૧૪. સોભિતવગ્ગો

૧. સોભિતત્થેરઅપદાનવણ્ણના

પદુમુત્તરો નામ જિનોતિઆદિકં આયસ્મતો સોભિતત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે એકસ્મિં કુલગેહે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા એકદિવસં સત્થારા ધમ્મે દેસિયમાને સોમનસ્સેન પસન્નમાનસો નાનપ્પકારેહિ થોમેસિ. સો તેનેવ સોમનસ્સેન કાલં કત્વા દેવેસુ નિબ્બત્તો તત્થ દિબ્બસુખં અનુભવિત્વા મનુસ્સેસુ ચ મનુસ્સસુખં અનુભવિત્વા ઇમસ્મિં બુદ્ધુપ્પાદે સાવત્થિયં કુલગેહે નિબ્બત્તો સત્તવસ્સિકોવ પબ્બજિત્વા નચિરસ્સેવ છળભિઞ્ઞો અરહા અહોસિ.

૧. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરો નામ જિનોતિઆદિમાહ. તં સબ્બં હેટ્ઠા વુત્તનયત્તા સુવિઞ્ઞેય્યમેવાતિ.

સોભિતત્થેરઅપદાનવણ્ણના સમત્તા.

૨. સુદસ્સનત્થેરઅપદાનવણ્ણના

વિત્થતાય નદીતીરેતિઆદિકં આયસ્મતો સુદસ્સનત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે કતપુઞ્ઞૂપચયો સિખિસ્સ ભગવતો કાલે કુલગેહે નિબ્બત્તો વુદ્ધિપ્પત્તો ઘરાવાસં સણ્ઠપેત્વા વસન્તો વિત્થતાય નામ ગઙ્ગાય સમીપે પિલક્ખુફલિતં પરિયેસન્તો તસ્સા તીરે નિસિન્નં જલમાનઅગ્ગિસિખં ઇવ સિખિં સમ્માસમ્બુદ્ધં દિસ્વા પસન્નમાનસો કેતકીપુપ્ફં વણ્ટેનેવ છિન્દિત્વા પૂજેન્તો એવમાહ – ‘‘ભન્તે, યેન ઞાણેન ત્વં એવં મહાનુભાવો સબ્બઞ્ઞુબુદ્ધો જાતો, તં ઞાણં અહં પૂજેમી’’તિ. અથ ભગવા અનુમોદનમકાસિ. સો તેન પુઞ્ઞેન દેવમનુસ્સેસુ જાતો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો સત્થરિ પસન્નો પબ્બજિત્વા નચિરસ્સેવ અરહા અહોસિ.

૧૦. સો અત્તનો કતકુસલં સરિત્વા સોમનસ્સજાતો પુબ્બચરિતાપદાનં પકાસેન્તો વિત્થતાય નદીતીરેતિઆદિમાહ. તત્થ વિત્થતાયાતિ વિત્થરતિ પત્થરતિ વિત્થિણ્ણા હોતીતિ વિત્થતા, નદન્તિ સદ્દં કરોન્તિ ઇતા ગતા પવત્તાતિ નદી, નદિં તરન્તા એતં પત્વા તિણ્ણા નામ હોન્તીતિ તીરં, તસ્સા વિત્થતાય નદિયા તીરે તીરસમીપેતિ અત્થો. કેતકિં પુપ્ફિતં દિસ્વાતિ કુચ્છિતાકારેન ગણ્હન્તાનં હત્થં કણ્ડકો છિન્દતિ વિજ્ઝતીતિ કેતં, કેતસ્સ એસા કેતકીપુપ્ફં, તં દિસ્વા વણ્ટં છિન્દિત્વાતિ સમ્બન્ધો.

૧૧. સિખિનો લોકબન્ધુનોતિ સિખી વુચ્ચતિ અગ્ગિ, સિખીસદિસા નીલપીતાદિભેદા જલમાના છબ્બણ્ણઘનરંસિયો યસ્સ સો સિખી, લોકસ્સ સકલલોકત્તયસ્સ બન્ધુ ઞાતકોતિ લોકબન્ધુ, તસ્સ સિખિનો લોકબન્ધુનો કેતકીપુપ્ફં વણ્ટે છિન્દિત્વા પૂજેસિન્તિ સમ્બન્ધો. સેસં ઉત્તાનત્થમેવાતિ.

સુદસ્સનત્થેરઅપદાનવણ્ણના સમત્તા.

