૧૫. છત્તવગ્ગો

૧. અતિછત્તિયત્થેરઅપદાનવણ્ણના

પરિનિબ્બુતે ભગવતીતિઆદિકં આયસ્મતો અતિછત્તિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે એકસ્મિં કુલગેહે નિબ્બત્તો ધરમાનસ્સ ભગવતો અદિટ્ઠત્તા પરિનિબ્બુતકાલે ‘‘અહો મમ પરિહાની’’તિ ચિન્તેત્વા ‘‘મમ જાતિં સફલં કરિસ્સામી’’તિ કતસન્નિટ્ઠાનો છત્તાધિછત્તં કારેત્વા તસ્સ ભગવતો સરીરધાતું નિહિતધાતુગબ્ભં પૂજેસિ. અપરભાગે પુપ્ફચ્છત્તં કારેત્વા તમેવ ધાતુગબ્ભં પૂજેસિ. સો તેનેવ પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે ગહપતિકુલે નિબ્બત્તો વિઞ્ઞુતં પત્તો સત્થરિ પસન્નો પબ્બજિત્વા કમ્મટ્ઠાનં ગહેત્વા વાયમન્તો નચિરસ્સેવ અરહત્તં પાપુણિ.

૧. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પરિનિબ્બુતે ભગવતીતિઆદિમાહ. તત્થ છત્તાતિછત્તન્તિ છાદિયતિ સંવરિયતિ આતપાદિન્તિ છત્તં, છત્તસ્સ અતિછત્તં છત્તસ્સ ઉપરિ કતછત્તં છત્તાતિછત્તં, છત્તસ્સ ઉપરૂપરિ છત્તન્તિ અત્થો. થૂપમ્હિ અભિરોપયિન્તિ થૂપિયતિ રાસિકરીયતીતિ થૂપો, અથ વા થૂપતિ થિરભાવેન વુદ્ધિં વિરૂળ્હિં વેપુલ્લં આપજ્જમાનો પતિટ્ઠાતીતિ થૂપો, તસ્મિં થૂપમ્હિ મયા કારિતં છત્તં ઉપરૂપરિ ઠપનવસેન અભિ વિસેસેન આરોપયિં પૂજેસિન્તિ અત્થો.

૨. પુપ્ફચ્છદનં કત્વાનાતિ વિકસિતેહિ સુગન્ધેહિ અનેકેહિ ફુપ્ફેહિ છદનં છત્તુપરિ વિતાનં કત્વા પૂજેસિન્તિ અત્થો. સેસં સબ્બત્થ ઉત્તાનત્થમેવાતિ.

અતિછત્તિયત્થેરઅપદાનવણ્ણના સમત્તા.

૨. થમ્ભારોપકત્થેરઅપદાનવણ્ણના

નિબ્બુતે લોકનાથમ્હીતિઆદિકં આયસ્મતો થમ્ભારોપકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો ધમ્મદસ્સિસ્સ ભગવતો કાલે કુલગેહે નિબ્બત્તો સદ્ધો પસન્નો પરિનિબ્બુતે ભગવતિ તસ્સ ભગવતો ધાતુગબ્ભમાળકે થમ્ભં નિખનિત્વા ધજં આરોપેસિ. બહૂનિ જાતિસુમનપુપ્ફાનિ ગન્થિત્વા નિસ્સેણિયા આરોહિત્વા પૂજેસિ.

