૧૬. બન્ધુજીવકવગ્ગો

૧. બન્ધુજીવકત્થેરઅપદાનવણ્ણના

ચન્દંવ વિમલં સુદ્ધન્તિઆદિકં આયસ્મતો બન્ધુજીવકત્થેરસ્સ અપદાનં. અયમ્પાયસ્મા પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા વસન્તો સિખિસ્સ ભગવતો રૂપકાયસમ્પત્તિં દિસ્વા પસન્નમાનસો બન્ધુજીવકપુપ્ફાનિ ગહેત્વા ભગવતો પાદમૂલે પૂજેસિ. ભગવા તસ્સ ચિત્તપ્પસાદવડ્ઢનત્થાય અનુમોદનમકાસિ. સો યાવતાયુતં ઠત્વા તેનેવ પુઞ્ઞેન દેવલોકે નિબ્બત્તો છ કામાવચરસમ્પત્તિયો અનુભવિત્વા મનુસ્સેસુ ચ ચક્કવત્તિઆદિસમ્પત્તિયો અનુભવિત્વા ઇમસ્સ અમ્હાકં સમ્માસમ્બુદ્ધસ્સ ઉપ્પન્નકાલે ગહપતિકુલે નિબ્બત્તો રૂપગ્ગયસગ્ગપ્પત્તો સત્થુ ધમ્મદેસનં સુત્વા સદ્ધાજાતો ગેહં પહાય પબ્બજિતો અરહત્તં પાપુણિ.

૧. સો પુબ્બેનિવાસઞાણેન પુબ્બે કતકુસલકમ્મં અનુસ્સરિત્વા સોમનસ્સજાતો પુબ્બચરિતાપદાનં પકાસેન્તો ચન્દંવ વિમલં સુદ્ધન્તિઆદિમાહ. તત્થ ચન્દંવ વિમલં સુદ્ધન્તિ અબ્ભા, મહિકા, ધુમો, રજો, રાહૂતિ ઇમેહિ ઉપક્કિલેસમલેહિ વિમુત્તં ચન્દં ઇવ દિયડ્ઢસહસ્સુપક્કિલેસમલાનં પહીનત્તા વિમલં નિક્કિલેસત્તા સુદ્ધં પસન્નં સિખિં સમ્બુદ્ધન્તિ સમ્બન્ધો. કિલેસકદ્દમાનં અભાવેન અનાવિલં. નન્દીભવસઙ્ખાતાય બલવસ્નેહાય પરિસમન્તતો ખીણત્તા નન્દીભવપરિક્ખીણં. તિણ્ણં લોકેતિ લોકત્તયતો તિણ્ણં ઉત્તિણ્ણં અતિક્કન્તં. વિસત્તિકન્તિ વિસત્તિકં વુચ્ચતિ તણ્હા, નિત્તણ્હન્તિ અત્થો.

૨. નિબ્બાપયન્તં જનતન્તિ ધમ્મવસ્સં વસ્સન્તો જનતં જનસમૂહં કિલેસપરિળાહાભાવેન નિબ્બાપયન્તં વૂપસમેન્તં. સયં સંસારતો તિણ્ણં, સબ્બસત્તે સંસારતો તારયન્તં અતિક્કમેન્તં ચતુન્નં સચ્ચાનં મુનનતો જાનનતો મુનિં સિખિં સમ્બુદ્ધન્તિ સમ્બન્ધો. વનસ્મિં ઝાયમાનન્તિ આરમ્મણૂપનિજ્ઝાનલક્ખણૂપનિજ્ઝાનેહિ ઝાયન્તં ચિન્તેન્તં ચિત્તેન ભાવેન્તં વનમજ્ઝેતિ અત્થો. એકગ્ગં એકગ્ગચિત્તં સુસમાહિતં સુટ્ઠુ આરમ્મણે આહિતં ઠપિતચિત્તં સિખિં મુનિં દિસ્વાતિ સમ્બન્ધો.

