૧૮. કુમુદવગ્ગો

૧. કુમુદમાલિયત્થેરઅપદાનવણ્ણના

પબ્બતે હિમવન્તમ્હીતિઆદિકં આયસ્મતો કુમુદમાલિયત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે હિમવન્તપબ્બતસમીપે જાતસ્સરસ્સ આસન્ને રક્ખસો હુત્વા નિબ્બત્તો અત્થદસ્સિં ભગવન્તં તત્થ ઉપગતં દિસ્વા પસન્નમાનસો કુમુદપુપ્ફાનિ ઓચિનિત્વા ભગવન્તં પૂજેસિ. ભગવા અનુમોદનં કત્વા પક્કામિ.

૧. સો તેન પુઞ્ઞેન તતો ચવિત્વા દેવલોકં ઉપપન્નો છ કામાવચરસમ્પત્તિયો અનુભવિત્વા મનુસ્સેસુ ચ ચક્કવત્તિઆદિસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિપ્પત્તો રતનત્તયે પસન્નો પબ્બજિત્વા વાયમન્તો બ્રહ્મચરિયપરિયોસાનં અરહત્તં પત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પબ્બતે હિમવન્તમ્હીતિઆદિમાહ. તત્થ તત્થજો રક્ખસો આસિન્તિ તસ્મિં જાતસ્સરસમીપે જાતો નિબ્બત્તો રક્ખસો પરરુધિરમંસખાદકો નિદ્દયો ઘોરરૂપો ભયાનકસભાવો મહાબલો મહાથામો કક્ખળો યક્ખો આસિં અહોસિન્તિ અત્થો.

કુમુદં પુપ્ફતે તત્થાતિ તસ્મિં મહાસરે સૂરિયરંસિયા અભાવે સતિ સાયન્હે મકુળિતં કુઞ્ચિતાકારેન નિપ્પભં અવણ્ણં હોતીતિ ‘‘કુમુદ’’ન્તિ લદ્ધનામં પુપ્ફં પુપ્ફતે વિકસતીતિ અત્થો. ચક્કમત્તાનિ જાયરેતિ તાનિ પુપ્ફાનિ રથચક્કપમાણાનિ હુત્વા જાયન્તીતિ અત્થો. સેસં સુવિઞ્ઞેય્યમેવાતિ.

કુમુદમાલિયત્થેરઅપદાનવણ્ણના સમત્તા.

૨. નિસ્સેણિદાયકત્થેરઅપદાનવણ્ણના

કોણ્ડઞ્ઞસ્સ ભગવતોતિઆદિકં આયસ્મતો નિસ્સેણિદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો અનેકાસુ જાતીસુ વિવટ્ટૂપનિસ્સયાનિ પુઞ્ઞાનિ ઉપચિનન્તો કોણ્ડઞ્ઞસ્સ ભગવતો કાલે વડ્ઢકિકુલે નિબ્બત્તો સદ્ધો પસન્નો ભગવતો ધમ્મદેસનં સુત્વા પસન્નમાનસો ભગવતો વસનપાસાદસ્સારોહનત્થાય સારકટ્ઠમયં નિસ્સેણિં કત્વા ઉસ્સાપેત્વા ઠપેસિ. ભગવા તસ્સ પસાદસંવડ્ઢનત્થાય પસ્સન્તસ્સેવ ઉપરિપાસાદં આરુહિ. સો અતીવ પસન્નો તેનેવ પીતિસોમનસ્સેન કાલં કત્વા દેવલોકે નિબ્બત્તો તત્થ દિબ્બસમ્પત્તિં અનુભવિત્વા મનુસ્સેસુ જાયમાનો નિસ્સેણિદાનનિસ્સન્દેન ઉચ્ચકુલે નિબ્બત્તો મનુસ્સસુખં અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો સત્થુ ધમ્મદેસનં સુત્વા સદ્ધાજાતો પબ્બજિતો નચિરસ્સેવ અરહા અહોસિ.