૩. ચન્દનપૂજનકત્થેરઅપદાનવણ્ણના

ચન્દભાગાનદીતીરેતિઆદિકં આયસ્મતો ચન્દનપૂજનકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે હિમવન્તે ચન્દભાગાનદિયા સમીપે કિન્નરયોનિયં નિબ્બત્તો પુપ્ફભક્ખો પુપ્ફનિવસનો ચન્દનઅગરુઆદીસુ ગન્ધવિભૂસિતો હિમવન્તે ભુમ્મદેવતા વિય ઉય્યાનકીળજલકીળાદિઅનેકસુખં અનુભવન્તો વાસં કપ્પેસિ. તદા અત્થદસ્સી ભગવા તસ્સાનુકમ્પાય હિમવન્તં ગન્ત્વા આકાસતો ઓરુય્હ સઙ્ઘાટિં પઞ્ઞાપેત્વા નિસીદિ. સો કિન્નરો તં ભગવન્તં વિજ્જોતમાનં તત્થ નિસિન્નં દિસ્વા પસન્નમાનસો સુગન્ધચન્દનેન પૂજેસિ. તસ્સ ભગવા અનુમોદનં અકાસિ.

૧૭. સો તેન પુઞ્ઞેન તેન સોમનસ્સેન યાવતાયુકં ઠત્વા તતો ચુતો દેવલોકે નિબ્બત્તો અપરાપરં છ કામાવચરસમ્પત્તિયો અનુભવિત્વા મનુસ્સેસુ ચક્કવત્તિરજ્જપદેસરજ્જસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો પબ્બજિત્વા નચિરસ્સેવ અરહત્તં પત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો ચન્દભાગાનદીતીરેતિઆદિમાહ. તત્થ ચન્દં મનં રુચિં અજ્ઝાસયં ઞત્વા વિય જાતોતિ ચન્દો. ચન્દમણ્ડલેન પસન્નનિમ્મલોદકેન ઉભોસુ પસ્સેસુ મુત્તાદલસદિસસન્થરધવલપુલિનતલેન ચ સમન્નાગતત્તા ચન્દેન ભાગા સદિસાતિ ચન્દભાગા, તસ્સા ચન્દભાગાય નદિયા તીરે સમીપેતિ અત્થો. સેસં સબ્બં હેટ્ઠા વુત્તનયત્તા સુવિઞ્ઞેય્યમેવાતિ.

ચન્દનપૂજનકત્થેરઅપદાનવણ્ણના સમત્તા.

અટ્ઠમભાણવારવણ્ણના સમત્તા.

૪. પુપ્ફચ્છદનિયત્થેરઅપદાનવણ્ણના

સુનન્દો નામ નામેનાતિઆદિકં આયસ્મતો પુપ્ફચ્છદનિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ ભવેસુ વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે બ્રાહ્મણકુલે નિબ્બત્તો વિઞ્ઞુતં પત્વા સકસિપ્પેસુ નિપ્ફત્તિં પત્તો મહાભોગો મહાયસો દાનાભિરતો અહોસિ. એકદિવસં સો ‘‘સકલજમ્બુદીપે ઇમે યાચકા નામ ‘અહં દાનં ન લદ્ધોસ્મી’તિ વત્તું મા લભન્તૂ’’તિ મહાદાનં સજ્જેસિ. તદા પદુમુત્તરો ભગવા સપરિવારો આકાસેન ગચ્છતિ. બ્રાહ્મણો તં દિસ્વા પસન્નચિત્તો સકસિસ્સે પક્કોસાપેત્વા પુપ્ફાનિ આહરાપેત્વા આકાસે ઉક્ખિપિત્વા પૂજેસિ. તાનિ સકલનગરં છાદેત્વા સત્ત દિવસાનિ અટ્ઠંસુ.

૨૬. સો તેન પુઞ્ઞકમ્મેન દેવમનુસ્સેસુ સુખં અનુભવિત્વા ઇમસ્મિં બુદ્ધુપ્પાદે સાવત્થિયં એકસ્મિં કુલગેહે નિબ્બત્તો સદ્ધાજાતો પબ્બજિત્વા ખુરગ્ગેયેવ અરહત્તં પત્વા અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુનન્દો નામ નામેનાતિઆદિમાહ. તં હેટ્ઠા વુત્તનયત્તા સુવિઞ્ઞેય્યમેવાતિ.

પુપ્ફચ્છદનિયત્થેરઅપદાનવણ્ણના સમત્તા.

