૧૧. ભિક્ખદાયિવગ્ગો

૧. ભિક્ખાદાયકત્થેરઅપદાનવણ્ણના

સુવણ્ણવણ્ણં સમ્બુદ્ધન્તિઆદિકં આયસ્મતો ભિક્ખાદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે એકસ્મિં કુલગેહે નિબ્બત્તો વુદ્ધિમન્વાય વિભવસમ્પન્નો સદ્ધાજાતો વિહારતો નિક્ખમિત્વા પિણ્ડાય ચરમાનં સિદ્ધત્થં ભગવન્તં દિસ્વા પસન્નમાનસો આહારમદાસિ. ભગવા તં પટિગ્ગહેત્વા અનુમોદનં વત્વા પક્કામિ. સો તેનેવ કુસલેન યાવતાયુકં ઠત્વા આયુપરિયોસાને દેવલોકે નિબ્બત્તો તત્થ છ કામાવચરસમ્પત્તિયો અનુભવિત્વા મનુસ્સેસુ ચ મનુસ્સસમ્પત્તિમનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સદ્ધાજાતો પબ્બજિત્વા નચિરસ્સેવ અરહા અહોસિ.

૧. સો અપરભાગે અત્તનો પુબ્બકમ્મં અનુસ્સરિત્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તં સબ્બં હેટ્ઠા વુત્તનયમેવ. પવરા અભિનિક્ખન્તન્તિ પકારેન વરિતબ્બં પત્થેતબ્બન્તિ પવરં, રમ્મભૂતતો વિવેકભૂતતો સકવિહારતો અભિ વિસેસેન નિક્ખન્તન્તિ અત્થો. વાના નિબ્બાનમાગતન્તિ વાનં વુચ્ચતિ તણ્હા, તતો નિક્ખન્તત્તા નિબ્બાનં, વાનનામં તણ્હં પધાનં કત્વા સબ્બકિલેસે પહાય નિબ્બાનં પત્તન્તિ અત્થો.

૨. કટચ્છુભિક્ખં દત્વાનાતિ કરતલેન ગહેતબ્બા દબ્બિ કટચ્છુ, ભિક્ખીયતિ આયાચીયતીતિ ભિક્ખા, અભિ વિસેસેન ખાદિતબ્બા ભક્ખિતબ્બાતિ વા ભિક્ખા, કટચ્છુના ગહેતબ્બા ભિક્ખા કટચ્છુભિક્ખા, દબ્બિયા ભત્તં દત્વાતિ અત્થો. સેસં સબ્બત્થ ઉત્તાનત્થમેવાતિ.

ભિક્ખાદાયકત્થેરઅપદાનવણ્ણના સમત્તા.

૨. ઞાણસઞ્ઞિકત્થેરઅપદાનવણ્ણના

સુવણ્ણવણ્ણં સમ્બુદ્ધન્તિઆદિકં આયસ્મતો ઞાણસઞ્ઞિકત્થેરસ્સ અપદાનં. કા ઉપ્પત્તિ? અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે કુલગેહે નિબ્બત્તો વુદ્ધિમન્વાય સદ્ધાજાતો સદ્ધમ્મસ્સવને સાદરો સાલયો ભગવતો ધમ્મદેસનાનુસારેન ઞાણં પેસેત્વા ઘોસપમાણત્તા ભગવતો ઞાણે પસન્નો પઞ્ચઙ્ગઅટ્ઠઙ્ગનમક્કારવસેન પણામં કત્વા પક્કામિ. સો તતો ચુતો દેવલોકેસુ ઉપ્પન્નો તત્થ છ કામાવચરે દિબ્બસમ્પત્તિમનુભવન્તો તતો ચવિત્વા મનુસ્સલોકે જાતો તત્થગ્ગભૂતા ચક્કવત્તિસમ્પદાદયો અનુભવિત્વા ઇમસ્મિં બુદ્ધુપ્પાદે વિભવસમ્પન્ને એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો નચિરસ્સેવ અરહા અહોસિ.

૭. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તં વુત્તત્થમેવ. નિસભાજાનિયં યથાતિ ગવસતસહસ્સજેટ્ઠો નિસભો, નિસભો ચ સો આજાનિયો સેટ્ઠો ઉત્તમો ચેતિ નિસભાજાનિયો. યથા નિસભાજાનિયો, તથેવ ભગવાતિ અત્થો. લોકવિસયસઞ્ઞાતં પઞ્ઞત્તિવસેન એવં વુત્તં. અનુપમેય્યો હિ ભગવા. સેસં સબ્બત્થ ઉત્તાનત્થમેવાતિ.

