૯. તિકિચ્છકત્થેરઅપદાનવણ્ણના

નગરે બન્ધુમતિયાતિઆદિકં આયસ્મતો તિકિચ્છકત્થેરસ્સ અપદાનં. અયમ્પાયસ્મા પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે બન્ધુમતીનગરે વેજ્જકુલે નિબ્બત્તો બહુસ્સુતો સુસિક્ખિતો વેજ્જકમ્મે છેકો બહૂ રોગિનો તિકિચ્છન્તો વિપસ્સિસ્સ ભગવતો ઉપટ્ઠાકસ્સ અસોકનામત્થેરસ્સ રોગં તિકિચ્છિ. સો તેન પુઞ્ઞેન દેવમનુસ્સેસુ અપરાપરં સુખં અનુભવન્તો નિબ્બત્તનિબ્બત્તભવે અરોગો દીઘાયુકો સુવણ્ણવણ્ણસરીરો અહોસિ.

૩૯. સો ઇમસ્મિં બુદ્ધુપ્પાદે સાવત્થિયં ગહપતિકુલે નિબ્બત્તો વુદ્ધિમન્વાય સબ્બસિપ્પેસુ નિપ્ફત્તિં પત્તો અરોગો સુખિતો વિભવસમ્પન્નો રતનત્તયે પસન્નો સત્થુ ધમ્મદેસનં સુત્વા પટિલદ્ધસદ્ધો ઘરાવાસં પહાય પબ્બજિત્વા નચિરસ્સેવ અરહા હુત્વા પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો નગરે બન્ધુમતિયાતિઆદિમાહ. તં સબ્બં હેટ્ઠા વુત્તનયત્તા ઉત્તાનત્થમેવાતિ.

તિકિચ્છકત્થેરઅપદાનવણ્ણના સમત્તા.