૮. નાગસમાલવગ્ગો

૧. નાગસમાલત્થેરઅપદાનવણ્ણના

આપાટલિં અહં પુપ્ફન્તિઆદિકં આયસ્મતો નાગસમાલત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે એકસ્મિં કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા તથારૂપસજ્જનસંસગ્ગસ્સ અલાભેન સત્થરિ ધરમાનકાલે દસ્સનસવનપૂજાકમ્મમકરિત્વા પરિનિબ્બુતકાલે તસ્સ ભગવતો સારીરિકધાતું નિદહિત્વા કતચેતિયમ્હિ ચિત્તં પસાદેત્વા પાટલિપુપ્ફં પૂજેત્વા સોમનસ્સં ઉપ્પાદેત્વા યાવતાયુકં ઠત્વા તેનેવ સોમનસ્સેન તતો કાલં કતો તુસિતાદીસુ છસુ દેવલોકેસુ સુખમનુભવિત્વા અપરભાગે મનુસ્સેસુ મનુસ્સસમ્પત્તિં અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો નાગરુક્ખપલ્લવકોમળસદિસસરીરત્તા નાગસમાલોતિ માતાપિતૂહિ કતનામધેય્યો ભગવતિ પસન્નો પબ્બજિત્વા નચિરસ્સેવ અરહા અહોસિ.

૧. સો પચ્છા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો આપાટલિં અહં પુપ્ફન્તિઆદિમાહ. તત્થ આપાટલિન્તિ આ સમન્તતો, આદરેન વા પાટલિપુપ્ફં ગહેત્વા અહં થૂપમ્હિ અભિરોપેસિં પૂજેસિન્તિ અત્થો. ઉજ્ઝિતં સુમહાપથેતિ સબ્બનગરવાસીનં વન્દનપૂજનત્થાય મહાપથે નગરમજ્ઝે વીથિયં ઉજ્ઝિતં ઉટ્ઠાપિતં, ઇટ્ઠકકમ્મસુધાકમ્માદીહિ નિપ્ફાદિતન્તિ અત્થો. સેસં હેટ્ઠા વુત્તનયત્તા ઉત્તાનત્થત્તા ચ સુવિઞ્ઞેય્યમેવાતિ.

નાગસમાલત્થેરઅપદાનવણ્ણના સમત્તા.

૨. પદસઞ્ઞકત્થેરઅપદાનવણ્ણના

અક્કન્તઞ્ચ પદં દિસ્વાતિઆદિકં આયસ્મતો પદસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો ઉપ્પન્નુપ્પન્નભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં સદ્ધાસમ્પન્ને ઉપાસકગેહે નિબ્બત્તો વિઞ્ઞુતં પત્તો રતનત્તયે પસન્નો ભગવતા તસ્સ અનુકમ્પાય દસ્સિતં પદચેતિયં દિસ્વા પસન્નો લોમહટ્ઠજાતો વન્દનપૂજનાદિબહુમાનમકાસિ. સો તેનેવ સુખેત્તે સુકતેન પુઞ્ઞેન તતો ચુતો સગ્ગે નિબ્બત્તો તત્થ દિબ્બસુખમનુભવિત્વા અપરભાગે મનુસ્સેસુ જાતો મનુસ્સસમ્પત્તિં સબ્બમનુભવિત્વા ઇમસ્મિં બુદ્ધુપ્પાદે વિભવસમ્પન્નકુલે નિબ્બત્તો વુદ્ધિમન્વાય સદ્ધાજાતો પબ્બજિત્વા નચિરસ્સેવ અરહા અહોસિ, પુરાકતપુઞ્ઞનામેન પદસઞ્ઞકત્થેરોતિ પાકટો.

૫. સો એકદિવસં અત્તનો પુબ્બકમ્મં સરિત્વા પુબ્બચરિતાપદાનં પકાસેન્તો અક્કન્તઞ્ચ પદં દિસ્વાતિઆદિમાહ. તત્થ અક્કન્તન્તિ અક્કમિતં દસ્સિતં. સબ્બબુદ્ધાનં સબ્બદા ચતુરઙ્ગુલોપરિયેવ ગમનં, અયં પન તસ્સ સદ્ધાસમ્પન્નતં ઞત્વા ‘‘એસો ઇમં પસ્સતૂ’’તિ પદચેતિયં દસ્સેસિ, તસ્મા સો તસ્મિં પસીદિત્વા વન્દનપૂજનાદિસક્કારમકાસીતિ અત્થો. સેસં સબ્બત્થ ઉત્તાનત્થમેવાતિ.

