૧૭. સુપારિચરિયવગ્ગો

૧. સુપારિચરિયત્થેરઅપદાનવણ્ણના

પદુમો નામ નામેનાતિઆદિકં આયસ્મતો સુપારિચરિયત્થેરસ્સ અપદાનં. અયમ્પિ પુરિમમુનિપુઙ્ગવેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે યક્ખયોનિયં નિબ્બત્તો હિમવતિ યક્ખસમાગમં ગતો ભગવતો દેવયક્ખગન્ધબ્બનાગાનં ધમ્મદેસનં સુત્વા પસન્નમાનસો ઉભો હત્થે આભુજિત્વા અપ્ફોટેસિ નમસ્સિ ચ. સો તેન પુઞ્ઞેન તતો ચુતો ઉપરિ દેવલોકે ઉપ્પન્નો તત્થ દિબ્બસુખં અનુભવિત્વા મનુસ્સેસુ ચ ચક્કવતિઆદિસમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં ગહપતિકુલે નિબ્બત્તો અડ્ઢો મહદ્ધનો મહાભોગો રતનત્તયે પસન્નો સત્થુ ધમ્મદેસનં સુત્વા સદ્ધાજાતો પબ્બજિત્વા નચિરસ્સેવ અરહત્તં પાપુણિ.

૧. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમો નામ નામેનાતિઆદિમાહ. તત્થ પદુમોતિ યસ્સ પાદનિક્ખેપસમયે પથવિં ભિન્દિત્વા પદુમં ઉગ્ગન્ત્વા પાદતલં સમ્પટિચ્છતિ, તેન સઞ્ઞાણેન સો ભગવા પદુમોતિ સઙ્ખં ગતો, ઇધ પદુમુત્તરો ભગવા અધિપ્પેતો. સો ભગવા પવના વસનવિહારા અભિનિક્ખમ્મ વનમજ્ઝં પવિસિત્વા ધમ્મં દેસેતીતિ સમ્બન્ધો.

યક્ખાનં સમયોતિ દેવાનં સમાગમો આસિ અહોસીતિ અત્થો. અજ્ઝાપેક્ખિંસુ તાવદેતિ તસ્મિં દેસનાકાલે અધિઅપેક્ખિંસુ, વિસેસેન પસ્સનસીલા અહેસુન્તિ અત્થો. સેસં પાકટમેવાતિ.

સુપારિચરિયત્થેરઅપદાનવણ્ણના સમત્તા.

૨. કણવેરપુપ્ફિયત્થેરઅપદાનવણ્ણના

સિદ્ધત્થો નામ ભગવાતિઆદિકં આયસ્મતો કણવેરપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો સિદ્ધત્થસ્સ ભગવતો કાલે સુદ્દકુલે નિબ્બત્તો વુદ્ધિમન્વાય રઞ્ઞો અન્તેપુરપાલકો અહોસિ. તસ્મિં સમયે સિદ્ધત્થો ભગવા ભિક્ખુસઙ્ઘપરિવુતો રાજવીથિં પટિપજ્જિ. અથ સો અન્તેપુરપાલકો ચરમાનં ભગવન્તં દિસ્વા પસન્નમાનસો હુત્વા કણવેરપુપ્ફેન ભગવન્તં પૂજેત્વા નમસ્સમાનો અટ્ઠાસિ. સો તેન પુઞ્ઞેન સુગતિસમ્પત્તિયોયેવ અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તિત્વા વુદ્ધિપ્પત્તો સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા નચિરસ્સેવ અરહા અહોસિ.

૭. સો પત્તઅગ્ગફલો પુબ્બે કતકુસલં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો સિદ્ધત્થો નામ ભગવાતિઆદિમાહ. તં સબ્બં હેટ્ઠા વુત્તત્તા ઉત્તાનત્થમેવાતિ.

કણવેરપુપ્ફિયત્થેરઅપદાનવણ્ણના સમત્તા.