૯. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો કોણ્ડઞ્ઞસ્સ ભગવતોતિઆદિમાહ. તત્થ કોણ્ડઞ્ઞસ્સાતિ કુચ્છિતો હુત્વા ડેતિ પવત્તતીતિ કોણ્ડો, લામકસત્તો, કોણ્ડતો અઞ્ઞોતિ કોણ્ડઞ્ઞો, અલામકો ઉત્તમપુરિસોતિ અત્થો. અથ વા બ્રાહ્મણગોત્તેસુ કોણ્ડઞ્ઞગોત્તે ઉપ્પન્નત્તા ‘‘કોણ્ડઞ્ઞો’’તિ ગોત્તવસેન તસ્સ નામં, તસ્સ કોણ્ડઞ્ઞસ્સ. સેસં પાકટમેવાતિ.

નિસ્સેણિદાયકત્થેરઅપદાનવણ્ણના સમત્તા.

૩. રત્તિપુપ્ફિયત્થેરઅપદાનવણ્ણના

મિગલુદ્દો પુરે આસિન્તિઆદિકં આયસ્મતો રત્તિપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે નેસાદકુલે ઉપ્પન્નો મિગવધાય અરઞ્ઞે વિચરમાનો તસ્સ કારુઞ્ઞેન અરઞ્ઞે ચરમાનં વિપસ્સિં ભગવન્તં દિસ્વા પસન્નમાનસો પુપ્ફિતં રત્તિકં નામ પુપ્ફં કુટજપુપ્ફઞ્ચ સહ વણ્ટેન ઓચિનિત્વા સોમનસ્સચિત્તેન પૂજેસિ. ભગવા અનુમોદનં કત્વા પક્કામિ.

૧૩. સો તેનેવ પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો રતનત્તયે પસન્નો સત્થુ ધમ્મદેસનં સુત્વા કામેસુ આદીનવં દિસ્વા પબ્બજિત્વા નચિરસ્સેવ અરહત્તં પત્તો અત્તનો પુબ્બકમ્મં સરિત્વા ‘‘નેસાદભૂતેન મયા કતકુસલં સુન્દર’’ન્તિ સોમનસ્સજાતો પુબ્બચરિતાપદાનં પકાસેન્તો મિગલુદ્દો પુરે આસિન્તિઆદિમાહ. તત્થ મિગાનં લુદ્દો સાહસિકો મારકોતિ મિગલુદ્દો, મિગેસુ વા લુદ્દો લોભીતિ મિગલુદ્દો, નેસાદો આસિં પુરેતિ અત્થો.

૧૪. રત્તિકં પુપ્ફિતં દિસ્વાતિ પદુમપુપ્ફાદીનિ અનેકાનિ પુપ્ફાનિ સૂરિયરંસિસમ્ફસ્સેન દિવા પુપ્ફન્તિ રત્તિયં મકુળિતાનિ હોન્તિ. જાતિસુમનમલ્લિકાદીનિ અનેકાનિ પુપ્ફાનિ પન રત્તિયં પુપ્ફન્તિ નો દિવા. તસ્મા રત્તિયં પુપ્ફનતો રત્તિપુપ્ફનામકાનિ અનેકાનિ સુગન્ધપુપ્ફાનિ ચ કુટજપુપ્ફાનિ ચ ગહેત્વા પૂજેસિન્તિ અત્થો. સેસં ઉત્તાનત્થમેવાતિ.

રત્તિપુપ્ફિયત્થેરઅપદાનવણ્ણના સમત્તા.