પદસઞ્ઞકત્થેરઅપદાનવણ્ણના સમત્તા.

૩. બુદ્ધસઞ્ઞકત્થેરઅપદાનવણ્ણના

દુમગ્ગે પંસુકૂલિકન્તિઆદિકં આયસ્મતો બુદ્ધસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં કુલગેહે નિબ્બત્તો વુદ્ધિપ્પત્તો સદ્ધાજાતો દુમગ્ગે લગ્ગિતં ભગવતો પંસુકૂલચીવરં દિસ્વા પસન્નમાનસો ‘‘અરહદ્ધજ’’ન્તિ ચિન્તેત્વા વન્દનપૂજનાદિસક્કારમકાસિ. સો તેન પુઞ્ઞકમ્મેન દેવમનુસ્સસમ્પત્તિમનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલગેહે નિબ્બત્તો સદ્ધાજાતો પબ્બજિત્વા નચિરસ્સેવ અરહા અહોસિ.

૯. સો પત્તઅરહત્તાધિગમો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો દુમગ્ગે પંસુકૂલિકન્તિઆદિમાહ. તત્થ ધુનાતિ કમ્પતીતિ દુમો. દુહતિ પૂરેતિ આકાસતલન્તિ વા દુમો, દુમસ્સ અગ્ગો કોટીતિ દુમગ્ગો, તસ્મિં દુમગ્ગે. પંસુમિવ પટિક્કૂલભાવં અમનુઞ્ઞભાવં ઉલતિ ગચ્છતીતિ પંસુકૂલં, પંસુકૂલમેવ પંસુકૂલિકં, સત્થુનો પંસુકૂલં દુમગ્ગે લગ્ગિતં દિસ્વા અહં અઞ્જલિં પગ્ગહેત્વા તં પંસુકૂલં અવન્દિં પણામમકાસિન્તિ અત્થો. તન્તિ નિપાતમત્તં. સેસં સબ્બત્થ ઉત્તાનત્થમેવાતિ.

બુદ્ધસઞ્ઞકત્થેરઅપદાનવણ્ણના સમત્તા.

૪. ભિસાલુવદાયકત્થેરઅપદાનવણ્ણના

કાનનં વનમોગ્ગય્હાતિઆદિકં આયસ્મતો ભિસાલુવદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે હિમવન્તસ્સ સમીપે અરઞ્ઞાવાસે વસન્તો વનમૂલફલાહારો વિવેકવસેનાગતં વિપસ્સિં ભગવન્તં દિસ્વા પસન્નમાનસો પઞ્ચભિસાલુવે અદાસિ. ભગવા તસ્સ ચિત્તં પસાદેતું પસ્સન્તસ્સેવ પરિભુઞ્જિ. સો તેન ચિત્તપ્પસાદેન કાલં કત્વા તુસિતાદીસુ સમ્પત્તિમનુભવિત્વા પચ્છા મનુસ્સસમ્પત્તિઞ્ચ અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વિભવસમ્પત્તિં પત્તો તં પહાય સાસને પબ્બજિતો નચિરસ્સેવ અરહત્તં પાપુણિ.

૧૩. સો તતો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો કાનનં વનમોગ્ગય્હાતિઆદિમાહ. તં હેટ્ઠા વુત્તત્થમેવ. વસામિ વિપિને અહન્તિ વિવેકવાસો અહં વસામીતિ સમ્બન્ધો. સેસં ઉત્તાનત્થમેવાતિ.

ભિસાલુવદાયકત્થેરઅપદાનવણ્ણના સમત્તા.

છટ્ઠભાણવારવણ્ણના નિટ્ઠિતા.

૫. એકસઞ્ઞકત્થેરઅપદાનવણ્ણના

ખણ્ડો નામાસિ નામેનાતિઆદિકં આયસ્મતો એકસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો વિઞ્ઞુતં પત્તો રતનત્તયે પસન્નમાનસો તસ્સ સત્થુનો ખણ્ડં નામ અગ્ગસાવકં ભિક્ખાય ચરમાનં દિસ્વા સદ્દહિત્વા પિણ્ડપાતમદાસિ. સો તેન પુઞ્ઞકમ્મેન દેવમનુસ્સસમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં એકસ્મિં કુલગેહે નિબ્બત્તો વિઞ્ઞુતં પત્તો સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા નચિરસ્સેવ અરહા અહોસિ. સો એકદિવસં પિણ્ડપાતસ્સ સઞ્ઞં મનસિકરિત્વા પટિલદ્ધવિસેસત્તા એકસઞ્ઞકત્થેરોતિ પાકટો.