૩. ખજ્જકદાયકત્થેરઅપદાનવણ્ણના

તિસ્સસ્સ ખો ભગવતોતિઆદિકં આયસ્મતો ખજ્જકદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે સુદ્દકુલે નિબ્બત્તો ભગવન્તં દિસ્વા પસન્નમાનસો અમ્બજમ્બુઆદિમનેકં મધુરફલાફલં નાળિકેરં પૂવખજ્જકઞ્ચ અદાસિ. ભગવા તસ્સ પસાદવડ્ઢનત્થાય પસ્સન્તસ્સેવ પરિભુઞ્જિ. સો તેન પુઞ્ઞેન સુગતિસમ્પત્તિયોયેવ અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વિઞ્ઞુતં પત્વા સત્થુ ધમ્મદેસનં સુત્વા સઞ્જાતસદ્ધો પસાદબહુમાનો પબ્બજિત્વા વત્તપટિપત્તિયા સાસનં સોભેન્તો સીલાલઙ્કારપટિમણ્ડિતો નચિરસ્સેવ અરહત્તં પાપુણિ.

૧૩. સો પુબ્બકમ્મં સરન્તો ‘‘પુબ્બે મયા સુખેત્તે કુસલં કતં સુન્દર’’ન્તિ સોમનસ્સજાતો પુબ્બચરિતાપદાનં પકાસેન્તો તિસ્સસ્સ ખો ભગવતોતિઆદિમાહ. તત્થ તિસ્સોપિ ભવસમ્પત્તિયો દદમાનો જાતોતિ માતાપિતૂહિ કતનામવસેન તિસ્સો. અથ વા તીહિ સરણગમનેહિ અસ્સાસેન્તો ઓવદન્તો હેતુસમ્પન્નપુગ્ગલે સગ્ગમોક્ખદ્વયે પતિટ્ઠાપેન્તો બુદ્ધો જાતોતિ તિસ્સો. સમાપત્તિગુણાદીહિ ભગેહિ યુત્તોતિ ભગવા, તસ્સ તિસ્સસ્સ ભગવતો પુબ્બે અહં ફલં અદાસિન્તિ સમ્બન્ધો. નાળિકેરઞ્ચ પાદાસિન્તિ નાળિકાકારેન પવત્તં ફલં નાળિકેરં, તઞ્ચ ફલં અદાસિન્તિ અત્થો. ખજ્જકં અભિસમ્મતન્તિ ખાદિતબ્બં ખજ્જકં અભિ વિસેસેન મધુસક્કરાદીહિ સમ્મિસ્સં કત્વા નિપ્ફાદિતં સુન્દરં મધુરન્તિ સમ્મતં ઞાતં અભિસમ્મતં ખજ્જકઞ્ચ અદાસિન્તિ અત્થો. સેસં સુવિઞ્ઞેય્યમેવાતિ.

ખજ્જકદાયકત્થેરઅપદાનવણ્ણના સમત્તા.

૪. દેસપૂજકત્થેરઅપદાનવણ્ણના

અત્થદસ્સી તુ ભગવાતિઆદિકં આયસ્મતો દેસપૂજકત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય સદ્ધો પસન્નો બુદ્ધમામકો ધમ્મમામકો સઙ્ઘમામકો અહોસિ. તદા અત્થદસ્સી ભગવા ભિક્ખુસઙ્ઘપરિવુતો ચન્દો વિય સૂરિયો વિય ચ આકાસેન ગચ્છતિ. સો ઉપાસકો ભગવતો ગતદિસાભાગં ગન્ધમાલાદીહિ પૂજેન્તો અઞ્જલિં પગ્ગય્હ નમસ્સમાનો અટ્ઠાસિ.

