૬. ધૂપદાયકત્થેરઅપદાનવણ્ણના

સિદ્ધત્થસ્સ ભગવતોતિઆદિકં આયસ્મતો ધૂપદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે કુલગેહે નિબ્બત્તો સિદ્ધત્થે ભગવતિ ચિત્તં પસાદેત્વા તસ્સ ભગવતો ગન્ધકુટિયં ચન્દનાગરુકાળાનુસારિઆદિના કતેહિ અનેકેહિ ધૂપેહિ ધૂપપૂજં અકાસિ. સો તેન પુઞ્ઞેન દેવેસુ ચ મનુસ્સેસુ ચ ઉભયસમ્પત્તિયો અનુભવન્તો નિબ્બત્તનિબ્બત્તભવે પૂજનીયો હુત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો પુઞ્ઞસમ્ભારાનુભાવેન સાસને પબ્બજિત્વા વિપસ્સનં વડ્ઢેત્વા અરહત્તં પત્વા કતધૂપપૂજાપુઞ્ઞત્તા નામેન ધૂપદાયકત્થેરોતિ સબ્બત્થ પાકટો. સો પત્તઅરહત્તફલો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં દસ્સેન્તો સિદ્ધત્થસ્સ ભગવતોતિઆદિમાહ. સિદ્ધો પરિપુણ્ણો સબ્બઞ્ઞુતઞ્ઞાણાદિગુણસઙ્ખાતો અત્થો પયોજનં યસ્સ ભગવતો સોયં સિદ્ધત્થો, તસ્સ સિદ્ધત્થસ્સ ભગવતો ભગ્યાદિગુણવન્તસ્સ લોકજેટ્ઠસ્સ સકલલોકુત્તમસ્સ તાદિનો ઇટ્ઠાનિટ્ઠેસુ તાદિસસ્સ અચલસભાવસ્સાતિ અત્થો. સેસં ઉત્તાનત્થમેવાતિ.

ધૂપદાયકત્થેરઅપદાનવણ્ણના સમત્તા.