૫. રહોસઞ્ઞકત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો રહોસઞ્ઞકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો એકસ્મિં બુદ્ધસુઞ્ઞકાલે મજ્ઝિમદેસે બ્રાહ્મણકુલે નિબ્બત્તો વુદ્ધિમન્વાય સકસિપ્પેસુ નિપ્ફત્તિં પત્વા તત્થ સારં અપસ્સન્તો કેવલં ઉદરં પૂરેત્વા કોધમદમાનાદયો અકુસલેયેવ દિસ્વા ઘરાવાસં પહાય હિમવન્તં પવિસિત્વા ઇસિપબ્બજ્જં પબ્બજિત્વા અનેકતાપસસતપરિવારો વસભપબ્બતસમીપે અસ્સમં માપેત્વા તીણિ વસ્સસહસ્સાનિ હિમવન્તેયેવ વસમાનો ‘‘અહં એત્તકાનં સિસ્સાનં આચરિયોતિ સમ્મતો ગરુટ્ઠાનિયો ગરુકાતબ્બો વન્દનીયો, આચરિયો મે નત્થી’’તિ દોમનસ્સપ્પત્તો તે સબ્બે સિસ્સે સન્નિપાતેત્વા બુદ્ધાનં અભાવે નિબ્બાનાધિગમાભાવં પકાસેત્વા સયં એકકો રહો વિવેકટ્ઠાનેવ નિસિન્નો બુદ્ધસ્સ સમ્મુખા નિસિન્નો વિય બુદ્ધસઞ્ઞં મનસિ કરિત્વા બુદ્ધારમ્મણં પીતિં ઉપ્પાદેત્વા સાલાયં પલ્લઙ્કં આભુજિત્વા નિસિન્નો કાલં કત્વા બ્રહ્મલોકે નિબ્બત્તિ.

૩૪. સો તત્થ ઝાનસુખેન ચિરં વસિત્વા ઇમસ્મિં બુદ્ધુપ્પાદે કુલગેહે નિબ્બત્તો કામેસુ અનલ્લીનો સત્તવસ્સિકો પબ્બજિત્વા ખુરગ્ગેયેવ અરહત્તં પત્વા છળભિઞ્ઞો હુત્વા પુબ્બેનિવાસઞાણેન અત્તનો પુબ્બકમ્મં સરિત્વા સઞ્જાતસોમનસ્સો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. વસભો નામ પબ્બતોતિ હિમવન્તપબ્બતં વિના સેસપબ્બતાનં ઉચ્ચતરભાવેન સેટ્ઠતરભાવેન વસભોતિ સઙ્ખં ગતો પબ્બતોતિ અત્થો. સેસં સબ્બત્થ ઉત્તાનત્થમેવાતિ.

રહોસઞ્ઞકત્થેરઅપદાનવણ્ણના સમત્તા.

૬. ચમ્પકપુપ્ફિયત્થેરઅપદાનવણ્ણના

કણિકારંવ જોતન્તન્તિઆદિકં આયસ્મતો ચમ્પકપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વેસ્સભુસ્સ ભગવતો કાલે બ્રાહ્મણકુલે નિબ્બત્તો વુદ્ધિપ્પત્તો સકસિપ્પેસુ નિપ્ફત્તિં પત્વા તત્થ સારં અપસ્સન્તો ઘરાવાસં પહાય તાપસપબ્બજ્જં પબ્બજિત્વા વનન્તરે વસન્તો વેસ્સભું ભગવન્તં ઉદ્દિસ્સ સિસ્સેહિ આનીતેહિ ચમ્પકપુપ્ફેહિ પૂજેસિ. ભગવા અનુમોદનં અકાસિ. સો તેનેવ કુસલેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પાપુણિત્વા પુબ્બવાસનાબલેન ઘરાવાસે અનલ્લીનો પબ્બજિત્વા નચિરસ્સેવ અરહા અહોસિ.

૪૧. સો અપરભાગે અત્તનો પુબ્બપુઞ્ઞકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો કણિકારંવ જોતન્તન્તિઆદિમાહ. તત્થ કણિકારન્તિ સકલપત્તપલાસાનિ પરિભજ્જ પાતેત્વા પુપ્ફગહણસમયે કણ્ણિકાબદ્ધો હુત્વા પુપ્ફમકુળાનં ગહણતો કણ્ણિકાકારેન પકતોતિ કણિકારો, ‘‘કણ્ણિકારો’’તિ વત્તબ્બે નિરુત્તિનયેન એકસ્સ પુબ્બ ણ-કારસ્સ લોપં કત્વા ‘‘કણિકાર’’ન્તિ વુત્તન્તિ દટ્ઠબ્બં. તં પુપ્ફિતં કણિકારરુક્ખં ઇવ જોતન્તં બુદ્ધં અદ્દસન્તિ અત્થો. સેસં ઉત્તાનત્થમેવાતિ.