૧૮. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ખણ્ડો નામાસિ નામેનાતિઆદિમાહ. તત્થ તસ્સ અગ્ગસાવકત્થેરસ્સ કિલેસાનં ખણ્ડિતત્તા ખણ્ડોતિ નામં. સેસં સબ્બત્થ ઉત્તાનમેવાતિ.

એકસઞ્ઞકત્થેરઅપદાનવણ્ણના સમત્તા.

૬. તિણસન્થરદાયકત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો તિણસન્થરદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં કુલગેહે નિબ્બત્તો બુદ્ધુપ્પાદતો પગેવ ઉપ્પન્નત્તા ઘરાવાસં પહાય તાપસપબ્બજ્જં પબ્બજિત્વા હિમવન્તસ્સ અવિદૂરે એકં સરં નિસ્સાય પટિવસતિ. તસ્મિં સમયે તિસ્સો ભગવા તસ્સાનુકમ્પાય આકાસેન અગમાસિ. અથ ખો સો તાપસો આકાસતો ઓરુય્હ ઠિતં તં ભગવન્તં દિસ્વા પસન્નમાનસો તિણં લાયિત્વા તિણસન્થરં કત્વા નિસીદાપેત્વા બહુમાનાદરેન પઞ્ચપતિટ્ઠિતેન વન્દિત્વા પટિકુટિકો હુત્વા પક્કામિ. સો યાવતાયુકં ઠત્વા તતો ચવિત્વા દેવમનુસ્સેસુ સંસરન્તો અનેકવિધસમ્પત્તિં અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિપ્પત્તો સત્થરિ પસીદિત્વા પબ્બજિતો નચિરસ્સેવ અરહા અહોસિ.

૨૨. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. તં હેટ્ઠા વુત્તત્થમેવ. મહાજાતસ્સરોતિ એત્થ પન સરન્તિ એત્થ પાનીયત્થિકા દ્વિપદચતુપ્પદાદયો સત્તાતિ સરં, અથ વા સરન્તિ એત્થ નદીકન્દરાદયોતિ સરં, મહન્તો ચ સો સયમેવ જાતત્તા સરો ચેતિ મહાજાતસ્સરો. અનોતત્તછદ્દન્તદહાદયો વિય અપાકટનામત્તા ‘‘મહાજાતસ્સરો’’તિ વુત્તોતિ દટ્ઠબ્બો. સતપત્તેહિ સઞ્છન્નોતિ એકેકસ્મિં પુપ્ફે સતસતપત્તાનં વસેન સતપત્તો, સતપત્તસેતપદુમેહિ સઞ્છન્નો ગહનીભૂતોતિ અત્થો. નાનાસકુણમાલયોતિ અનેકે હંસકુક્કુટકુક્કુહદેણ્ડિભાદયો એકતો કુણન્તિ સદ્દં કરોન્તીતિ સકુણાતિ લદ્ધનામાનં પક્ખીનં આલયો આધારભૂતોતિ અત્થો. સેસં સબ્બત્થ ઉત્તાનત્થમેવાતિ.

તિણસન્થરદાયકત્થેરઅપદાનવણ્ણના સમત્તા.

૭. સૂચિદાયકત્થેરઅપદાનવણ્ણના

તિંસકપ્પસહસ્સમ્હીતિઆદિકં આયસ્મતો સૂચિદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સુમેધસ્સ ભગવતો કાલે એકસ્મિં કુલગેહે નિબ્બત્તો વુદ્ધિમન્વાય ભગવતો ચીવરકમ્મં કાતું પઞ્ચ સૂચિયો અદાસિ. સો તેન પુઞ્ઞેન દેવમનુસ્સેસુ પુઞ્ઞમનુભવિત્વા વિચરન્તો ઉપ્પન્નુપ્પન્નભવે તિક્ખપઞ્ઞો હુત્વા પાકટો ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજન્તો તિક્ખપઞ્ઞતાય ખુરગ્ગેયેવ અરહત્તં પાપુણિ.

૩૦. સો અપરભાગે પુઞ્ઞં પચ્ચવેક્ખન્તો તં દિસ્વા સોમનસ્સજાતો પુબ્બચરિતાપદાનં પકાસેન્તો તિંસકપ્પસહસ્સમ્હીતિઆદિમાહ. અન્તરન્તરં પનેત્થ સુવિઞ્ઞેય્યમેવ.