૩. બન્ધુજીવકપુપ્ફાનીતિ બન્ધૂનં ઞાતીનં જીવકં જીવિતનિસ્સયં હદયમંસલોહિતં બન્ધુજીવકં હદયમંસલોહિતસમાનવણ્ણં પુપ્ફં બન્ધુજીવકપુપ્ફં ગહેત્વા સિખિનો લોકબન્ધુનો પૂજેસિન્તિ અત્થો. સેસં ઉત્તાનત્થમેવાતિ.

બન્ધુજીવકત્થેરઅપદાનવણ્ણના સમત્તા.

૨. તમ્બપુપ્ફિયત્થેરઅપદાનવણ્ણના

પરકમ્માયને યુત્તોતિઆદિકં આયસ્મતો તમ્બપુપ્ફિયત્થેરસ્સ અપદાનં. અયમ્પિ આયસ્મા પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પિયદસ્સિસ્સ ભગવતો કાલે કેનચિ પુરે કતેન અકુસલકમ્મેન દુગ્ગતકુલે નિબ્બત્તો વુદ્ધિપ્પત્તો પરેસં કમ્મં કત્વા ભતિયા જીવિકં કપ્પેસિ. સો એવં દુક્ખેન વસન્તો પરેસં અપરાધં કત્વા મરણભયેન પલાયિત્વા વનં પાવિસિ. તત્થ ગતટ્ઠાને પાટલિબોધિં દિસ્વા વન્દિત્વા સમ્મજ્જિત્વા એકસ્મિં રુક્ખે તમ્બવણ્ણં પુપ્ફં દિસ્વા તં સબ્બં કણ્ણિકે ઓચિનિત્વા બોધિપૂજં અકાસિ. તત્થ ચિત્તં પસાદેત્વા વન્દિત્વા પલ્લઙ્કમાભુજિત્વા નિસીદિ. તસ્મિં ખણે તે મનુસ્સા પદાનુપદિકં અનુબન્ધિત્વા તત્થ અગમંસુ. સો તે દિસ્વા બોધિં આવજ્જેન્તોવ પલાયિત્વા ભયાનકે ગીરિદુગ્ગપપાતે પતિત્વા મરિ.

૭. સો બોધિપૂજાય અનુસ્સરિતત્તા તેનેવ પીતિસોમનસ્સેન તાવતિંસાદીસુ ઉપપન્નો છ કામાવચરસમ્પત્તિં અનુભવિત્વા મનુસ્સેસુ ચ ચક્કવત્તિઆદિસમ્પત્તિં અનુભવિત્વા ઇમસ્મિં બુદ્ધુપ્પાદે વિભવસમ્પન્ને કુલે નિબ્બત્તો વુદ્ધિપ્પત્તો સત્થુ ધમ્મદેસનં સુત્વા પસન્નમાનસો પબ્બજિત્વા નચિરસ્સેવ અરહા હુત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પરકમ્માયને યુત્તોતિઆદિમાહ. તત્થ પરેસં કમ્માનિ પરકમ્માનિ, પરકમ્માનં આયને કરણે વાહને ધારણે યુત્તો યોજિતો અહોસિન્તિ અત્થો. સેસં પાકટમેવાતિ.

તમ્બપુપ્ફિયત્થેરઅપદાનવણ્ણના સમત્તા.

૩. વીથિસમ્મજ્જકત્થેરઅપદાનવણ્ણના

ઉદેન્તં સતરંસિં વાતિઆદિકં આયસ્મતો વીથિસમ્મજ્જકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ જાતિસતેસુ કતપુઞ્ઞસઞ્ચયો સિખિસ્સ ભગવતો કાલે કુલગેહે નિબ્બત્તો ઘરાવાસં વસન્તો નગરવાસીહિ સદ્ધિં વીથિં સજ્જેત્વા નીયમાનં ભગવન્તં દિસ્વા પસન્નમાનસો વીથિં સમં કત્વા ધજં તત્થ ઉસ્સાપેસિ.