૫. સો યાવતાયુકં ઠત્વા કાલં કત્વા દેવમનુસ્સેસુ સંસરન્તો ઉભયસમ્પત્તિયો અનુભવિત્વા સબ્બત્થ પૂજિતો ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો દહરકાલતો પભુતિ પૂજનીયો સાસને બદ્ધસદ્ધો પબ્બજિત્વા સહ પટિસમ્ભિદાહિ અરહત્તં પત્તો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો નિબ્બુતે લોકનાથમ્હીતિઆદિમાહ. તત્થ નિબ્બુતે લોકનાથમ્હીતિ સકલલોકસ્સ નાથે પધાનભૂતે પટિસરણે ચ સત્થરિ ખન્ધપરિનિબ્બાનેન નિબ્બુતે નિબ્બુતદીપસિખા વિય અદસ્સનં ગતેતિ અત્થો. ધમ્મદસ્સીનરાસભેતિ ચતુસચ્ચધમ્મં પસ્સતીતિ ધમ્મદસ્સી, અથ વા સતિપટ્ઠાનાદિકે સત્તતિંસબોધિપક્ખિયધમ્મે દસ્સનસીલો પસ્સનસીલોતિ ધમ્મદસ્સી, નરાનં આસભો પવરો ઉત્તમોતિ નરાસભો, ધમ્મદસ્સી ચ સો નરાસભો ચેતિ ધમ્મદસ્સીનરાસભો, તસ્મિં ધમ્મદસ્સીનરાસભે. આરોપેસિં ધજં થમ્ભન્તિ ચેતિયમાળકે થમ્ભં નિખનિત્વા તત્થ ધજં આરોપેસિં બન્ધિત્વા ઠપેસિન્તિ અત્થો.

૬. નિસ્સેણિં માપયિત્વાનાતિ નિસ્સાય તં ઇણન્તિ ગચ્છન્તિ આરોહન્તિ ઉપરીતિ નિસ્સેણિ, તં નિસ્સેણિં માપયિત્વા કારેત્વા બન્ધિત્વા થૂપસેટ્ઠં સમારુહિન્તિ સમ્બન્ધો. જાતિપુપ્ફં ગહેત્વાનાતિ જાયમાનમેવ જનાનં સુન્દરં મનં કરોતીતિ જાતિસુમનં, જાતિસુમનમેવ પુપ્ફં ‘‘જાતિસુમનપુપ્ફ’’ન્તિ વત્તબ્બે ગાથાબન્ધસુખત્થં સુમનસદ્દસ્સ લોપં કત્વા ‘‘જાતિપુપ્ફ’’ન્તિ વુત્તં, તં જાતિસુમનપુપ્ફં ગહેત્વા ગન્થિત્વા થૂપમ્હિ આરોપયિં, આરોપેત્વા પૂજેસિન્તિ અત્થો. સેસં સુવિઞ્ઞેય્યમેવાતિ.

થમ્ભારોપકત્થેરઅપદાનવણ્ણના સમત્તા.

૩. વેદિકારકત્થેરઅપદાનવણ્ણના

નિબ્બુતે લોકનાથમ્હીતિઆદિકં આયસ્મતો વેદિકારકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પિયદસ્સિસ્સ ભગવતો કાલે વિભવસમ્પન્ને એકસ્મિં કુલે નિબ્બત્તો વિઞ્ઞુતં પત્વા ઘરાવાસં સણ્ઠપેત્વા નિબ્બુતે સત્થરિ પસન્નો તસ્સ ચેતિયે વલયં કારેસિ, સત્તહિ રતનેહિ પરિપૂરેત્વા મહાપૂજં કારેસિ. સો તેન પુઞ્ઞેન દેવમનુસ્સેસુ સંસરન્તો અનેકેસુ જાતિસતસહસ્સેસુ પૂજનીયો મહદ્ધનો મહાભોગો ઉભયસુખં અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિભવસમ્પન્નો પબ્બજિત્વા વાયમન્તો નચિરસ્સેવ અરહા અહોસિ.

૧૦. સો એકદિવસં અત્તનો પુબ્બે કતકુસલં સરિત્વા સોમનસ્સજાતો પુબ્બચરિતાપદાનં પકાસેન્તો નિબ્બુતે લોકનાથમ્હીતિઆદિમાહ. તં હેટ્ઠા વુત્તત્થમેવ. પિયદસ્સીનરુત્તમેતિ પિયં સોમનસ્સાકારં દસ્સનં યસ્સ સો પિયદસ્સી, આરોહપરિણાહદ્વત્તિંસમહાપુરિસલક્ખણઅસીતાનુબ્યઞ્જનબ્યામપ્પભામણ્ડલેહિ સાધુ મહાજનપ્પસાદં જનયનાકારદસ્સનોતિ અત્થો. નરાનં ઉત્તમોતિ નરુત્તમો, પિયદસ્સી ચ સો નરુત્તમો ચેતિ પિયદસ્સીનરુત્તમો, તસ્મિં પિયદસ્સીનરુત્તમે નિબ્બુતે ધાતુગબ્ભમ્હિ મુત્તવેદિં અહં અકાસિન્તિ સમ્બન્ધો. પુપ્ફાધારત્થાય પરિયોસાને વેદિકાવલયં અકાસિન્તિ અત્થો.