૪. ઉદપાનદાયકત્થેરઅપદાનવણ્ણના

વિપસ્સિનો ભગવતોતિઆદિકં આયસ્મતો ઉદપાનદાયકત્થેરસ્સ અપદાનં. અયમ્પિ થેરો પુરિમમુનિવરેસુ કતાધિકારો અનેકેસુ ભવેસુ કતપુઞ્ઞસઞ્ચયો વિપસ્સિસ્સ ભગવતો કાલે કુલગેહે નિબ્બત્તો વુદ્ધિપ્પત્તો ‘‘પાનીયદાનં મયા દાતબ્બં, તઞ્ચ નિરન્તરં કત્વા પવત્તેતું વટ્ટતી’’તિ ચિન્તેત્વા એકં કૂપં ખનાપેત્વા ઉદકસમ્પત્તકાલે ઇટ્ઠકાહિ ચિનાપેત્વા થિરં કત્વા તત્થ ઉટ્ઠિતેન ઉદકેન પુણ્ણં તં ઉદપાનં વિપસ્સિસ્સ ભગવતો નિય્યાદેસિ. ભગવા પાનીયદાનાનિસંસદીપકં અનુમોદનં અકાસિ. સો તેન પુઞ્ઞેન દેવમનુસ્સેસુ સંસરન્તો નિબ્બત્તનિબ્બત્તટ્ઠાને પોક્ખરણીઉદપાનપાનીયાદિસમ્પન્નો સુખમનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો વુદ્ધિમન્વાય સદ્ધો પસન્નો પબ્બજિત્વા નચિરસ્સેવ અરહા અહોસિ.

૧૮. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો વિપસ્સિનો ભગવતોતિઆદિમાહ. તત્થ ઉદપાનો કતો મયાતિ ઉદકં પિવન્તિ એત્થાતિ ઉદપાનો, કૂપપોક્ખરણીતળાકાનમેતં અધિવચનં. સો ઉદપાનો કૂપો વિપસ્સિસ્સ ભગવતો અત્થાય કતો ખનિતોતિ અત્થો. સેસં ઉત્તાનત્થમેવાતિ.

ઉદપાનદાયકત્થેરઅપદાનવણ્ણના સમત્તા.

૫. સીહાસનદાયકત્થેરઅપદાનવણ્ણના

નિબ્બુતે લોકનાથમ્હીતિઆદિકં આયસ્મતો સીહાસનદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે નિબ્બાનાધિગમત્થાય કતપુઞ્ઞૂપચયો પદુમુત્તરસ્સ ભગવતો કાલે ગહપતિકુલે નિબ્બત્તો વિઞ્ઞુતં પત્તો સત્થુ ધમ્મદેસનં સુત્વા રતનત્તયે પસન્નો તસ્મિં ભગવતિ પરિનિબ્બુતે સત્તહિ રતનેહિ ખચિતં સીહાસનં કારાપેત્વા બોધિરુક્ખં પૂજેસિ, બહૂહિ માલાગન્ધધૂપેહિ ચ પૂજેસિ.

૨૧. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા સબ્બત્થ પૂજિતો ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વુદ્ધિપ્પત્તો ઘરાવાસં વસન્તો સત્થુ ધમ્મદેસનં સુત્વા પસન્નમાનસો ઞાતિવગ્ગં પહાય પબ્બજિતો નચિરસ્સેવ અરહા હુત્વા પુબ્બૂપચિતકુસલસમ્ભારં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો નિબ્બુતે લોકનાથમ્હીતિઆદિમાહ. તત્થ સીહાસનમદાસહન્તિ સીહરૂપહિરઞ્ઞસુવણ્ણરતનેહિ ખચિતં આસનં સીહાસનં, સીહસ્સ વા અભીતસ્સ ભગવતો નિસિન્નારહં, સીહં વા સેટ્ઠં ઉત્તમં આસનન્તિ સીહાસનં, તં અહં અદાસિં, બોધિરુક્ખં પૂજેસિન્તિ અત્થો. સેસં સુવિઞ્ઞેય્યમેવાતિ.

સીહાસનદાયકત્થેરઅપદાનવણ્ણના સમત્તા.