૩૧. પઞ્ચસૂચી મયા દિન્નાતિ એત્થ સૂચતિ છિદ્દં કરોતિ વિજ્ઝતીતિ સૂચિ, પઞ્ચમત્તા સૂચી પઞ્ચસૂચી મયા દિન્નાતિ અત્થો. સેસં સુવિઞ્ઞેય્યમેવાતિ.

સૂચિદાયકત્થેરઅપદાનવણ્ણના સમત્તા.

૮. પાટલિપુપ્ફિયત્થેરઅપદાનવણ્ણના

સુવણ્ણવણ્ણં સમ્બુદ્ધન્તિઆદિકં આયસ્મતો પાટલિપુપ્ફિયત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં કુલગેહે સેટ્ઠિપુત્તો હુત્વા નિબ્બત્તો વુદ્ધિપ્પત્તો કુસલાકુસલઞ્ઞૂ સત્થરિ પસીદિત્વા પાટલિપુપ્ફં ગહેત્વા સત્થુ પૂજેસિ. સો તેન પુઞ્ઞેન બહુધા સુખસમ્પત્તિયો અનુભવન્તો દેવમનુસ્સેસુ સંસરન્તો ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સત્થરિ પસન્નો પબ્બજિત્વા નચિરસ્સેવ અરહા અહોસિ.

૩૬. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તત્થ અન્તરાપણેતિ આ સમન્તતો હિરઞ્ઞસુવણ્ણાદિકં ભણ્ડં પણેન્તિ વિક્કિણન્તિ પત્થરન્તિ એત્થાતિ આપણં, આપણસ્સ અન્તરં વીથીતિ અન્તરાપણં, તસ્મિં અન્તરાપણે. સુવણ્ણવણ્ણં કઞ્ચનગ્ઘિયસંકાસં દ્વત્તિંસવરલક્ખણં સમ્બુદ્ધં દિસ્વા પાટલિપુપ્ફં પૂજેસિન્તિ અત્થો. સેસં સબ્બત્થ ઉત્તાનત્થમેવાતિ.

પાટલિપુપ્ફિયત્થેરઅપદાનવણ્ણના સમત્તા.

૯. ઠિતઞ્જલિયત્થેરઅપદાનવણ્ણના

મિગલુદ્દો પુરે આસિન્તિઆદિકં આયસ્મતો ઠિતઞ્જલિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થુપ્પન્નભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે પુરાકતેન એકેન કમ્મચ્છિદ્દેન નેસાદયોનિયં નિબ્બત્તિત્વા વિઞ્ઞુતં પત્તો મિગસૂકરાદયો મારેત્વા નેસાદકમ્મેન અરઞ્ઞે વાસં કપ્પેસિ. તસ્મિં સમયે તિસ્સો ભગવા તસ્સાનુકમ્પાય હિમવન્તં અગમાસિ. સો તં દ્વત્તિંસવરલક્ખણેહિ અસીતાનુબ્યઞ્જનબ્યામપ્પભાહિ ચ જલમાનં ભગવન્તં દિસ્વા સોમનસ્સજાતો પણામં કત્વા ગન્ત્વા પણ્ણસન્થરે નિસીદિ. તસ્મિં ખણે દેવો ગજ્જન્તો અસનિ પતિ, તતો મરણસમયે બુદ્ધમનુસ્સરિત્વા પુનઞ્જલિમકાસિ. સો તેન પુઞ્ઞેન સુખેત્તે કતકુસલત્તા અકુસલવિપાકં પટિબાહિત્વા સગ્ગે નિબ્બત્તો કામાવચરસમ્પત્તિયો અનુભવિત્વા મનુસ્સેસુ મનુસ્સસમ્પત્તિયો ચ અનુભવિત્વા અપરભાગે ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય પુરાકતવાસનાય સત્થરિ પસીદિત્વા પબ્બજિતો નચિરસ્સેવ અરહા અહોસિ.