ઞાણસઞ્ઞિકત્થેરઅપદાનવણ્ણના સમત્તા.

૩. ઉપ્પલહત્થિયત્થેરઅપદાનવણ્ણના

તિવરાયં નિવાસીહન્તિઆદિકં આયસ્મતો ઉપ્પલહત્થકત્થેરસ્સ અપદાનં. અયમ્પિ પુરિમજિનવરેસુ કતકુસલો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો સિદ્ધત્થસ્સ ભગવતો કાલે માલાકારકુલે નિબ્બત્તો વુદ્ધિમન્વાય માલાકારકમ્મેન અનેકાનિ પુપ્ફાનિ વિક્કિણન્તો જીવતિ. અથેકદિવસં પુપ્ફાનિ ગહેત્વા ચરન્તો ભગવન્તં રતનગ્ઘિકમિવ ચરમાનં દિસ્વા રત્તુપ્પલકલાપેન પૂજેસિ. સો તતો ચુતો તેનેવ પુઞ્ઞેન સુગતીસુ પુઞ્ઞમનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સદ્ધાજાતો પબ્બજિત્વા નચિરસ્સેવ અરહા અહોસિ.

૧૩. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો તિવરાયં નિવાસીહન્તિઆદિમાહ. તત્થ તિવરાતિ તીહિ વારેહિ કારિતં સઞ્ચરિતં પટિચ્છન્નં નગરં, તસ્સં તિવરાયં નિવાસી, વસનસીલો નિવાસનટ્ઠાનગેહે વા વસન્તો અહન્તિ અત્થો. અહોસિં માલિકો તદાતિ તદા નિબ્બાનત્થાય પુઞ્ઞસમ્ભારકરણસમયે માલિકો માલાકારોવ પુપ્ફાનિ કયવિક્કયં કત્વા જીવન્તો અહોસિન્તિ અત્થો.

૧૪. પુપ્ફહત્થમદાસહન્તિ સિદ્ધત્થં ભગવન્તં દિસ્વા ઉપ્પલકલાપં અદાસિં પૂજેસિન્તિ અત્થો. સેસં સબ્બત્થ ઉત્તાનત્થમેવાતિ.

ઉપ્પલહત્થકત્થેરઅપદાનવણ્ણના સમત્તા.

૪. પદપૂજકત્થેરઅપદાનવણ્ણના

સિદ્ધત્થસ્સ ભગવતોતિઆદિકં આયસ્મતો પદપૂજકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો સિદ્ધત્થસ્સ ભગવતો કાલે કુલગેહે નિબ્બત્તો વુદ્ધિમન્વાય સત્થરિ પસન્નો સુમનપુપ્ફેન પાદમૂલે પૂજેસિ. સો તેન પુઞ્ઞેન દેવમનુસ્સેસુ સંસરન્તો સક્કસમ્પત્તિં અનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો વિપસ્સનં વડ્ઢેત્વા અરહત્તફલે પતિટ્ઠાસિ.

૧૯. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સિદ્ધત્થસ્સ ભગવતોતિઆદિમાહ. જાતિપુપ્ફમદાસહન્તિ જાતિસુમનપુપ્ફં અદાસિં અહન્તિ વત્તબ્બે ગાથાબન્ધસુખત્થં સુમનસદ્દસ્સ લોપં કત્વા વુત્તં. તત્થ જાતિયા નિબ્બત્તો વિકસમાનોયેવ સુમનં જનાનં સોમનસ્સં કરોતીતિ સુમનં, પુપ્ફનટ્ઠેન વિકસનટ્ઠેન પુપ્ફં, સુમનઞ્ચ તં પુપ્ફઞ્ચાતિ સુમનપુપ્ફં, તાનિ સુમનપુપ્ફાનિ સિદ્ધત્થસ્સ ભગવતો અહં પૂજેસિન્તિ અત્થો. સેસં સબ્બત્થ ઉત્તાનમેવાતિ.

પદપૂજકત્થેરઅપદાનવણ્ણના સમત્તા.