૧૧. મણીહિ પરિવારેત્વાતિ મણતિ જોતતિ પભાસતીતિ મણિ, અથ વા જનાનં મનં પૂરેન્તો સોમનસ્સં કરોન્તો ઇતો ગતો પવત્તોતિ મણિ, જાતિરઙ્ગમણિવેળુરિયમણિઆદીહિ અનેકેહિ મણીહિ કતવેદિકાવલયં પરિવારેત્વા ઉત્તમં મહાપૂજં અકાસિન્તિ અત્થો. સેસં ઉત્તાનત્થમેવાતિ.

વેદિકારકત્થેરઅપદાનવણ્ણના સમત્તા.

૪. સપરિવારિયત્થેરઅપદાનવણ્ણના

પદુમુત્તરો નામ જિનોતિઆદિકં આયસ્મતો સપરિવારિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકાસુ જાતીસુ વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો મહદ્ધનો મહાભોગો અહોસિ. અથ પદુમુત્તરે ભગવતિ પરિનિબ્બુતે મહાજનો તસ્સ ધાતું નિદહિત્વા મહન્તં ચેતિયં કારેત્વા પૂજેસિ. તસ્મિં કાલે અયં ઉપાસકો તસ્સુપરિ ચન્દનસારેન ચેતિયઘરં કરિત્વા મહાપૂજં અકાસિ. સો તેનેવ પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય કુસલં કત્વા સદ્ધાય સાસને પબ્બજિત્વા નચિરસ્સેવ અરહા અહોસિ.

૧૫-૮. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરો નામ જિનોતિઆદિમાહ. તત્થ ઓમત્તન્તિ લામકભાવં નીચભાવં દુક્ખિતભાવં વા ન પસ્સામિ ન જાનામિ, ન દિટ્ઠપુબ્બો મયા નીચભાવોતિ અત્થો. સેસં પાકટમેવાતિ.

સપરિવારિયત્થેરઅપદાનવણ્ણના સમત્તા.

૫. ઉમાપુપ્ફિયત્થેરઅપદાનવણ્ણના

નિબ્બુતે લોકમહિતેતિઆદિકં આયસ્મતો ઉમાપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા વસન્તો નિબ્બુતસ્સ ભગવતો ચેતિયમહે વત્તમાને ઇન્દનીલમણિવણ્ણં ઉમાપુપ્ફં ગહેત્વા પૂજેસિ. સો તેન પુઞ્ઞેન સુગતીસુયેવ સંસરન્તો દિબ્બમાનુસસમ્પત્તિયો અનુભવિત્વા ઉપ્પન્નુપ્પન્નભવે બહુલં નીલવણ્ણો જાતિસમ્પન્નો વિભવસમ્પન્નો અહોસિ. સો ઇમસ્મિં બુદ્ધુપ્પાદે વિભવસમ્પન્ને એકસ્મિં કુલગેહે નિબ્બત્તો વિઞ્ઞુતં પત્વા સદ્ધાજાતો પબ્બજિતો નચિરસ્સેવ અરહત્તં પાપુણિ.

૨૧. સો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો નિબ્બુતે લોકમહિતેતિઆદિ વુત્તં. તત્થ લોકમહિતેતિ લોકેહિ મહિતો પૂજિતોતિ લોકમહિતો, તસ્મિં લોકમહિતે સિદ્ધત્થમ્હિ ભગવતિ પરિનિબ્બુતેતિ સમ્બન્ધો. આહુતીનંપટિગ્ગહેતિ આહુતિનો વુચ્ચન્તિ પૂજાસક્કારા, તેસં આહુતીનં પટિગ્ગહેતું અરહતીતિ આહુતીનંપટિગ્ગહો, અલુત્તકિતન્તસમાસો, તસ્મિં આહુતીનંપટિગ્ગહે ભગવતિ પરિનિબ્બુતેતિ અત્થો.