૧૫. સો તેનેવ પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલે નિબ્બત્તો વિઞ્ઞુતં પત્વા સત્થુ ધમ્મદેસનં સુત્વા પટિલદ્ધસદ્ધો બહુમાનહદયો પબ્બજિત્વા લદ્ધૂપસમ્પદો નચિરસ્સેવ અરહા હુત્વા અત્તનો પુબ્બકમ્મં અનુસ્સરન્તો પચ્ચક્ખતો જાનિત્વા પુબ્બચરિતાપદાનં પકાસેન્તો ઉદેન્તં સતરંસિં વાતિઆદિમાહ. તત્થ ઉદેન્તં ઉગ્ગચ્છન્તં સતરંસિં સતપભં. સતરંસીતિ દેસનાસીસમત્તં, અનેકસતસહસ્સપભં સૂરિયં ઇવાતિ અત્થો. પીતરંસિંવ ભાણુમન્તિ પીતરંસિં સંકુચિતપભં ભાણુમં પભાવન્તં ચન્દમણ્ડલં ઇવ સમ્બુદ્ધં દિસ્વાતિ અત્થો. સેસં સુવિઞ્ઞેય્યમેવાતિ.

વીથિસમ્મજ્જકત્થેરઅપદાનવણ્ણના સમત્તા.

૪. કક્કારુપુપ્ફપૂજકત્થેરઅપદાનવણ્ણના

દેવપુત્તો અહં સન્તોતિઆદિકં આયસ્મતો કક્કારુપુપ્ફપૂજકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે કતપુઞ્ઞસઞ્ચયો સિખિસ્સ ભગવતો કાલે ભુમ્મટ્ઠકદેવપુત્તો હુત્વા નિબ્બત્તો સિખિં સમ્માસમ્બુદ્ધં દિસ્વા દિબ્બકક્કારુપુપ્ફં ગહેત્વા પૂજેસિ.

૨૧. સો તેન પુઞ્ઞેન દેવમનુસ્સેસુ સંસરન્તો એકતિંસકપ્પબ્ભન્તરે ઉભયસુખં અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વુદ્ધિમન્વાય સત્થરિ પસન્નો પબ્બજિત્વા નચિરસ્સેવ અરહા હુત્વા અત્તનો પુબ્બકમ્મં પચ્ચક્ખતો ઞત્વા સોમનસ્સજાતો પુબ્બચરિતાપદાનં પકાસેન્તો દેવપુત્તો અહં સન્તોતિઆદિમાહ. તત્થ દિબ્બન્તિ કીળન્તિ પઞ્ચહિ દિબ્બેહિ કામગુણેહીતિ દેવા, દેવાનં પુત્તો, દેવો એવ વા પુત્તો દેવપુત્તો, અહં દેવપુત્તો સન્તો વિજ્જમાનો દિબ્બં કક્કારુપુપ્ફં પગ્ગય્હ પકારેન, ગહેત્વા સિખિસ્સ ભગવતો અભિરોપયિં પૂજેસિન્તિ અત્થો. સેસં ઉત્તાનત્થમેવાતિ.

કક્કારુપુપ્ફપૂજકત્થેરઅપદાનવણ્ણના સમત્તા.

૫. મન્દારવપુપ્ફપૂજકત્થેરઅપદાનવણ્ણના

દેવપુત્તો અહં સન્તોતિઆદિકં આયસ્મતો મન્દારવપુપ્ફપૂજકત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે ભુમ્મટ્ઠકદેવપુત્તો હુત્વા નિબ્બત્તો સિખિં ભગવન્તં દિસ્વા પસન્નમાનસો દિબ્બમન્દારવપુપ્ફેહિ પૂજેસિ.

૨૫. સો તેન પુઞ્ઞેનાતિઆદિકં સબ્બં અનન્તરત્થેરસ્સ અપદાનવણ્ણનાય વુત્તનયેનેવ વેદિતબ્બન્તિ.

મન્દારવપુપ્ફપૂજકત્થેરઅપદાનવણ્ણના સમત્તા.

