ્પત્તો ભગવતો ધમ્મં સુત્વા પસન્નમાનસો પબ્બજિત્વા નચિરસ્સેવ અરહા અહોસિ. સો અપરભાગે અત્તનો કતપુઞ્ઞનામેન અધોપુપ્ફિયત્થેરોતિ પાકટો.

૨૨. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અભિભૂ નામ સો ભિક્ખૂતિઆદિમાહ. તત્થ સીલસમાધીહિ પરે અભિભવતીતિ અભિભૂ, ખન્ધમારાદિમારે અભિભવતિ અજ્ઝોત્થરતીતિ વા અભિભૂ, સસન્તાનપરસન્તાનગતકિલેસે અભિભવતિ વિહેસેતિ વિદ્ધંસેતીતિ વા અભિભૂ. ભિક્ખનસીલો યાચનસીલોતિ ભિક્ખુ, છિન્નભિન્નપટધરોતિ વા ભિક્ખુ. અભિભૂ નામ અગ્ગસાવકો સો ભિક્ખૂતિ અત્થો, સિખિસ્સ ભગવતો અગ્ગસાવકોતિ સમ્બન્ધો.

૨૭. અજગરો મં પીળેસીતિ તથારૂપં સીલસમ્પન્નં ઝાનસમ્પન્નં તાપસં પુબ્બે કતપાપેન વેરેન ચ મહન્તો અજગરસપ્પો પીળેસિ. સો તેનેવ ઉપદ્દવેન ઉપદ્દુતો અપરિહીનજ્ઝાનો કાલં કત્વા બ્રહ્મલોકપરાયણો આસિ. સેસં સબ્બત્થ ઉત્તાનમેવાતિ.

અધોપુપ્ફિયત્થેરઅપદાનવણ્ણના સમત્તા.

૫. રંસિસઞ્ઞકત્થેરઅપદાનવણ્ણના

પબ્બતે હિમવન્તમ્હીતિઆદિકં આયસ્મતો રંસિસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તેસુ તેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા કામેસુ આદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા અજિનચમ્મધરો હિમવન્તમ્હિ વાસં કપ્પેસિ. તસ્મિં સમયે વિપસ્સી ભગવા હિમવન્તમગમાસિ. અથ સો તાપસો તમુપગતં ભગવન્તં દિસ્વા તસ્સ ભગવતો સરીરતો નિક્ખન્તછબ્બણ્ણબુદ્ધરંસીસુ પસીદિત્વા અઞ્જલિં પગ્ગય્હ પઞ્ચઙ્ગેન નમક્કારમકાસિ. સો તેનેવ પુઞ્ઞેન ઇતો ચુતો તુસિતાદીસુ દિબ્બસમ્પત્તિયો અનુભવિત્વા અપરભાગે મનુસ્સસમ્પત્તિયો ચ અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા તત્થાદીનવં દિસ્વા ગેહં પહાય પબ્બજિત્વા નચિરસ્સેવ અરહા અહોસિ.

૩૦. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પબ્બતે હિમવન્તમ્હીતિઆદિમાહ. તત્થ પબ્બતેતિ પકારેન બ્રૂહતિ વડ્ઢેતીતિ પબ્બતો, હિમો અસ્સ અત્થીતિ હિમવન્તો, હિમવન્તો ચ સો પબ્બતો ચાતિ હિમવન્તપબ્બતો. હિમવન્તપબ્બતેતિ વત્તબ્બે ગાથાવચનસુખત્થં ‘‘પબ્બતે હિમવન્તમ્હી’’તિ વુત્તં. તસ્મિં હિમવન્તમ્હિ પબ્બતે વાસં કપ્પેસિં પુરે અહન્તિ સમ્બન્ધો. સેસં સબ્બત્થ નયાનુસારેન ઉત્તાનમેવાતિ.

રંસિસઞ્ઞકત્થેરઅપદાનવણ્ણના સમત્તા.