૫. મુટ્ઠિપુપ્ફિયત્થેરઅપદાનવણ્ણના

સુદસ્સનો નામ નામેનાતિઆદિકં આયસ્મતો મુટ્ઠિપુપ્ફિયત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે માલાકારકુલે નિબ્બત્તો વુદ્ધિમન્વાય સકસિપ્પે નિપ્ફત્તિં પત્તો એકદિવસં ભગવન્તં દિસ્વા પસન્નમાનસો જાતિસુમનપુપ્ફાનિ ઉભોહિ હત્થેહિ ભગવતો પાદમૂલે ઓકિરિત્વા પૂજેસિ. સો તેન કુસલસમ્ભારેન દેવમનુસ્સેસુ સંસરન્તો ઉભો સમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિપ્પત્તો પુબ્બવાસનાવસેન સત્થરિ પસીદિત્વા પબ્બજિતો નચિરસ્સેવ અરહા અહોસિ.

૧૪-૨૫. સો અપરભાગે અત્તનો પુબ્બકમ્મં અનુસ્સરિત્વા સોમનસ્સજાતો પુબ્બચરિતાપદાનં પકાસેન્તો સુદસ્સનો નામ નામેનાતિઆદિમાહ. તત્થ સુદસ્સનોતિ આરોહપરિણાહરૂપસણ્ઠાનયોબ્બઞ્ઞસોભનેન સુન્દરો દસ્સનોતિ સુદસ્સનો, નામેન સુદસ્સનો નામ માલાકારો હુત્વા જાતિસુમનપુપ્ફેહિ પદુમુત્તરં ભગવન્તં પૂજેસિન્તિ અત્થો. સેસં સબ્બત્થ ઉત્તાનમેવાતિ.

મુટ્ઠિપુપ્ફિયત્થેરઅપદાનવણ્ણના સમત્તા.

૬. ઉદકપૂજકત્થેરઅપદાનવણ્ણના

સુવણ્ણવણ્ણં સમ્બુદ્ધન્તિઆદિકં આયસ્મતો ઉદકપૂજકત્થેરસ્સ અપદાનં. અયમ્પિ પુરિમજિનવરેસુ પૂરિતકુસલસઞ્ચયો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ પરિપૂરિયમાનો પુદુમુત્તરસ્સ ભગવતો કાલે એકસ્મિં કુલગેહે નિબ્બત્તો વુદ્ધિમન્વાય કુસલાકુસલં જાનન્તો પદુમુત્તરસ્સ ભગવતો આકાસે ગચ્છતો નિક્ખન્તછબ્બણ્ણબુદ્ધરંસીસુ પસન્નો ઉભોહિ હત્થેહિ ઉદકં ગહેત્વા પૂજેસિ. તેન પૂજિતં ઉદકં રજતબુબ્બુલં વિય આકાસે અટ્ઠાસિ. સો અભિપ્પસન્નો તેનેવ સોમનસ્સેન તુસિતાદીસુ નિબ્બત્તો દિબ્બસમ્પત્તિયો અનુભવિત્વા અપરભાગે મનુસ્સસમ્પત્તિયો ચ અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો સત્થરિ પસીદિત્વા પબ્બજિતો નચિરસ્સેવ અરહા અહોસિ.

૨૯. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તં હેટ્ઠા વુત્તમેવ. ઘતાસનંવ જલિતન્તિ ઘતં વુચ્ચતિ સપ્પિ, ઘતસ્સ આસનં આધારન્તિ ઘતાસનં, અગ્ગિ, અથ વા તં અસતિ ભુઞ્જતીતિ ઘતાસનં, અગ્ગિયેવ. યથા ઘતે આસિત્તે અગ્ગિમ્હિ અગ્ગિસિખા અતીવ જલતિ, એવં અગ્ગિક્ખન્ધં ઇવ જલમાનં ભગવન્તન્તિ અત્થો. આદિત્તંવ હુતાસનન્તિ હુતં વુચ્ચતિ પૂજાસક્કારે, હુતસ્સ પૂજાસક્કારસ્સ આસનન્તિ હુતાસનં, જલમાનં સૂરિયં ઇવ દ્વત્તિંસમહાપુરિસલક્ખણેહિ બ્યામપ્પભામણ્ડલેહિ વિજ્જોતમાનં સુવણ્ણવણ્ણં સમ્બુદ્ધં અનિલઞ્જસે આકાસે ગચ્છન્તં અદ્દસન્તિ સમ્બન્ધો. સેસં સબ્બત્થ ઉત્તાનમેવાતિ.

ઉદકપૂજકત્થેરઅપદાનવણ્ણના સમત્તા.