૧૮. સો તેન પુઞ્ઞેન દેવલોકે નિબ્બત્તો સગ્ગસમ્પત્તિં અનુભવિત્વા મનુસ્સેસુ ચ મનુસ્સસમ્પત્તિં અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો વુદ્ધિપ્પત્તો ઉપભોગપરિભોગસમ્પન્નો સત્થુ ધમ્મદેસનં સુત્વા પસન્નમાનસો ઘરાવાસે અનલ્લીનો પબ્બજિત્વા વત્તસમ્પન્નો નચિરસ્સેવ અરહા હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો અત્થદસ્સી તુ ભગવાતિઆદિમાહ. તં હેટ્ઠા વુત્તત્થમેવ. અનિલઞ્જસેતિ ‘‘મગ્ગો પન્થો પથો પજ્જો, અઞ્જસં વટુમાયન’’ન્તિ (ચૂળનિ. પારાયનત્થુતિગાથાનિદ્દેસ ૧૦૧) પરિયાયસ્સ વુત્તત્તા અનિલસ્સ વાતસ્સ અઞ્જસં ગમનમગ્ગોતિ અનિલઞ્જસં, તસ્મિં અનિલઞ્જસે, આકાસેતિ અત્થો. સેસં ઉત્તાનત્થમેવાતિ.

દેસપૂજકત્થેરઅપદાનવણ્ણના સમત્તા.

૫. કણિકારછત્તિયત્થેરઅપદાનવણ્ણના

વેસ્સભૂ નામ સમ્બુદ્ધોતિઆદિકં આયસ્મતો કણિકારછત્તિયત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વેસ્સભુસ્સ ભગવતો કાલે કુલગેહે નિબ્બત્તો વિઞ્ઞુતં પત્તો સદ્ધાસમ્પન્નો અહોસિ. તસ્મિં સમયે વેસ્સભૂ ભગવા વિવેકકામો મહાવનં પવિસિત્વા નિસીદિ. અથ સોપિ ઉપાસકો કેનચિદેવ કરણીયેન તત્થ ગન્ત્વા ભગવન્તં અગ્ગિક્ખન્ધં વિય જલમાનં નિસિન્નં દિસ્વા પસન્નમાનસો કણિકારપુપ્ફં ઓચિનિત્વા છત્તં કત્વા ભગવતો નિસિન્નટ્ઠાને વિતાનં કત્વા પૂજેસિ, તં ભગવતો આનુભાવેન સત્તાહં અમિલાતં હુત્વા તથેવ અટ્ઠાસિ. ભગવાપિ ફલસમાપત્તિં નિરોધસમાપત્તિઞ્ચ સમાપજ્જિત્વા વિહાસિ, સો તં અચ્છરિયં દિસ્વા સોમનસ્સજાતો ભગવન્તં વન્દિત્વા અઞ્જલિં પગ્ગય્હ અટ્ઠાસિ. ભગવા સમાપત્તિતો વુટ્ઠહિત્વા વિહારમેવ અગમાસિ.

૨૩. સો તેન પુઞ્ઞેન દેવમનુસ્સેસુ સમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વુદ્ધિમન્વાય સદ્ધાસમ્પન્નો સત્થુ ધમ્મદેસનં સુત્વા ઘરાવાસે અનલ્લીનો પબ્બજિત્વા વત્તપટિપત્તિયા જિનસાસનં સોભેન્તો નચિરસ્સેવ અરહા હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો વેસ્સભૂ નામ સમ્બુદ્ધોતિઆદિમાહ. તત્થ વેસ્સભૂતિ વેસ્સે વેસ્સજને ભુનાતિ અભિભવતીતિ વેસ્સભૂ. અથ વા વેસ્સે પઞ્ચવિધમારે અભિભુનાતિ અજ્ઝોત્થરતીતિ વેસ્સભૂ. સામંયેવ બુજ્ઝિતા સચ્ચાનીતિ સમ્બુદ્ધો, નામેન વેસ્સભૂ નામ સમ્બુદ્ધોતિ અત્થો. દિવાવિહારાય મુનીતિ દિબ્બતિ પકાસેતિ તં તં વત્થું પાકટં કરોતીતિ દિવા. સૂરિયુગ્ગમનતો પટ્ઠાય યાવ અત્થઙ્ગમો, તાવ પરિચ્છિન્નકાલો, વિહરણં ચતૂહિ ઇરિયાપથેહિ પવત્તનં વિહારો, દિવાય વિહારો દિવાવિહારો, તસ્સ દિવાવિહારાય લોકજેટ્ઠો નરાસભો બુદ્ધમુનિ મહાવનં ઓગાહિત્વા પવિસિત્વાતિ અત્થો. સેસં ઉત્તાનત્થમેવાતિ.