૬. કદમ્બપુપ્ફિયત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો કદમ્બપુપ્ફિયત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સમ્માસમ્બુદ્ધસુઞ્ઞે લોકે એકસ્મિં કુલે નિબ્બત્તો વુદ્ધિમન્વાય ઘરાવાસં વસન્તો તત્થ આદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા હિમવન્તસમીપે કુક્કુટે નામ પબ્બતે અસ્સમં કત્વા વિહાસિ. સો તત્થ સત્ત પચ્ચેકબુદ્ધે દિસ્વા પસન્નમાનસો પુપ્ફિતં કદમ્બપુપ્ફં ઓચિનિત્વા તે પચ્ચેકબુદ્ધે પૂજેસિ. તેપિ ‘‘ઇચ્છિતં પત્થિત’’ન્તિઆદિના અનુમોદનં અકંસુ.

૩૦. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વુદ્ધિમન્વાય સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા નચિરસ્સેવ અરહા હુત્વા પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. તં વુત્તત્થમેવ. કુક્કુટો નામ પબ્બતોતિ તસ્સ ઉભોસુ પસ્સેસુ કુક્કુટચૂળાકારેન પબ્બતકૂટાનં વિજ્જમાનત્તા કુક્કુટોતિ સઙ્ખં ગતો. પકારેન તિરો હુત્વા પતિટ્ઠહતીતિ પબ્બતો. તમ્હિ પબ્બતપાદમ્હીતિ તસ્મિં પબ્બતસમીપે. સત્ત બુદ્ધા વસન્તીતિ સત્ત પચ્ચેકબુદ્ધા તસ્મિં કુક્કુટપબ્બતપાદે પણ્ણસાલાયં વસન્તીતિ અત્થો.

૩૧. દીપરાજંવ ઉગ્ગતન્તિ દીપાનં રાજા દીપરાજા, સબ્બેસં દીપાનં જલમાનાનં તારકાનં રાજા ચન્દોતિ અત્થો. અથ વા સબ્બેસુ જમ્બુદીપપુબ્બવિદેહઅપરગોયાનઉત્તરકુરુસઙ્ખાતેસુ ચતૂસુ દીપેસુ દ્વિસહસ્સપરિત્તદીપેસુ ચ રાજા આલોકફરણતો ચન્દો દીપરાજાતિ વુચ્ચતિ, તં નભે ઉગ્ગતં ચન્દં ઇવ પુપ્ફિતં ફુલ્લિતં કદમ્બરુક્ખં દિસ્વા તતો પુપ્ફં ઓચિનિત્વા ઉભોહિ હત્થેહિ પગ્ગય્હ પકારેન ગહેત્વા સત્ત પચ્ચેકબુદ્ધે સમોકિરિં સુટ્ઠુ ઓકિરિં, આદરેન પૂજેસિન્તિ અત્થો. સેસં ઉત્તાનત્થમેવાતિ.

કદમ્બપુપ્ફિયત્થેરઅપદાનવણ્ણના સમત્તા.

૭. તિણસૂલકત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો તિણસૂલકત્થેરસ્સ અપદાનં. અયમ્પિ થેરો પુરિમજિનવરેસુ કતપુઞ્ઞસમ્ભારો ઉપ્પન્નુપ્પન્નભવે કુસલાનિ ઉપચિનન્તો સિખિસ્સ ભગવતો કાલે કુલગેહે નિબ્બત્તો ઘરાવાસં સણ્ઠપેત્વા તત્થ દોસં દિસ્વા તં પહાય તાપસપબ્બજ્જં પબ્બજિત્વા વસન્તો હિમવન્તસમીપે ભૂતગણે નામ પબ્બતે વસન્તં એકતં વિવેકમનુબ્રૂહન્તં સિખિં સમ્બુદ્ધં દિસ્વા પસન્નમાનસો તિણસૂલપુપ્ફં ગહેત્વા પાદમૂલે પૂજેસિ. બુદ્ધોપિ તસ્સ અનુમોદનં અકાસિ.

૩૫. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે સાવત્થિયં વિભવસમ્પન્ને એકસ્મિં કુલે નિબ્બત્તો વુદ્ધિમન્વાય સાસને પસન્નો પબ્બજિત્વા ઉપનિસ્સયસમ્પન્નત્તા નચિરસ્સેવ અરહત્તં પાપુણિત્વા પુબ્બકમ્મં સરિત્વા સોમનસ્સપ્પત્તો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. ભૂતગણો નામ પબ્બતોતિ ભૂતગણાનં દેવયક્ખસમૂહાનં આવાસભૂતત્તા ભવનસદિસત્તા અવિરૂળ્હભાવેન પવત્તત્તા ચ ભૂતગણો નામ પબ્બતો, તસ્મિં એકો અદુતિયો જિનો જિતમારો બુદ્ધો વસતે દિબ્બબ્રહ્મઅરિયઇરિયાપથવિહારેહિ વિહરતીતિ અત્થો.