૬. દુતિયરંસિસઞ્ઞકત્થેરઅપદાનવણ્ણના

પબ્બતે હિમવન્તમ્હીતિઆદિકં આયસ્મતો દુતિયરંસિસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતકુસલો ઉપ્પન્નુપ્પન્નભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા તત્થ દોસં દિસ્વા તં પહાય તાપસપબ્બજ્જં પબ્બજિત્વા હિમવન્તપબ્બતે વસન્તો વાકચીરનિવસનો વિવેકસુખેન વિહરતિ. તસ્મિં સમયે સો ફુસ્સં ભગવન્તં તં પદેસં સમ્પત્તં દિસ્વા તસ્સ સરીરતો નિક્ખન્તછબ્બણ્ણબુદ્ધરંસિયો ઇતો ચિતો વિધાવન્તિયો દણ્ડદીપિકાનિક્ખન્તવિપ્ફુરન્તમિવ દિસ્વા તસ્મિં પસન્નો અઞ્જલિં પગ્ગહેત્વા વન્દિત્વા ચિત્તં પસાદેત્વા તેનેવ પીતિસોમનસ્સેન કાલં કત્વા તુસિતાદીસુ નિબ્બત્તો તત્થ છ કામાવચરસમ્પત્તિયો ચ અનુભવિત્વા અપરભાગે મનુસ્સસમ્પત્તિયો ચ અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિપ્પત્તો પુબ્બવાસનાવસેન પબ્બજિત્વા નચિરસ્સેવ અરહા અહોસિ.

૩૫. સો અપરભાગે પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પબ્બતે હિમવન્તમ્હીતિઆદિમાહ. તં સબ્બં ઉત્તાનત્થમેવાતિ.

દુતિયરંસિસઞ્ઞકત્થેરઅપદાનવણ્ણના સમત્તા.

૭. ફલદાયકત્થેરઅપદાનવણ્ણના

પબ્બતે હિમવન્તમ્હીતિઆદિકં આયસ્મતો ફલદાયકત્થેરસ્સ અપદાનં. અયમ્પિ પુરિમબુદ્ધેસુ કતકુસલસમ્ભારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે એકસ્મિં કુલગેહે નિબ્બત્તો સુખપ્પત્તો તં સબ્બં પહાય તાપસપબ્બજ્જં પબ્બજિત્વા ખરાજિનચમ્મધારી હુત્વા વિહરતિ. તસ્મિઞ્ચ સમયે ફુસ્સં ભગવન્તં તત્થ સમ્પત્તં દિસ્વા પસન્નમાનસો મધુરાનિ ફલાનિ ગહેત્વા ભોજેસિ. સો તેનેવ કુસલેન દેવલોકાદીસુ પુઞ્ઞસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિત્વા નચિરસ્સેવ અરહા અહોસિ.

૩૯. સો અપરભાગે અત્તનો પુબ્બકમ્મં અનુસ્સરિત્વા પુબ્બચરિતાપદાનં પકાસેન્તો પબ્બતે હિમવન્તમ્હીતિઆદિમાહ. તં સબ્બં હેટ્ઠા વુત્તનયત્તા ઉત્તાનત્થમેવાતિ.

ફલદાયકત્થેરઅપદાનવણ્ણના સમત્તા.

૮. સદ્દસઞ્ઞકત્થેરઅપદાનવણ્ણના

પબ્બતે હિમવન્તમ્હીતિઆદિકં આયસ્મતો સદ્દસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે એકસ્મિં કુલગેહે નિબ્બત્તો વુદ્ધિપ્પત્તો સદ્ધાજાતો તાપસપબ્બજ્જં પબ્બજિત્વા હિમવન્તમ્હિ અરઞ્ઞાવાસે વસન્તો અત્તનો અનુકમ્પાય ઉપગતસ્સ ભગવતો ધમ્મં સુત્વા ધમ્મેસુ ચિત્તં પસાદેત્વા યાવતાયુકં ઠત્વા અપરભાગે કાલં કત્વા તુસિતાદીસુ છસુ કામાવચરસમ્પત્તિયો ચ મનુસ્સેસુ મનુસ્સસમ્પત્તિયો ચ અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સદ્ધાજાતો પબ્બજિત્વા વિપસ્સનં વડ્ઢેત્વા અરહત્તં પાપુણિ.

૪૩. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પબ્બતે હિમવન્તમ્હીતિઆદિમાહ. તં સબ્બં ઉત્તાનત્થમેવાતિ.

સદ્દસઞ્ઞકત્થેરઅપદાનવણ્ણના સમત્તા.