ચમ્પકપુપ્ફિયત્થેરઅપદાનવણ્ણના સમત્તા.

૭. અત્થસન્દસ્સકત્થેરઅપદાનવણ્ણના

વિસાલમાળે આસીનોતિઆદિકં આયસ્મતો અત્થસન્દસ્સકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકેસુ અત્તભાવેસુ કતપુઞ્ઞૂપચયો પદુમુત્તરસ્સ ભગવતો કાલે બ્રાહ્મણકુલે નિબ્બત્તો વુદ્ધિમન્વાય સકસિપ્પેસુ નિપ્ફત્તિં પત્તો તત્થ સારં અપસ્સન્તો ગેહં પહાય હિમવન્તં ગન્ત્વા રમણીયે ઠાને પણ્ણસાલં કત્વા પટિવસતિ, તદા સત્તાનુકમ્પાય હિમવન્તમાગતં પદુમુત્તરભગવન્તં દિસ્વા પસન્નમાનસો પઞ્ચઙ્ગસમન્નાગતો વન્દિત્વા થુતિવચનેહિ થોમેસિ. સો તેન પુઞ્ઞેન યાવતાયુકં કત્વા કાલઙ્કત્વા બ્રહ્મલોકૂપગો અહોસિ. સો અપરભાગે ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો સત્થુ ધમ્મદેસનં સુત્વા પટિલદ્ધસદ્ધો પબ્બજિત્વા અરહત્તં પાપુણિ.

૪૭. સો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો વિસાલમાળે આસીનોતિઆદિમાહ. તત્થ વિસાલમાળેતિ વિસાલં પત્થટં વિત્થિણ્ણં મહન્તં માળં વિસાલમાળં, તસ્મિં વિસાલમાળે આસીનો નિસિન્નો અહં લોકનાયકં અદ્દસન્તિ સમ્બન્ધો. તેસં સુવિઞ્ઞેય્યમેવાતિ.

અત્થસન્દસ્સકત્થેરઅપદાનવણ્ણના સમત્તા.

૮. એકપસાદનિયત્થેરઅપદાનવણ્ણના

નારદો ઇતિ મે નામન્તિઆદિકં આયસ્મતો એકપસાદનિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો અનેકાસુ જાતીસુ કતકુસલો અત્થદસ્સિસ્સ ભગવતો કાલે બ્રાહ્મણકુલે નિબ્બત્તો કેસવોતિ પાકટો હુત્વા વિઞ્ઞુતં પત્વા ઘરાવાસં પહાય પબ્બજિત્વા વસન્તો એકદિવસં સત્થુ ધમ્મદેસનં સુત્વા પસન્નમાનસો અઞ્જલિં પગ્ગય્હ અતિવિય પીતિસોમનસ્સજાતો પક્કામિ. સો યાવતાયુકં ઠત્વા તેનેવ સોમનસ્સેન કાલં કત્વા દેવેસુ નિબ્બત્તો તત્થ દિબ્બસમ્પત્તિં અનુભવિત્વા મનુસ્સેસુ ઉપ્પન્નો તત્થ સમ્પત્તિયો અનુભવિત્વા ઇમસ્મિં બુદ્ધુપ્પાદે અઞ્ઞતરસ્મિં કુલગેહે નિબ્બત્તો વુદ્ધિપ્પત્તો સત્થરિ પસીદિત્વા પબ્બજિતો નચિરસ્સેવ અરહા અહોસિ.

૫૫. સો અપરભાગે અત્તનો કતકુસલકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો નારદો ઇતિ મે નામન્તિઆદિમાહ. તત્થ નારદોતિ જાતિવસેન સુદ્ધસરીરત્તા નત્થિ રજો ધૂલિ મલં એતસ્સાતિ નારદો, જ-કારસ્સ દ-કારં કત્વા નારદોતિ કુલદત્તિકં નામં. કેસવોતિ કિસવચ્છગોત્તે જાતત્તા કેસવો નારદકેસવો ઇતિ મં જના વિદૂ જાનન્તીતિ અત્થો. સેસં પાકટમેવાતિ.

એકપસાદનિયત્થેરઅપદાનવણ્ણના સમત્તા.