૭. નળમાલિયત્થેરઅપદાનવણ્ણના

પદુમુત્તરબુદ્ધસ્સાતિઆદિકં આયસ્મતો નળમાલિયત્થેરસ્સ અપદાનં. એસોપિ પુરિમજિનવરેસુ કતાધિકારો અનેકાસુ જાતીસુ વિવટ્ટૂપનિસ્સયાનિ કુસલકમ્માનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વુદ્ધિમન્વાય ઘરાવાસં સણ્ઠપેત્વા કામે આદીનવં દિસ્વા ગેહં પહાય તાપસપબ્બજ્જં પબ્બજિત્વા હિમવન્તે વસન્તો તત્થાગતં ભગવન્તં દિસ્વા પસન્નો વન્દિત્વા તિણસન્થરં સન્થરિત્વા તત્થ નિસિન્નસ્સ ભગવતો નળમાલેહિ બીજનિં કત્વા બીજેત્વા અદાસિ. પટિગ્ગહેસિ ભગવા તસ્સાનુકમ્પાય, અનુમોદનઞ્ચ અકાસિ. સો તેન પુઞ્ઞેન દેવમનુસ્સેસુ સંસરન્તો ઉપ્પન્નુપ્પન્નભવે પરિળાહસન્તાપવિવજ્જિતો કાયચિત્તચેતસિકસુખપ્પત્તો અનેકસુખમનુભવિત્વા ઇમસ્મિં બુદ્ધુપ્પાદે એકસ્મિં કુલગેહે નિબ્બત્તો વુદ્ધિમન્વાય પુબ્બવાસનાબલેન સત્થરિ પસન્નો પબ્બજિત્વા નચિરસ્સેવ અરહા અહોસિ.

૩૬. સો અપરભાગે અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો પદુમુત્તરબુદ્ધસ્સાતિઆદિમાહ. તં હેટ્ઠા વુત્તમેવ.

૩૭. નળમાલં ગહેત્વાનાતિ નળતિ અસારો નિસ્સારો હુત્વા વેળુવંસતોપિ તનુકો સલ્લહુકો જાતોતિ નળો, નળસ્સ માલા પુપ્ફં નળમાલં, તેન નળમાલેન બીજનિં કારેસિન્તિ સમ્બન્ધો. બીજિસ્સતિ જનિસ્સતિ વાતો અનેનાતિ બીજની, તં બીજનિં બુદ્ધસ્સ ઉપનામેસિં, પટિગ્ગહેસિન્તિ અત્થો. સેસં સબ્બત્થ ઉત્તાનમેવાતિ.

નળમાલિયત્થેરઅપદાનવણ્ણના સમત્તા.

સત્તમભાણવારવણ્ણના સમત્તા.

૮. આસનુપટ્ઠાહકત્થેરઅપદાનવણ્ણના

કાનનં વનમોગ્ગય્હાતિઆદિકં આયસ્મતો આસનુપટ્ઠાહકત્થેરસ્સ અપદાનં. અયમ્પિ પુરિમબુદ્ધેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો અત્થદસ્સિસ્સ ભગવતો કાલે કુલગેહે નિબ્બત્તો ઘરાવાસં વસન્તો તત્થ દોસં દિસ્વા ઘરાવાસં પહાય તાપસપબ્બજ્જં પબ્બજિત્વા હિમવન્તે વસન્તો તત્થ સમ્પત્તં ભગવન્તં દિસ્વા પસન્નો સીહાસનં અદાસિ, તત્થ નિસિન્નં ભગવન્તં માલાકલાપં ગહેત્વા પૂજેત્વા તં પદક્ખિણં કત્વા પક્કામિ. સો તેન પુઞ્ઞેન દેવમનુસ્સેસુ સંસરન્તો નિબ્બત્તનિબ્બત્તભવે ઉચ્ચકુલિકો વિભવસમ્પન્નો અહોસિ. સો કાલન્તરેન ઇમસ્મિં બુદ્ધુપ્પાદે કુલગેહે નિબ્બત્તો વુદ્ધિમન્વાય સત્થરિ પસીદિત્વા પબ્બજિતો નચિરસ્સેવ અરહા અહોસિ.

૪૭. સો અરહા સમાનો અત્તનો પુબ્બકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો કાનનં વનમોગ્ગય્હાતિઆદિમાહ. તં સબ્બં હેટ્ઠા વુત્તત્થમેવાતિ.

આસનુપટ્ઠાહકત્થેરઅપદાનવણ્ણના સમત્તા.