૪૨. સો તતો પરં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો મિગલુદ્દો પુરે આસિન્તિઆદિમાહ. તત્થ મિગલુદ્દોતિ મિગાનં મારણં ઉપગચ્છતીતિ મિગલુદ્દો. મિગન્તિ સીઘં વાતવેગેન ગચ્છન્તિ ધાવન્તીતિ મિગા, તેસં મિગાનં મારણે લુદ્દો દારુણો લોભીતિ મિગલુદ્દો. સો અહં પુરે ભગવતો દસ્સનસમયે મિગલુદ્દો આસિં અહોસિન્તિ અત્થો. અરઞ્ઞે કાનનેતિ અરતિ ગચ્છતિ મિગસમૂહો એત્થાતિ અરઞ્ઞં, અથ વા આ સમન્તતો રજ્જન્તિ તત્થ વિવેકાભિરતા બુદ્ધપચ્ચેકબુદ્ધાદયો મહાસારપ્પત્તા સપ્પુરિસાતિ અરઞ્ઞં. કા કુચ્છિતાકારેન વા ભયાનકાકારેન વા નદન્તિ સદ્દં કરોન્તિ, આનન્તિ વિન્દન્તીતિ વા કાનનં, તસ્મિં અરઞ્ઞે કાનને મિગલુદ્દો પુરે આસિન્તિ સમ્બન્ધો. તત્થ અદ્દસં સમ્બુદ્ધન્તિ તત્થ તસ્મિં અરઞ્ઞે ઉપગતં સમ્બુદ્ધં અદ્દસં અદ્દક્ખિન્તિ અત્થો. દસ્સનં પુરે અહોસિ અવિદૂરે, તસ્મા મનોદ્વારાનુસારેન ચક્ખુવિઞ્ઞાણં પુરેચારિકં કાયવિઞ્ઞાણસમઙ્ગિં પાપેતિ અપ્પેતીતિ અત્થો.

૪૪. તતો મે અસનીપાતોતિ આ સમન્તતો સનન્તો ગજ્જન્તો પતતીતિ અસનિ, અસનિયા પાતો પતનં અસનીપાતો, દેવદણ્ડોતિ અત્થો. સેસં સબ્બત્થ ઉત્તાનત્થમેવાતિ.

ઠિતઞ્જલિયત્થેરઅપદાનવણ્ણના સમત્તા.

૧૦. તિપદુમિયત્થેરઅપદાનવણ્ણના

પદુમુત્તરો નામ જિનોતિઆદિકં આયસ્મતો તિપદુમિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે હંસવતિયં માલાકારકુલગેહે નિબ્બત્તો વુદ્ધિપ્પત્તો માલાકારકમ્મં કત્વા વસન્તો એકદિવસં અનેકવિધાનિ જલજથલજપુપ્ફાનિ ગહેત્વા રઞ્ઞો સન્તિકં ગન્તુકામો એવં ચિન્તેસિ – ‘‘રાજા ઇમાનિ તાવ પુપ્ફાનિ દિસ્વા પસન્નો સહસ્સં વા ધનં ગામાદિકં વા દદેય્ય, લોકનાથં પન પૂજેત્વા નિબ્બાનામતધનં લભામિ, કિં મે એતેસુ સુન્દર’’ન્તિ તેન ‘‘ભગવન્તં પૂજેત્વા સગ્ગમોક્ખસમ્પત્તિયો નિપ્ફાદેતું વટ્ટતી’’તિ ચિન્તેત્વા વણ્ણવન્તં અતીવ રત્તપુપ્ફત્તયં ગહેત્વા પૂજેસિ. તાનિ ગન્ત્વા આકાસં છાદેત્વા પત્થરિત્વા અટ્ઠંસુ. નગરવાસિનો અચ્છરિયબ્ભુતચિત્તજાતા ચેલુક્ખેપસહસ્સાનિ પવત્તયિંસુ. તં દિસ્વા ભગવા અનુમોદનં અકાસિ. સો તેન પુઞ્ઞેન દેવમનુસ્સેસુ સમ્પત્તિયો અનુભવિત્વા ઇમસ્મિં બુદ્ધુપ્પાદે ગહપતિકુલે નિબ્બત્તો વુદ્ધિમન્વાય સત્થરિ પસીદિત્વા ધમ્મં સુત્વા પટિલદ્ધસદ્ધો પબ્બજિત્વા નચિરસ્સેવ અરહા અહોસિ.

૪૮. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરો નામ જિનોતિઆદિમાહ. તસ્સત્થો હેટ્ઠા વુત્તોવ. સબ્બધમ્માન પારગૂતિ સબ્બેસં નવલોકુત્તરધમ્માનં પારં નિબ્બાનં ગતો પચ્ચક્ખં કતોતિ અત્થો. દન્તો દન્તપરિવુતોતિ સયં કાયવાચાદીહિ દન્તો એતદગ્ગે ઠપિતેહિ સાવકેહિ પરિવુતોતિ અત્થો. સેસં સબ્બત્થ સમ્બન્ધવસેન ઉત્તાનત્થમેવાતિ.

તિપદુમિયત્થેરઅપદાનવણ્ણના સમત્તા.

અટ્ઠમવગ્ગવણ્ણના સમત્તા.