૩૬. એકૂનસતસહસ્સં, કપ્પં ન વિનિપાતિકોતિ તેન તિણસૂલપુપ્ફપૂજાકરણફલેન નિરન્તરં એકૂનસતસહસ્સકપ્પાનં અવિનિપાતકો ચતુરાપાયવિનિમુત્તો સગ્ગસમ્પત્તિભવમેવ ઉપપન્નોતિ અત્થો. સેસં સુવિઞ્ઞેય્યમેવાતિ.

તિણસૂલકત્થેરઅપદાનવણ્ણના સમત્તા.

૮. નાગપુપ્ફિયત્થેરઅપદાનવણ્ણના

સુવચ્છો નામ નામેનાતિઆદિકં આયસ્મતો નાગપુપ્ફિયત્થેરસ્સ અપદાનં. અયમ્પિ થેરો પુરિમજિનનિસભેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરભગવતો કાલે બ્રાહ્મણકુલે નિબ્બત્તો વુદ્ધિપ્પત્તો વેદત્તયાદીસુ સકસિપ્પેસુ નિપ્ફત્તિં પત્વા તત્થ સારં અદિસ્વા હિમવન્તં પવિસિત્વા તાપસપબ્બજ્જં પબ્બજિત્વા ઝાનસમાપત્તિસુખેન વીતિનામેસિ. તસ્મિં સમયે પદુમુત્તરો ભગવા તસ્સાનુકમ્પાય તત્થ અગમાસિ. સો તાપસો તં ભગવન્તં દિસ્વા લક્ખણસત્થેસુ છેકત્તા ભગવતો લક્ખણરૂપસમ્પત્તિયા પસન્નો વન્દિત્વા અઞ્જલિં પગ્ગય્હ અટ્ઠાસિ. આકાસતો અનોતિણ્ણત્તા પૂજાસક્કારે અકતેયેવ આકાસેનેવ પક્કામિ. અથ સો તાપસો સસિસ્સો નાગપુપ્ફં ઓચિનિત્વા તેન પુપ્ફેન ભગવતો ગતદિસાભાગમગ્ગં પૂજેસિ.

૩૯. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવન્તો સબ્બત્થ પૂજિતો ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો વુદ્ધિમન્વાય સદ્ધાસમ્પન્નો પબ્બજિત્વા વત્તપટિપત્તિયા સાસનં સોભયમાનો નચિરસ્સેવ અરહા હુત્વા ‘‘કેન નુ ખો કુસલકમ્મેન મયા અયં લોકુત્તરસમ્પત્તિ લદ્ધા’’તિ અતીતકમ્મં સરન્તો પુબ્બકમ્મં પચ્ચક્ખતો ઞત્વા સઞ્જાતસોમનસ્સો પુબ્બચરિતાપદાનં પકાસેન્તો સુવચ્છો નામ નામેનાતિઆદિમાહ. તત્થ વચ્છગોત્તે જાતત્તા વચ્છો, સુન્દરો ચ સો વચ્છો ચેતિ સુવચ્છો. નામેન સુવચ્છો નામ બ્રાહ્મણો મન્તપારગૂ વેદત્તયાદિસકલમન્તસત્થે કોટિપ્પત્તોતિ અત્થો. સેસં હેટ્ઠા વુત્તનયત્તા ઉત્તાનત્થમેવાતિ.

નાગપુપ્ફિયત્થેરઅપદાનવણ્ણના સમત્તા.