કણિકારછત્તિયત્થેરઅપદાનવણ્ણના સમત્તા.

૬. સપ્પિદાયકત્થેરઅપદાનવણ્ણના

ફુસ્સો નામાથ ભગવાતિઆદિકં આયસ્મતો સપ્પિદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે કુલગેહે નિબ્બત્તો અહોસિ. તદા ભગવા ભિક્ખુસઙ્ઘપરિવુતો વીથિયં ચરમાનો તસ્સ ઉપાસકસ્સ ગેહદ્વારં સમ્પાપુણિ. અથ સો ઉપાસકો ભગવન્તં દિસ્વા પસન્નમાનસો વન્દિત્વા પત્તપૂરં સપ્પિતેલં અદાસિ, ભગવા અનુમોદનં કત્વા પક્કામિ. સો તેનેવ સોમનસ્સેન યાવતાયુકં ઠત્વા તતો ચુતો તેન પુઞ્ઞેન દેવલોકે ઉપ્પન્નો તત્થ દિબ્બસુખં અનુભવિત્વા મનુસ્સેસુ ચ નિબ્બત્તો ઉપ્પન્નુપ્પન્નભવે સપ્પિતેલમધુફાણિતાદિમધુરાહારસમઙ્ગી સુખં અનુભવિત્વા ઇમસ્મિં બુદ્ધુપ્પાદે સાવત્થિયં એકસ્મિં કુલે નિબ્બત્તો વુદ્ધિપ્પત્તો સદ્ધો બુદ્ધિસમ્પન્નો સત્થુ ધમ્મદેસનં સુત્વા પસન્નમાનસો પબ્બજિત્વા વત્તસમ્પન્નો નચિરસ્સેવ અરહા અહોસિ.

૨૮. સો અત્તનો પુબ્બકમ્મં સરિત્વા જાતસોમનસ્સો પુબ્બચરિતાપદાનં પકાસેન્તો ફુસ્સો નામાથ ભગવાતિઆદિમાહ. તત્થ ફુસ્સોતિ ફુસ્સનક્ખત્તયોગેન જાતત્તા માતાપિતૂહિ કતનામધેય્યેન ફુસ્સો. અથ વા નિબ્બાનં ફુસિ પસ્સિ સચ્છિ અકાસીતિ ફુસ્સો. અથ વા સમતિંસપારમિતાસત્તતિંસબોધિપક્ખિયધમ્મે સકલે ચ તેપિટકે પરિયત્તિધમ્મે ફુસિ પસ્સિ અઞ્ઞાસીતિ ફુસ્સો. ભગ્ગવા ભગ્યવા યુત્તોતિઆદિપુઞ્ઞકોટ્ઠાસસમઙ્ગિતાય ભગવા. આહુતીનં પટિગ્ગહોતિ આહુતિનો વુચ્ચન્તિ પૂજાસક્કારા, તેસં આહુતીનં પટિગ્ગહેતું અરહતીતિ આહુતીનં પટિગ્ગહો. મહાજનં નિબ્બાપેન્તો વીરો ફુસ્સો નામ ભગવા વીથિયં અથ તદા ગચ્છતેતિ સમ્બન્ધો. સેસં પાકટમેવાતિ.

સપ્પિદાયકત્થેરઅપદાનવણ્ણના સમત્તા.

૭. યૂથિકાપુપ્ફિયત્થેરઅપદાનવણ્ણના

ચન્દભાગાનદીતીરેતિઆદિકં આયસ્મતો યૂથિકાપુપ્ફિયત્થેરસ્સ અપદાનં. અયમ્પિ આયસ્મા પુરિમમુનિન્દેસુ કતાધિકારો અનેકેસુ ચ જાતિસતેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સેવ ભગવતો કાલે સુદ્દકુલે નિબ્બત્તો વુદ્ધિપ્પત્તો ચન્દભાગાય નદિયા તીરે કેનચિદેવ કરણીયેન અનુસોતં ચરમાનો ફુસ્સં ભગવન્તં ન્હાયિતુકામં અગ્ગિક્ખન્ધં વિય જલમાનં દિસ્વા સોમનસ્સજાતો તત્થ જાતં યૂથિકાપુપ્ફં ઓચિનિત્વા ભગવન્તં પૂજેસિ. ભગવા તસ્સ અનુમોદનમકાસિ.

