૪. સન્નિટ્ઠાપકત્થેરઅપદાનવણ્ણના

અરઞ્ઞે કુટિકં કત્વાતિઆદિકં આયસ્મતો સન્નિટ્ઠાપકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરબન્ધનેન બદ્ધો ઘરાવાસે આદીનવં દિસ્વા વત્થુકામકિલેસકામે પહાય હિમવન્તસ્સ અવિદૂરે પબ્બતન્તરે અરઞ્ઞવાસં કપ્પેસિ. તસ્મિં કાલે પદુમુત્તરો ભગવા વિવેકકામતાય તં ઠાનં પાપુણિ. અથ સો તાપસો ભગવન્તં દિસ્વા પસન્નમાનસો વન્દિત્વા નિસીદનત્થાય તિણસન્થરં પઞ્ઞાપેત્વા અદાસિ. તત્થ નિસિન્નં ભગવન્તં અનેકેહિ મધુરેહિ તિણ્ડુકાદીહિ ફલાફલેહિ સન્તપ્પેસિ. સો તેન પુઞ્ઞકમ્મેન તતો ચુતો દેવેસુ ચ મનુસ્સેસુ ચ અપરાપરં સંસરન્તો દ્વે સમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો સદ્ધાસમ્પન્નો પબ્બજિતો વિપસ્સનં વડ્ઢેત્વા નચિરસ્સેવ અરહા અહોસિ. ખુરગ્ગે અરહત્તફલપ્પત્તિયં વિય નિરુસ્સાહેનેવ સન્તિપદસઙ્ખાતે નિબ્બાને સુટ્ઠુ ઠિતત્તા સન્નિટ્ઠાપકત્થેરોતિ પાકટો.

૭૦. અરહા પન હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અરઞ્ઞે કુટિકં કત્વાતિઆદિમાહ. તત્થ અરઞ્ઞેતિ સીહબ્યગ્ઘાદીનં ભયેન મનુસ્સા એત્થ ન રજ્જન્તિ ન રમન્તિ ન અલ્લીયન્તીતિ અરઞ્ઞં, તસ્મિં અરઞ્ઞે. કુટિકન્તિ તિણચ્છદનકુટિકં કત્વા પબ્બતન્તરે વસામિ વાસં કપ્પેસિન્તિ અત્થો. લાભેન ચ અલાભેન ચ યસેન ચ અયસેન ચ સન્તુટ્ઠો વિહાસિન્તિ સમ્બન્ધો.

૭૨. જલજુત્તમનામકન્તિ જલે જાતં જલજં, પદુમં, જલજં ઉત્તમં જલજુત્તમં, જલજુત્તમેન સમાનં નામં યસ્સ સો જલજુત્તમનામકો, તં જલજુત્તમનામકં બુદ્ધન્તિ અત્થો. સેસં પાળિનયાનુયોગેન સુવિઞ્ઞેય્યમેવાતિ.

સન્નિટ્ઠાપકત્થેરઅપદાનવણ્ણના સમત્તા.