૨૨. ઉમાપુપ્ફન્તિ ઉદ્ધમુદ્ધં નીલપભં મુઞ્ચમાનં પુપ્ફતિ વિકસતીતિ ઉમાપુપ્ફં, તં ઉમાપુપ્ફં ગહેત્વા ચેતિયે પૂજં અકાસિન્તિ અત્થો. સેસં ઉત્તાનત્થમેવાતિ.

ઉમાપુપ્ફિયત્થેરઅપદાનવણ્ણના સમત્તા.

૬. અનુલેપદાયકત્થેરઅપદાનવણ્ણના

અનોમદસ્સીમુનિનોતિઆદિકં આયસ્મતો અનુલેપદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અનોમદસ્સિસ્સ ભગવતો કાલે કુલગેહે નિબ્બત્તો મહદ્ધનો મહાભોગો તસ્સ ભગવતો બોધિરુક્ખસ્સ વેદિકાવલયં કારેત્વા સુધાકમ્મઞ્ચ કારેત્વા વાલુકસન્થરણં દદ્દળ્હમાનં રજતવિમાનમિવ કારેસિ. સો તેન પુઞ્ઞેન સુખપ્પત્તો ઉપ્પન્નુપ્પન્નભવે રજતવિમાનરજતગેહરજતપાસાદેસુ સુખમનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્વા સત્થરિ પસન્નો પબ્બજિત્વા વિપસ્સનમનુયુત્તો નચિરસ્સેવ અરહા અહોસિ.

૨૬. સો અપરભાગે ‘‘કિં નુ ખો કુસલં કત્વા મયા અયં વિસેસો અધિગતો’’તિ પુબ્બેનિવાસાનુસ્સતિઞાણેન પટિપાટિયા અનુસ્સરિત્વા પુબ્બે કતકુસલં જાનિત્વા સોમનસ્સજાતો પુબ્બચરિતાપદાનં પકાસેન્તો અનોમદસ્સીમુનિનોતિઆદિમાહ. તત્થ અનોમં અલામકં દસ્સનં દસ્સનીયં સરીરં યસ્સ સો અનોમદસ્સી, દ્વત્તિંસમહાપુરિસલક્ખણઅસીતાનુબ્યઞ્જનબ્યામપ્પભાસમુજ્જલવિરાજિતસરીરત્તા સુન્દરદસ્સનોતિ અત્થો. સુધાય પિણ્ડં દત્વાનાતિ બોધિઘરે વેદિકાવલયં કારેત્વા સકલે બોધિઘરે સુધાલેપનં કત્વાતિ અત્થો. પાણિકમ્મં અકાસહન્તિ સારકટ્ઠેન ફલકપાણિયો કત્વા તાહિ પાણીહિ મટ્ઠકમ્મં અકાસિન્તિ અત્થો. સેસં સુવિઞ્ઞેય્યમેવાતિ.

અનુલેપદાયકત્થેરઅપદાનવણ્ણના સમત્તા.

૭. મગ્ગદાયકત્થેરઅપદાનવણ્ણના

ઉત્તરિત્વાન નદિકન્તિઆદિકં આયસ્મતો મગ્ગદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો અનેકેસુ ભવેસુ નિબ્બાનાધિગમત્થાય પુઞ્ઞાનિ ઉપચિનન્તો સિદ્ધત્થસ્સ ભગવતો કાલે લોકસમ્મતે કુલે નિબ્બત્તો વુદ્ધિમન્વાય ઘરાવાસં વસન્તો એકદિવસં ભગવન્તં એકં નદિં ઉત્તરિત્વા વનન્તરં ગચ્છન્તં દિસ્વા પસન્નમાનસો ‘‘ઇદાનિ મયા ભગવતો મગ્ગં સમં કાતું વટ્ટતી’’તિ ચિન્તેત્વા કુદાલઞ્ચ પિટકઞ્ચ આદાય ભગવતો ગમનમગ્ગં સમં કત્વા વાલુકં ઓકિરિત્વા ભગવતો પાદે વન્દિત્વા, ‘‘ભન્તે, ઇમિના મગ્ગાલઙ્કારકરણેન નિબ્બત્તનિબ્બત્તટ્ઠાને પૂજનીયો ભવેય્યં, નિબ્બાનઞ્ચ પાપુણેય્ય’’ન્તિ પત્થનં અકાસિ. ભગવા ‘‘યથાધિપ્પાયં સમિજ્ઝતૂ’’તિ અનુમોદનં વત્વા પક્કામિ.