૬. મગ્ગદત્તિકત્થેરઅપદાનવણ્ણના

અનોમદસ્સી ભગવાતિઆદિકં આયસ્મતો મગ્ગદત્તિકત્થેરસ્સ અપદાનં. અયમ્પાયસ્મા પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અનોમદસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા વસન્તો અનોમદસ્સિં ભગવન્તં આકાસે ચઙ્કમન્તં પાદુદ્ધારે પાદુદ્ધારચઙ્કમનટ્ઠાને પુપ્ફાનં વિકિરણં અચ્છરિયઞ્ચ દિસ્વા પસન્નમાનસો પુપ્ફાનિ આકાસે ઉક્ખિપિ, તાનિ વિતાનં હુત્વા અટ્ઠંસુ.

૨૬. સો તેન પુઞ્ઞેન સુગતીસુયેવ સંસરન્તો સબ્બત્થ પૂજિતો સુખં અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો કમેન યોબ્બઞ્ઞં પાપુણિત્વા સદ્ધાજાતો પબ્બજિત્વા વત્તસમ્પન્નો નચિરસ્સેવ અરહત્તં પત્તો ચઙ્કમનસ્સ પૂજિતત્તા મગ્ગદત્તિકત્થેરોતિ પાકટો. સો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અનોમદસ્સી ભગવાતિઆદિમાહ. દિટ્ઠધમ્મસુખત્થાયાતિ ઇમસ્મિં અત્તભાવે ચઙ્કમનેન સરીરસલ્લહુકાદિસુખં પટિચ્ચાતિ અત્થો. અબ્ભોકાસમ્હિ ચઙ્કમીતિ અબ્ભોકાસે અઙ્ગણટ્ઠાને ચઙ્કમિ, પદવિક્ખેપં પદસઞ્ચારં અકાસીતિ અત્થો.

ઉદ્ધતે પાદે પુપ્ફાનીતિ ચઙ્કમન્તેન પાદે ઉદ્ધતે પદુમુપ્પલાદીનિ પુપ્ફાનિ પથવિતો ઉગ્ગન્ત્વા ચઙ્કમે વિકિરિંસૂતિ અત્થો. સોભં મુદ્ધનિ તિટ્ઠરેતિ બુદ્ધસ્સ મુદ્ધનિ સીસે સોભયમાના તાનિ તિટ્ઠન્તીતિ અત્થો. સેસં સુવિઞ્ઞેય્યમેવાતિ.

મગ્ગદત્તિકત્થેરઅપદાનવણ્ણના સમત્તા.

૭. એકદીપિયત્થેરઅપદાનવણ્ણના

પદુમુત્તરસ્સ મુનિનોતિઆદિકં આયસ્મતો એકદીપિયત્થેરસ્સ અપદાનં. અયમ્પાયસ્મા પુરિમજિનસેટ્ઠેસુ કતકુસલસમ્ભારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે ગહપતિકુલે નિબ્બત્તો વુદ્ધિપ્પત્તો સદ્ધો પસન્નો ભગવતો સલલમહાબોધિમ્હિ એકપદીપં પૂજેસિ, થાવરં કત્વા નિચ્ચમેકપદીપપૂજનત્થાય તેલવટ્ટં પટ્ઠપેસિ. સો તેન પુઞ્ઞેન દેવમનુસ્સેસુ સંસરન્તો સબ્બત્થ જલમાનો પસન્નચક્ખુકો ઉભયસુખમનુભવિત્વા ઇમસ્મિં બુદ્ધુપ્પાદે સાવત્થિયં વિભવસમ્પન્ને એકસ્મિં કુલે નિબ્બત્તો વિઞ્ઞુતં પત્તો રતનત્તયે પસન્નો પબ્બજિત્વા નચિરસ્સેવ અરહત્તં પત્તો દીપપૂજાય લદ્ધવિસેસાધિગમત્તા એકદીપિયત્થેરોતિ પાકટો.

૩૦. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરસ્સ મુનિનોતિઆદિમાહ. તં સબ્બં ઉત્તાનત્થમેવાતિ.