૩૩. સો તત્થ તેન પુઞ્ઞકોટ્ઠાસેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિપ્પત્તો ભગવતો ધમ્મદેસનં સુત્વા પસન્નમાનસો પબ્બજિત્વા વત્તપટિપત્તિયા સાસનં સોભેન્તો નચિરસ્સેવ અરહા હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચન્દભાગાનદીતીરેતિઆદિમાહ. તં સબ્બં ઉત્તાનત્થમેવાતિ.

યૂથિકાપુપ્ફિયત્થેરઅપદાનવણ્ણના સમત્તા.

૮. દુસ્સદાયકત્થેરઅપદાનવણ્ણના

તિવરાયં પુરે રમ્મેતિઆદિકં આયસ્મતો દુસ્સદાયકત્થેરસ્સ અપદાનં. અયમ્પાયસ્મા પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે રાજકુલે નિબ્બત્તો વુદ્ધિપ્પત્તકાલે યુવરાજભાવં પત્વા પાકટો એકં જનપદં લભિત્વા તત્રાધિપતિભૂતો સકલજનપદવાસિનો દાનપિયવચનઅત્થચરિયાસમાનત્થતાસઙ્ખાતેહિ ચતૂહિ સઙ્ગહવત્થૂહિ સઙ્ગણ્હાતિ. તસ્મિં સમયે સિદ્ધત્થો ભગવા તં જનપદં સમ્પાપુણિ. અથ સો યુવરાજા પણ્ણાકારં લભિત્વા તત્થ સુખુમવત્થેન ભગવન્તં પૂજેસિ. ભગવા તં વત્થં હત્થેન પરામસિત્વા આકાસં પક્ખન્દિ. તમ્પિ વત્થં ભગવન્તમેવ અનુબન્ધિ. અથ સો યુવરાજા તં અચ્છરિયં દિસ્વા અતીવ પસન્નો અઞ્જલિં પગ્ગય્હ અટ્ઠાસિ. ભગવતો સમ્પત્તસમ્પત્તટ્ઠાને સબ્બે જના તં અચ્છરિયં દિસ્વા અચ્છરિયબ્ભુતચિત્તા અઞ્જલિં પગ્ગય્હ અટ્ઠંસુ. ભગવા વિહારમેવ અગમાસિ. યુવરાજા તેનેવ કુસલકમ્મેન તતો ચુતો દેવલોકે ઉપ્પન્નો તત્થ દિબ્બસમ્પત્તિં અનુભવિત્વા મનુસ્સેસુ ચક્કવત્તિઆદિસમ્પત્તિયો અનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા રતનત્તયે પસન્નો ભગવતો ધમ્મદેસનં સુત્વા પટિલદ્ધસદ્ધો પબ્બજિત્વા વાયમન્તો નચિરસ્સેવ અરહા અહોસિ.

૩૮. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો તિવરાયં પુરે રમ્મેતિઆદિમાહ. તત્થ તિવરનામકે નગરે રમણીયે અહં રાજપુત્તો હુત્વા સિદ્ધત્થં ભગવન્તં વત્થેન પૂજેસિન્તિ અત્થો. સેસં સુવિઞ્ઞેય્યમેવાતિ.

દુસ્સદાયકત્થેરઅપદાનવણ્ણના સમત્તા.