૯. પુન્નાગપુપ્ફિયત્થેરઅપદાનવણ્ણના

કાનનં વનમોગય્હાતિઆદિકં આયસ્મતો પુન્નાગપુપ્ફિયત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ફુસ્સસ્સ ભગવતો કાલે નેસાદકુલે નિબ્બત્તો મહાવનં પવિટ્ઠો તત્થ સુપુપ્ફિતપુન્નાગપુપ્ફં દિસ્વા હેતુસમ્પન્નત્તા બુદ્ધારમ્મણપીતિવસેન ભગવન્તં સરિત્વા તં પુપ્ફં સહ કણ્ણિકાહિ ઓચિનિત્વા વાલુકાહિ ચેતિયં કત્વા પૂજેસિ.

૪૬. સો તેન પુઞ્ઞેન દ્વેનવુતિકપ્પે નિરન્તરં દેવમનુસ્સસમ્પત્તિયોયેવ અનુભવિત્વા ઇમસ્મિં બુદ્ધુપ્પાદે સાવત્થિયં વિભવસમ્પન્ને કુલે નિબ્બત્તો વુદ્ધિમન્વાય પુબ્બવાસનાબલેન સાસને પસન્નો પબ્બજિત્વા વાયમન્તો નચિરસ્સેવ અરહા હુત્વા પુબ્બે કતકુસલં સરિત્વા સોમનસ્સજાતો પુબ્બચરિતાપદાનં પકાસેન્તો કાનનં વનમોગય્હાતિઆદિમાહ. તં સબ્બં હેટ્ઠા વુત્તત્તા ઉત્તાનત્થમેવાતિ.

પુન્નાગપુપ્ફિયત્થેરઅપદાનવણ્ણના સમત્તા.

૧૦. કુમુદદાયકત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો કુમુદદાયકત્થેરસ્સ અપદાનં. અયમ્પિ થેરો પુરિમબુદ્ધેસુ કતાધિકારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે હિમવન્તસ્સ આસન્ને મહન્તે જાતસ્સરે કુકુત્થો નામ પક્ખી હુત્વા નિબ્બત્તો કેનચિ અકુસલેન પક્ખી સમાનોપિ પુબ્બે કતસમ્ભારેન બુદ્ધિસમ્પન્નો પુઞ્ઞાપુઞ્ઞેસુ છેકો સીલવા પાણગોચરતો પટિવિરતો અહોસિ. તસ્મિં સમયે પદુમુત્તરો ભગવા આકાસેનાગન્ત્વા તસ્સ સમીપે ચઙ્કમતિ. અથ સો સકુણો ભગવન્તં દિસ્વા પસન્નચિત્તો કુમુદપુપ્ફં ડંસિત્વા ભગવતો પાદમૂલે પૂજેસિ. ભગવા તસ્સ સોમનસ્સુપ્પાદનત્થં પટિગ્ગહેત્વા અનુમોદનમકાસિ.

૫૧. સો તેન પુઞ્ઞેન દેવમનુસ્સેસુ ઉભયસમ્પત્તિસુખં અનુભવિત્વા ઇમસ્મિં બુદ્ધુપ્પાદે સાવત્થિયં અઞ્ઞતરસ્મિં કુલે નિબ્બત્તો વુદ્ધિમન્વાય મહદ્ધનો મહાભોગો રતનત્તયે પસન્નો સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા નચિરસ્સેવ અરહા હુત્વા અત્તનો પુબ્બકમ્મં પચ્ચક્ખતો ઞત્વા સોમનસ્સજાતો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. પદુમુપ્પલસઞ્છન્નોતિ એત્થ સતપત્તેહિ સમ્પુણ્ણો સેતપદુમો ચ તીણિ નીલરત્તસેતુપ્પલાનિ ચ પદુમુપ્પલાનિ તેહિ સઞ્છન્નો ગહનીભૂતો સમ્પુણ્ણો મહાજાતસ્સરો અહૂતિ સમ્બન્ધો. પુણ્ડરીકસમોત્થટોતિ પુણ્ડરીકેહિ રત્તપદુમેહિ ઓત્થટો સમ્પુણ્ણોતિ અત્થો. સેસં સુવિઞ્ઞેય્યમેવાતિ.

કુમુદદાયકત્થેરઅપદાનવણ્ણના સમત્તા.

સોળસમવગ્ગવણ્ણના સમત્તા.