એકદીપિયત્થેરઅપદાનવણ્ણના સમત્તા.

૮. મણિપૂજકત્થેરઅપદાનવણ્ણના

ઓરેન હિમવન્તસ્સાતિઆદિકં આયસ્મતો મણિપૂજકત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે એકસ્મિં કુલે નિબ્બત્તો ઘરાવાસં સણ્ઠપેત્વા તત્થાદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા હિમવન્તઓરભાગે એકિસ્સા નદિયા સમીપે પણ્ણસાલં કારેત્વા વસન્તો વિવેકકામતાય તસ્સાનુકમ્પાય ચ તત્થ ઉપગતં પદુમુત્તરં ભગવન્તં દિસ્વા પસન્નમાનસો મણિપલ્લઙ્કં ભગવતો પૂજેસિ. ભગવા તસ્સ પસાદવડ્ઢનત્થાય તત્થ નિસીદિ. સો ભિય્યોસોમત્તાય પસન્નો નિબ્બાનાધિગમત્થાય પત્થનં અકાસિ. ભગવા અનુમોદનં વત્વા પક્કામિ. સો તેન પુઞ્ઞેન દેવમનુસ્સેસુ સંસરન્તો સબ્બત્થ પૂજિતો સુખં અનુભવિત્વા ઇમસ્મિં બુદ્ધુપ્પાદે સાવત્થિયં વિભવસમ્પન્ને કુલે નિબ્બત્તો ઘરાવાસં વસન્તો એકદિવસં સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા નચિરસ્સેવ અરહા અહોસિ.

૩૪. સો એકદિવસં અત્તના કતકુસલં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો ઓરેન હિમવન્તસ્સાતિઆદિમાહ. તત્થ ઓરેનાતિ હિમવન્તસ્સ અપરં ભાગં વિહાય ઓરેન, ભુમ્મત્થે કરણવચનં, ઓરસ્મિં દિસાભાગેતિ અત્થો. નદિકા સમ્પવત્તથાતિ અપાકટનામધેય્યા એકા નદી સંસુટ્ઠુ પવત્તાની વહાની સન્દમાના અહોસીતિ અત્થો. તસ્સા ચાનુપખેત્તમ્હીતિ તસ્સા નદિયા અનુપખેત્તમ્હિ તીરસમીપેતિ અત્થો. સયમ્ભૂ વસતે તદાતિ યદા અહં મણિપલ્લઙ્કં પૂજેસિં, તદા અનાચરિયકો હુત્વા સયમેવ બુદ્ધભૂતો ભગવા વસતે વિહરતીતિ અત્થો.

૩૫. મણિં પગ્ગય્હ પલ્લઙ્કન્તિ મણિન્તિ ચિત્તં આરાધેતિ સોમનસ્સં કરોતીતિ મણિ, અથ વા માતિ પમાણં કરોતિ આભરણન્તિ મણિ, અથ વા મરન્તાપિ રાજયુવરાજાદયો તં ન પરિચ્ચજન્તિ તદત્થાય સઙ્ગામં કરોન્તીતિ મણિ, તં મણિં મણિમયં પલ્લઙ્કં મનોરમં સાધુ ચિત્તં સુટ્ઠુ વિચિત્તં પગ્ગય્હ ગહેત્વા બુદ્ધસેટ્ઠસ્સ અભિરોપયિં પૂજેસિન્તિ અત્થો. સેસં સબ્બં ઉત્તાનત્થમેવાતિ.

મણિપૂજકત્થેરઅપદાનવણ્ણના સમત્તા.