૯. બિળાલિદાયકત્થેરઅપદાનવણ્ણના

હિમવન્તસ્સાવિદૂરેતિઆદિકં આયસ્મતો બિળાલિદાયકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો પદુમુત્તરસ્સ ભગવતો કાલે કુલગેહે નિબ્બત્તો વિઞ્ઞુતં પત્તો ઘરાવાસં વસન્તો તત્થાદીનવં દિસ્વા ઘરાવાસં પહાય તાપસપબ્બજ્જં પબ્બજિત્વા હિમવન્તે વસન્તો અતીવ અપ્પિચ્છસન્તુટ્ઠો આલુવાદીહિ યાપેન્તો વસતિ. તદા પદુમુત્તરો ભગવા તસ્સ અનુકમ્પાય તં હિમવન્તં અગમાસિ. તં દિસ્વા પસન્નો વન્દિત્વા બિળાલિયો ગહેત્વા પત્તે ઓકિરિ. તં તથાગતો તસ્સાનુકમ્પાય સોમનસ્સુપ્પાદયન્તો પરિભુઞ્જિ. સો તેન કમ્મેન તતો ચુતો દેવમનુસ્સેસુ ઉભયસમ્પત્તિયો અનુભવિત્વા ઇમસ્મિં બુદ્ધુપ્પાદે કુલગેહે નિબ્બત્તિત્વા વુદ્ધિમન્વાય સત્થરિ પસન્નો સાસને પબ્બજિત્વા નચિરસ્સેવ અરહા અહોસિ.

૫૩. સો અપરભાગે અત્તનો કુસલકમ્મં સરિત્વા સોમનસ્સજાતો પુબ્બચરિતાપદાનં પકાસેન્તો હિમવન્તસ્સાવિદૂરેતિઆદિમાહ. તં સબ્બં હેટ્ઠા વુત્તનયત્તા ઉત્તાનત્થમેવ. આલુવકરમ્ભાદયો તેસં તેસં કન્દજાતીનં નામાનેવાતિ.

બિળાલિદાયકત્થેરઅપદાનવણ્ણના સમત્તા.

૧૦. રેણુપૂજકત્થેરઅપદાનવણ્ણના

સુવણ્ણવણ્ણં સમ્બુદ્ધન્તિઆદિકં આયસ્મતો રેણુપૂજકત્થેરસ્સ અપદાનં. અયમ્પિ પુરિમજિનવરેસુ કતાધિકારો તત્થ તત્થ ભવે વિવટ્ટૂપનિસ્સયાનિ પુઞ્ઞાનિ ઉપચિનન્તો વિપસ્સિસ્સ ભગવતો કાલે કુલગેહે નિબ્બત્તો વુદ્ધિમન્વાય સત્થરિ પસન્નો વિઞ્ઞુતં પત્તો અગ્ગિક્ખન્ધં વિય વિજ્જોતમાનં ભગવન્તં દિસ્વા પસન્નમાનસો નાગપુપ્ફકેસરં ગહેત્વા પૂજેસિ. અથ ભગવા અનુમોદનમકાસિ.

૬૨-૩. સો તેન પુઞ્ઞેન તતો ચુતો દેવમનુસ્સેસુ સંસરન્તો ઉભયસમ્પત્તિયો અનુભવિત્વા ઉપ્પન્નુપ્પન્નભવે સબ્બત્થ પૂજિતો ઇમસ્મિં બુદ્ધુપ્પાદે કુલગેહે નિબ્બત્તો વિઞ્ઞુતં પત્તો પુબ્બવાસનાબલેન સત્થરિ પસન્નો સાસને પબ્બજિતો નચિરસ્સેવ અરહા હુત્વા દિબ્બચક્ખુના અત્તનો પુબ્બકમ્મં દિસ્વા સોમનસ્સજાતો પુબ્બચરિતાપદાનં પકાસેન્તો સુવણ્ણવણ્ણં સમ્બુદ્ધન્તિઆદિમાહ. તં હેટ્ઠા વુત્તત્થમેવ. સતરંસિંવ ભાણુમન્તિ સતમત્તા સતપ્પમાણા રંસિ પભા યસ્સ સૂરિયસ્સ સો સતરંસિ, ગાથાબન્ધસુખત્થં સતરંસીતિ વુત્તં, અનેકસતસ્સ અનેકસતસહસ્સરંસીતિ અત્થો. ભાણુ વુચ્ચતિ પભા, ભાણુ પભા યસ્સ સો ભાણુમા, ભાણુમસઙ્ખાતં સૂરિયં ઇવ વિપસ્સિં ભગવન્તં દિસ્વા સકેસરં નાગપુપ્ફં ગહેત્વા અભિરોપયિં પૂજેસિન્તિ અત્થો. સેસં ઉત્તાનમેવાતિ.

રેણુપૂજકત્થેરઅપદાનવણ્ણના સમત્તા.

એકાદસમવગ્ગવણ્ણના સમત્તા.