૯. સમાદપકત્થેરઅપદાનવણ્ણના

નગરે બન્ધુમતિયાતિઆદિકં આયસ્મતો સમાદપકત્થેરસ્સ અપદાનં. અયમ્પિ થેરો પુરિમબુદ્ધાનં સન્તિકે કતકુસલસમ્ભારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા પુઞ્ઞાનિ કરોન્તો વસમાનો સદ્ધો પસન્નો બહૂ ઉપાસકે સન્નિપાતેત્વા ગણજેટ્ઠકો હુત્વા ‘‘માળકં કરિસ્સામા’’તિ તે સબ્બે સમાદપેત્વા એકં માળકં સમં કારેત્વા પણ્ડરપુલિનં ઓકિરિત્વા ભગવતો નિય્યાદેસિ. સો તેન પુઞ્ઞેન દેવલોકે ઉપ્પન્નો છ કામાવચરસમ્પત્તિયો અનુભવિત્વા મનુસ્સેસુ ચ ચક્કવત્તિઆદિસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો ભગવતિ પસન્નો ધમ્મં સુત્વા પસન્નમાનસો સદ્ધાજાતો પબ્બજિત્વા સીલસમ્પન્નો વત્તસમ્પન્નો નચિરસ્સેવ અરહત્તં પાપુણિ.

૪૪. સો અપરભાગે અત્તનો કતકુસલં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો નગરે બન્ધુમતિયાતિઆદિમાહ. તત્થ બન્ધન્તિ ઞાતિગોત્તાદિવસેન એકસમ્બન્ધા હોન્તિ સકલનગરવાસિનોતિ બન્ધૂ, બન્ધૂ એતસ્મિં વિજ્જન્તીતિ બન્ધુમતી, તસ્સા બન્ધુમતિયા નામ નગરે મહાપૂગગણો ઉપાસકસમૂહો અહોસીતિ અત્થો. માળં કસ્સામ સઙ્ઘસ્સાતિ એત્થ માતિ ગણ્હાતિ સમ્પત્તસમ્પત્તજનાનં ચિત્તન્તિ માળં, અથ વા સમ્પત્તયતિગણાનં ચિત્તસ્સ વિવેકકરણે અલન્તિ માળં, માળમેવ માળકં, ભિક્ખુસઙ્ઘસ્સ ફાસુવિહારત્થાય માળકં કરિસ્સામાતિ અત્થો. સેસં પાકટમેવાતિ.

સમાદપકત્થેરઅપદાનવણ્ણના સમત્તા.

૧૦. પઞ્ચઙ્ગુલિયત્થેરઅપદાનવણ્ણના

તિસ્સો નામાસિ ભગવાતિઆદિકં આયસ્મતો પઞ્ચઙ્ગુલિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારે તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો તિસ્સસ્સ ભગવતો કાલે એકસ્મિં કુલે નિબ્બત્તો વુદ્ધિમન્વાય ઘરાવાસં સણ્ઠપેત્વા વિભવસમ્પન્નો સદ્ધો પસન્નો વીથિતો વિહારં પટિપન્નં ભગવન્તં દિસ્વા જાતિસુમનાદિઅનેકાનિ સુગન્ધપુપ્ફાનિ ચન્દનાદીનિ ચ વિલેપનાનિ ગાહાપેત્વા વિહારં ગતો પુપ્ફેહિ ભગવન્તં પૂજેત્વા વિલેપનેહિ ભગવતો સરીરે પઞ્ચઙ્ગુલિકં કત્વા વન્દિત્વા પક્કામિ.

૫૦. સો તેન પુઞ્ઞેન દેવમનુસ્સેસુ ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલે નિબ્બત્તિત્વા વુદ્ધિમન્વાય સત્થુ ધમ્મદેસનં સુત્વા પસન્નમાનસો પબ્બજિત્વા વિપસ્સનં વડ્ઢેત્વા નચિરસ્સેવ અરહા હુત્વા પુબ્બકમ્મં સરન્તો પચ્ચક્ખતો ઞત્વા ‘‘ઇમં નામ કુસલકમ્મં કત્વા ઈદિસં લોકુત્તરસમ્પત્તિં પત્તોમ્હી’’તિ પુબ્બચરિતાપદાનં પકાસેન્તો તિસ્સો નામાસિ ભગવાતિઆદિમાહ. તં સબ્બં ઉત્તાનત્થમેવાતિ.

પઞ્ચઙ્ગુલિયત્થેરઅપદાનવણ્ણના સમત્તા.

સત્તરસમવગ્ગવણ્ણના સમત્તા.