૯. બોધિસિઞ્ચકત્થેરઅપદાનવણ્ણના

વિપસ્સિસ્સ ભગવતોતિઆદિકં આયસ્મતો બોધિસિઞ્ચકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકાસુ જાતીસુ વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો સાસને પબ્બજિત્વા વત્તપટિપત્તિયા સાસનં સોભયન્તો મહાજને બોધિપૂજં કુરુમાને દિસ્વા અનેકાનિ પુપ્ફાનિ સુગન્ધોદકાનિ ચ ગાહાપેત્વા પૂજેસિ. સો તેન પુઞ્ઞેન દેવલોકે નિબ્બત્તો છ કામાવચરસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સદ્ધાજાતો પબ્બજિત્વા નચિરસ્સેવ અરહા અહોસિ.

૪૬. સો અરહા હુત્વા ઝાનફલસુખેન વીતિનામેત્વા પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો વિપસ્સિસ્સ ભગવતોતિઆદિમાહ. તત્થ વિસેસં પરમત્થં નિબ્બાનં પસ્સતીતિ વિપસ્સી, વિસેસેન ભબ્બાભબ્બજને પસ્સતીતિ વા વિપસ્સી, વિપસ્સન્તો ચતુસચ્ચં પસ્સનદક્ખનસીલોતિ વા વિપસ્સી, તસ્સ વિપસ્સિસ્સ ભગવતો મહાબોધિમહો અહૂતિ સમ્બન્ધો. તત્રાપિ મહાબોધીતિ બોધિ વુચ્ચતિ ચતૂસુ મગ્ગેસુ ઞાણં, તમેત્થ નિસિન્નો ભગવા પટિવિજ્ઝતીતિ કણિકારપાદપરુક્ખોપિ બોધિચ્ચેવ વુચ્ચતિ, મહિતો ચ સો દેવબ્રહ્મનરાસુરેહિ બોધિ ચેતિ મહાબોધિ, મહતો બુદ્ધસ્સ ભગવતો બોધીતિ વા મહાબોધિ, તસ્સ મહો પૂજા અહોસીતિ અત્થો. સેસં સબ્બત્થ ઉત્તાનત્થમેવાતિ.

બોધિસિઞ્ચકત્થેરઅપદાનવણ્ણના સમત્તા.

૧૦. પદુમપુપ્ફિયત્થેરઅપદાનવણ્ણના

પોક્ખરવનં પવિટ્ઠોતિઆદિકં આયસ્મતો પદુમપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે એકસ્મિં કુલગેહે નિબ્બત્તો વુદ્ધિમન્વાય પદુમસમ્પન્નં એકં પોક્ખરણિં પવિસિત્વા ભિસમુળાલે ખાદન્તો પોક્ખરણિયા અવિદૂરે ગચ્છમાનં ફુસ્સં ભગવન્તં દિસ્વા પસન્નમાનસો તતો પદુમાનિ ઓચિનિત્વા આકાસે ઉક્ખિપિત્વા ભગવન્તં પૂજેસિ, તાનિ પુપ્ફાનિ આકાસે વિતાનં હુત્વા અટ્ઠંસુ. સો ભિય્યોસોમત્તાય પસન્નમાનસો પબ્બજિત્વા વત્તપટિપત્તિસારો સમણધમ્મં પૂરેત્વા તતો ચુતો તુસિતભવનમલં કુરુમાનો વિય તત્થ ઉપ્પજ્જિત્વા કમેન છ કામાવચરસમ્પત્તિયો ચ મનુસ્સસમ્પત્તિયો ચ અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિપ્પત્તો સદ્ધાજાતો પબ્બજિત્વા નચિરસ્સેવ અરહા અહોસિ.

૫૧. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પોક્ખરવનં પવિટ્ઠોતિઆદિમાહ. તત્થ પકારેન નળદણ્ડપત્તાદીહિ ખરન્તીતિ પોક્ખરા, પોક્ખરાનં સમુટ્ઠિતટ્ઠેન સમૂહન્તિ પોક્ખરવનં, પદુમગચ્છસણ્ડેહિ મણ્ડિતં મજ્ઝં પવિટ્ઠો અહન્તિ અત્થો. સેસં સબ્બત્થ ઉત્તાનમેવાતિ.

પદુમપુપ્ફિયત્થેરઅપદાનવણ્ણના સમત્તા.

નવમવગ્ગવણ્ણના સમત્તા.