૩૨-૩. સો તેન પુઞ્ઞેન દેવમનુસ્સેસુ સંસરન્તો સબ્બત્થ પૂજિતો અહોસિ. ઇમસ્મિં પન બુદ્ધુપ્પાદે પાકટે એકસ્મિં કુલે નિબ્બત્તો સત્થરિ પસન્નો પબ્બજિત્વા વિપસ્સનં વડ્ઢેત્વા નચિરસ્સેવ અરહત્તં પત્વા અત્તનો પુબ્બકમ્મં પચ્ચક્ખતો ઞત્વા સોમનસ્સજાતો પુબ્બચરિતાપદાનં પકાસેન્તો ઉત્તરિત્વાન નદિકન્તિઆદિમાહ. તત્થ નદતિ સદ્દં કરોતિ ગચ્છતીતિ નદી, નદીયેવ નદિકા, તં નદિકં ઉત્તરિત્વા અતિક્કમિત્વાતિ અત્થો. કુદાલપિટકમાદાયાતિ કુ વુચ્ચતિ પથવી, તં વિદાલને પદાલને છિન્દને અલન્તિ કુદાલં, પિટકં વુચ્ચતિ પંસુવાલિકાદિવાહકં, તાલપણ્ણવેત્તલતાદીહિ કતભાજનં, કુદાલઞ્ચ પિટકઞ્ચ કુદાલપિટકં, તં આદાય ગહેત્વાતિ અત્થો. સેસં ઉત્તાનત્થમેવાતિ.

મગ્ગદાયકત્થેરઅપદાનવણ્ણના સમત્તા.

૮. ફલકદાયકત્થેરઅપદાનવણ્ણના

યાનકારો પુરે આસિન્તિઆદિકં આયસ્મતો ફલકદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ અત્તભાવેસુ કતપુઞ્ઞસમ્ભારો સિદ્ધત્થસ્સ ભગવતો કાલે વડ્ઢકિકુલે નિબ્બત્તો રતનત્તયે પસન્નો ચન્દનેન આલમ્બનફલકં કત્વા ભગવતો અદાસિ. ભગવા તસ્સાનુમોદનં અકાસિ.

૩૭. સો તેન પુઞ્ઞેન દેવમનુસ્સેસુ સંસરન્તો સબ્બત્થ કાલે ચિત્તસુખપીણિતો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્વા સત્થુ ધમ્મદેસનં સુત્વા સઞ્જાતપ્પસાદો પબ્બજિત્વા વાયમન્તો નચિરસ્સેવ સહ પટિસમ્ભિદાહિ અરહત્તં પત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો યાનકારો પુરે આસિન્તિઆદિમાહ. તત્થ યાનકારોતિ યન્તિ એતેન ઇચ્છિતિચ્છિતટ્ઠાનન્તિ યાનં, તં કરોતીતિ યાનકારો, પુરે બુદ્ધદસ્સનસમયે અહં યાનકારો આસિં અહોસિન્તિ અત્થો. ચન્દનં ફલકં કત્વાતિ ચન્દતિ પરિળાહં વૂપસમેતીતિ ચન્દનં. અથ વા ચન્દન્તિ સુગન્ધવાસનત્થં સરીરં વિલિમ્પન્તિ એતેનાતિ ચન્દનં, તં આલમ્બનફલકં કત્વા. લોકબન્ધુનોતિ સકલલોકસ્સ બન્ધુ ઞાતિભૂતોતિ લોકબન્ધુ, તસ્સ લોકબન્ધુનો સત્થુસ્સ અદાસિન્તિ અત્થો. સેસં સુવિઞ્ઞેય્યમેવાતિ.

ફલકદાયકત્થેરઅપદાનવણ્ણના સમત્તા.