૯. તિકિચ્છકત્થેરઅપદાનવણ્ણના

નગરે બન્ધુમતિયાતિઆદિકં આયસ્મતો તિકિચ્છકત્થેરસ્સ અપદાનં. અયમ્પાયસ્મા પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે બન્ધુમતીનગરે વેજ્જકુલે નિબ્બત્તો બહુસ્સુતો સુસિક્ખિતો વેજ્જકમ્મે છેકો બહૂ રોગિનો તિકિચ્છન્તો વિપસ્સિસ્સ ભગવતો ઉપટ્ઠાકસ્સ અસોકનામત્થેરસ્સ રોગં તિકિચ્છિ. સો તેન પુઞ્ઞેન દેવમનુસ્સેસુ અપરાપરં સુખં અનુભવન્તો નિબ્બત્તનિબ્બત્તભવે અરોગો દીઘાયુકો સુવણ્ણવણ્ણસરીરો અહોસિ.

૩૯. સો ઇમસ્મિં બુદ્ધુપ્પાદે સાવત્થિયં ગહપતિકુલે નિબ્બત્તો વુદ્ધિમન્વાય સબ્બસિપ્પેસુ નિપ્ફત્તિં પત્તો અરોગો સુખિતો વિભવસમ્પન્નો રતનત્તયે પસન્નો સત્થુ ધમ્મદેસનં સુત્વા પટિલદ્ધસદ્ધો ઘરાવાસં પહાય પબ્બજિત્વા નચિરસ્સેવ અરહા હુત્વા પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો નગરે બન્ધુમતિયાતિઆદિમાહ. તં સબ્બં હેટ્ઠા વુત્તનયત્તા ઉત્તાનત્થમેવાતિ.

તિકિચ્છકત્થેરઅપદાનવણ્ણના સમત્તા.

૧૦. સઙ્ઘુપટ્ઠાકત્થેરઅપદાનવણ્ણના

વેસ્સભુમ્હિ ભગવતીતિઆદિકં આયસ્મતો સઙ્ઘુપટ્ઠાકત્થેરસ્સ અપદાનં. અયમ્પિ થેરો પુરિમબુદ્ધેસુ કતકુસલસમ્ભારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો વેસ્સભુસ્સ ભગવતો કાલે તસ્સારામિકસ્સ પુત્તો હુત્વા નિબ્બત્તો વિઞ્ઞુતં પત્વા સદ્ધો પસન્નો વિહારેસુ આરામિકકમ્મં કરોન્તો સક્કચ્ચં સઙ્ઘં ઉપટ્ઠાસિ. સો તેનેવ કુસલકમ્મેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં ગહપતિકુલે નિબ્બત્તો વુદ્ધિપ્પત્તો વિભવસમ્પન્નો સુખપ્પત્તો પાકટો સત્થુ ધમ્મદેસનં સુત્વા સાસને પસન્નો પબ્બજિત્વા વત્તસમ્પન્નો સાસનં સોભયમાનો વિપસ્સનં વડ્ઢેન્તો નચિરસ્સેવ સહ પટિસમ્ભિદાહિ અરહત્તં પત્તો છળભિઞ્ઞો પુબ્બે કતકુસલકમ્મવસેન સઙ્ઘુપટ્ઠાકત્થેરોતિ પાકટો અહોસિ.

૪૫. સો એકદિવસં ‘‘પુબ્બે મયા કિં નામ કમ્મં કત્વા અયં લોકુત્તરસમ્પત્તિ લદ્ધા’’તિ અત્તનો પુબ્બકમ્મં સરિત્વા પચ્ચક્ખતો જાનિત્વા સોમનસ્સજાતો પુબ્બચરિતાપદાનં પાકટં કરોન્તો વેસ્સભુમ્હિ ભગવતીતિઆદિમાહ. તત્થ અહોસારામિકો અહન્તિ અહં વેસ્સભુસ્સ ભગવતો સાસને આરામિકો અહોસિન્તિ અત્થો. સેસં હેટ્ઠા વુત્તનયત્તા ઉત્તાનત્થત્તા ચ સુવિઞ્ઞેય્યમેવાતિ.

સઙ્ઘુપટ્ઠાકત્થેરઅપદાનવણ્ણના સમત્તા.

અટ્ઠારસમવગ્ગવણ્ણના સમત્તા.