૯. સાલપુપ્ફદાયકત્થેરઅપદાનવણ્ણના

મિગરાજા તદા આસિન્તિઆદિકં આયસ્મતો સાલપુપ્ફદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે કતકુસલસઞ્ચયો કેનચિ કમ્મચ્છિદ્દેન હિમવન્તે સીહયોનિયં નિબ્બત્તો અનેકસીહપરિવારો વિહાસિ. તદા સિખી ભગવા તસ્સાનુકમ્પાય હિમવન્તં અગમાસિ. સીહો તં ઉપગતં દિસ્વા પસન્નમાનસો સાખાભઙ્ગેન સકણ્ણિકસાલપુપ્ફં ગહેત્વા પૂજેસિ. ભગવા તસ્સ અનુમોદનં અકાસિ.

૬૦. સો તેન પુઞ્ઞેન દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વિઞ્ઞુતં પત્વા સત્થરિ પસન્નો પબ્બજિત્વા અરહત્તં પત્તો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો મિગરાજા તદા આસિન્તિઆદિમાહ. તત્થ મરણં ગચ્છન્તીતિ મિગા, અથ વા ઘાસં મગ્ગન્તિ ગવેસન્તીતિ મિગા, મિગાનં રાજા મિગરાજા. સકલચતુપ્પદાનં રાજભાવે સતિપિ ગાથાબન્ધસુખત્થં મિગે આદિં કત્વા મિગરાજાતિ વુત્તં. યદા ભગવન્તં દિસ્વા સપુપ્ફં સાલસાખં ભઞ્જિત્વા પૂજેસિં, તદા અહં મિગરાજા અહોસિન્તિ અત્થો.

૬૨. સકોસં પુપ્ફમાહરિન્તિ સકણ્ણિકં સાલપુપ્ફં આહરિં પૂજેસિન્તિ અત્થો. સેસં ઉત્તાનત્થમેવાતિ.

સાલપુપ્ફદાયકત્થેરઅપદાનવણ્ણના સમત્તા.

૧૦. પિયાલફલદાયકત્થેરઅપદાનવણ્ણના

પરોધકો તદા આસિન્તિઆદિકં આયસ્મતો પિયાલફલદાયકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિખિસ્સ ભગવતો કાલે નેસાદકુલે નિબ્બત્તો હિમવન્તે એકસ્મિં પબ્ભારે મિગે વધિત્વા જીવિકં કપ્પેત્વા વસતિ. તસ્મિં કાલે તત્થ ગતં સિખિં ભગવન્તં દિસ્વા પસન્નમાનસો સાયં પાતં નમસ્સમાનો કઞ્ચિ દેય્યધમ્મં અપસ્સન્તો મધુરાનિ પિયાલફલાનિ ઉચ્ચિનિત્વા અદાસિ. ભગવા તાનિ પરિભુઞ્જિ. સો નેસાદો બુદ્ધારમ્મણાય પીતિયા નિરન્તરં ફુટ્ઠસરીરો પાપકમ્મે વિરત્તચિત્તો મૂલફલાહારો નચિરસ્સેવ કાલં કત્વા દેવલોકે નિબ્બત્તિ.

૬૬. સો તત્થ દિબ્બસમ્પત્તિયો અનુભવિત્વા મનુસ્સેસુ ચ અનેકવિધસમ્પત્તિયો અનુભવિત્વા ઇમસ્મિં બુદ્ધુપ્પાદે ગહપતિકુલે નિબ્બત્તો વિઞ્ઞુતં પત્તો ઘરાવાસં સણ્ઠપેત્વા તત્થ અનભિરતો ગેહં પહાય સત્થુ સન્તિકે પબ્બજિત્વા વિપસ્સનં વડ્ઢેત્વા નચિરસ્સેવ અરહત્તં પત્તો અત્તનો કતફલદાનકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પરોધકો તદા આસિન્તિઆદિમાહ. તત્થ યદા અહં પિયાલફલં દત્વા ચિત્તં પસાદેસિં, તદા અહં પરોધકો આસિન્તિ સમ્બન્ધો. પરોધકોતિ પરસત્તરોધકો વિહેસકો. ‘‘પરરોધકો’’તિ વત્તબ્બે પુબ્બસ્સ ર-કારસ્સ લોપં કત્વા ‘‘પરોધકો’’તિ વુત્તં.

૬૯. પરિચારિં વિનાયકન્તિ તં નિબ્બાનપાપકં સત્થારં, ‘‘ભન્તે, ઇમં ફલં પરિભુઞ્જથા’’તિ પવારિં નિમન્તેસિં આરાધેસિન્તિ અત્થો. સેસં સુવિઞ્ઞેય્યમેવાતિ.

પિયાલફલદાયકત્થેરઅપદાનવણ્ણના સમત્તા.

ચુદ્દસમવગ્ગવણ્ણના સમત્તા.