૧. સોભિતત્થેરઅપદાનવણ્ણના

પદુમુત્તરો નામ જિનોતિઆદિકં આયસ્મતો સોભિતત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે એકસ્મિં કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા એકદિવસં સત્થારા ધમ્મે દેસિયમાને સોમનસ્સેન પસન્નમાનસો નાનપ્પકારેહિ થોમેસિ. સો તેનેવ સોમનસ્સેન કાલં કત્વા દેવેસુ નિબ્બત્તો તત્થ દિબ્બસુખં અનુભવિત્વા મનુસ્સેસુ ચ મનુસ્સસુખં અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો સત્તવસ્સિકોવ પબ્બજિત્વા નચિરસ્સેવ છળભિઞ્ઞો અરહા અહોસિ.

૧. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરો નામ જિનોતિઆદિમાહ. તં સબ્બં હેટ્ઠા વુત્તનયત્તા સુવિઞ્ઞેય્યમેવાતિ.

સોભિતત્થેરઅપદાનવણ્ણના સમત્તા.