૯. વટંસકિયત્થેરઅપદાનવણ્ણના

સુમેધો નામ નામેનાતિઆદિકં આયસ્મતો વટંસકિયત્થેરસ્સ અપદાનં. અયમ્પિ પુરિમમુનિન્દેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સુમેધસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા તત્થ આદીનવં દિસ્વા ગેહં પહાય તાપસપબ્બજ્જં પબ્બજિત્વા મહાવને વિહાસિ. તસ્મિં સમયે સુમેધો ભગવા વિવેકકામતાય તં વનં સમ્પાપુણિ. અથ સો તાપસો ભગવન્તં દિસ્વા પસન્નમાનસો વિકસિતં સળલપુપ્ફં ગહેત્વા વટંસકાકારેન ગન્થેત્વા ભગવતો પાદમૂલે ઠપેત્વા પૂજેસિ. ભગવા તસ્સ ચિત્તપ્પસાદત્થાય અનુમોદનમકાસિ. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે વિભવસમ્પન્ને કુલે જાતો વુદ્ધિમન્વાય સદ્ધો પસન્નો પબ્બજિત્વા નચિરસ્સેવ અરહા અહોસિ.

૪૩. સો અપરભાગે પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુમેધો નામ નામેનાતિઆદિ વુત્તં. વિવેકમનુબ્રૂહન્તોતિ જનાકિણ્ણતં પહાય જનવિવેકં ચિત્તવિવેકઞ્ચ અનુબ્રૂહન્તો વડ્ઢેન્તો બહુલીકરોન્તો મહાવનં અજ્ઝોગાહિ પાવિસીતિ અત્થો. સેસં ઉત્તાનત્થમેવાતિ.

વટંસકિયત્થેરઅપદાનવણ્ણના સમત્તા.

૧૦. પલ્લઙ્કદાયકત્થેરઅપદાનવણ્ણના

સુમેધસ્સ ભગવતોતિઆદિકં આયસ્મતો પલ્લઙ્કદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ નિબ્બાનાધિગમત્થાય કતપુઞ્ઞૂપચયો સુમેધસ્સ ભગવતો કાલે ગહપતિકુલે નિબ્બત્તો વુદ્ધિમન્વાય મહાભોગસમ્પન્નો સત્થરિ પસીદિત્વા ધમ્મં સુત્વા તસ્સ સત્થુનો સત્તરતનમયં પલ્લઙ્કં કારેત્વા મહન્તં પૂજં અકાસિ. સો તેન પુઞ્ઞેન દેવમનુસ્સેસુ સંસરન્તો સબ્બત્થ પૂજિતો અહોસિ. સો અનુક્કમેન ઇમસ્મિં બુદ્ધુપ્પાદે વિભવસમ્પન્ને એકસ્મિં કુલે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા સત્થુ ધમ્મદેસનં સુત્વા પસન્નો પબ્બજિત્વા નચિરસ્સેવ અરહત્તં પત્વા પુબ્બે કતપુઞ્ઞનામેન પલ્લઙ્કદાયકત્થેરોતિ પાકટો અહોસિ. હેટ્ઠા વિય ઉપરિપિ પુબ્બે કતપુઞ્ઞનામેન થેરાનં નામાનિ એવમેવ વેદિતબ્બાનિ.

૪૭. સો એકદિવસં અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુમેધસ્સ ભગવતોતિઆદિમાહ. પલ્લઙ્કો હિ મયા દિન્નોતિ પલ્લઙ્કં ઊરુબદ્ધાસનં કત્વા યત્થ ઉપવીસન્તિ નિસીદન્તિ, સો પલ્લઙ્કોતિ વુચ્ચતિ, સો પલ્લઙ્કો સત્તરતનમયો મયા દિન્નો પૂજિતોતિ અત્થો. સઉત્તરસપચ્છદોતિ સહ ઉત્તરચ્છદેન સહ પચ્છદેન સઉત્તરસપચ્છદો, ઉપરિવિતાનં બન્ધિત્વા આસનં ઉત્તમવત્થેહિ અચ્છાદેત્વાતિ અત્થો. સેસં પાકટમેવાતિ.

પલ્લઙ્કદાયકત્થેરઅપદાનવણ્ણના સમત્તા.

પન્નરસમવગ્ગવણ્ણના સમત્તા.