સોમનસ્સપટિલાભકથાવણ્ણના

૩૬૮. વેદપટિલાભન્તિ તુટ્ઠિપટિલાભં. દેવાસુરસઙ્ગામોતિ દેવાનઞ્ચ અસુરાનઞ્ચ સઙ્ગામો. સમુપબ્યૂળ્હોતિ સમાપન્નો નલાટેન નલાટં પહરણાકારપ્પત્તો વિય. એતેસં કિર કદાચિ મહાસમુદ્દપિટ્ઠે સઙ્ગામો હોતિ તત્થ પન છેદનવિજ્ઝનાદીહિ અઞ્ઞમઞ્ઞં ઘાતો નામ નત્થિ, દારુમેણ્ડકયુદ્ધં વિય જયપરાજયમત્તમેવ હોતિ. કદાચિ દેવા જિનન્તિ, કદાચિ અસુરા. તત્થ યસ્મિં સઙ્ગામે દેવા પુન અપચ્ચાગમનાય અસુરે જિનિંસુ, તં સન્ધાય તસ્મિં ખો પન ભન્તેતિઆદિમાહ. ઉભયમેતન્તિ ઉભયં એતં. દુવિધમ્પિ ઓજં એત્થ દેવલોકે દેવાયેવ પરિભુઞ્જિસ્સન્તીતિ એવમસ્સ આવજ્જન્તસ્સ બલવપીતિસોમનસ્સં ઉપ્પજ્જિ. સદણ્ડાવચરોતિ સદણ્ડાવચરકો, દણ્ડગ્ગહણેન સત્થગ્ગહણેન સદ્ધિં અહોસિ, ન નિક્ખિત્તદણ્ડસત્થોતિ દસ્સેતિ. એકન્તનિબ્બિદાયાતિ એકન્તેનેવ વટ્ટે નિબ્બિન્દનત્થાયાતિ સબ્બં મહાગોવિન્દસુત્તે વુત્તમેવ.

૩૬૯. પવેદેસીતિ કથેસિ દીપેસિ. ઇધેવાતિ ઇમસ્મિઞ્ઞેવ ઓકાસે. દેવભૂતસ્સ મે સતોતિ દેવસ્સ મે સતો. પુનરાયુ ચ મે લદ્ધોતિ પુન અઞ્ઞેન કમ્મવિપાકેન મે જીવિતં લદ્ધન્તિ, ઇમિના અત્તનો ચુતભાવં ચેવ ઉપપન્નભાવઞ્ચ આવિકરોતિ.

દિવિયા કાયાતિ દિબ્બા અત્તભાવા. આયું હિત્વા અમાનુસન્તિ દિબ્બં આયું જહિત્વા. અમૂળ્હો ગબ્ભમેસ્સામીતિ નિયતગતિકત્તા અમૂળ્હો હુત્વા. યત્થ મે રમતી મનોતિ યત્થ મે મનો રમિસ્સતિ, તત્થેવ ખત્તિયકુલાદીસુ ગબ્ભં ઉપગચ્છિસ્સામીતિ સત્તક્ખત્તું દેવે ચ માનુસે ચાતિ ઇમમત્થં દીપેતિ.

ઞાયેન વિહરિસ્સામીતિ મનુસ્સેસુ ઉપપન્નોપિ માતરં જીવિતા વોરોપનાદીનં અભબ્બત્તા ઞાયેન કારણેન સમેન વિહરિસ્સામીતિ અત્થો.

સમ્બોધિ ચે ભવિસ્સતીતિ ઇદં સકદાગામિમગ્ગં સન્ધાય વદતિ, સચે સકદાગામી ભવિસ્સામીતિ દીપેતિ. અઞ્ઞાતા વિહરિસ્સામીતિ અઞ્ઞાતા આજાનિતુકામો હુત્વા વિહરિસ્સામિ. સ્વેવ અન્તો ભવિસ્સતીતિ સો એવ મે મનુસ્સલોકે અન્તો ભવિસ્સતીતિ.

પુન દેવો ભવિસ્સામિ, દેવલોકસ્મિં ઉત્તમોતિ પુન દેવલોકસ્મિં ઉત્તમો સક્કો દેવાનમિન્દો ભવિસ્સામીતિ વદતિ.

અન્તિમે વત્તમાનમ્હીતિ અન્તિમે ભવે વત્તમાને. સો નિવાસો ભવિસ્સતીતિ યે તે આયુના ચ પઞ્ઞાય ચ અકનિટ્ઠા જેટ્ઠકા સબ્બદેવેહિ પણીતતરા દેવા, અવસાને મે સો નિવાસો ભવિસ્સતિ. અયં કિર તતો સક્કત્તભાવતો ચુતો તસ્મિં અત્તભાવે અનાગામિમગ્ગસ્સ પટિલદ્ધત્તા ઉદ્ધંસોતો અકનિટ્ઠગામી હુત્વા અવિહાદીસુ નિબ્બત્તન્તો અવસાને અકનિટ્ઠે નિબ્બત્તિસ્સતિ. તં સન્ધાય એવમાહ. એસ કિર અવિહેસુ કપ્પસહસ્સં વસિસ્સતિ, અતપ્પેસુ દ્વે કપ્પસહસ્સાનિ, સુદસ્સેસુ ચત્તારિ કપ્પસહસ્સાનિ, સુદસ્સીસુ અટ્ઠ, અકનિટ્ઠેસુ સોળસાતિ એકતિંસ કપ્પસહસ્સાનિ બ્રહ્મઆયું અનુભવિસ્સતિ. સક્કો દેવરાજા અનાથપિણ્ડિકો ગહપતિ વિસાખા મહાઉપાસિકાતિ તયોપિ હિ ઇમે એકપ્પમાણઆયુકા એવ, વટ્ટાભિરતસત્તા નામ એતેહિ સદિસા સુખભાગિનો નામ નત્થિ.

૩૭૦. અપરિયોસિતસઙ્કપ્પોતિ અનિટ્ઠિતમનોરથો. યસ્સુ મઞ્ઞામિ સમણેતિ યે ચ સમણે પવિવિત્તવિહારિનોતિ મઞ્ઞામિ.

આરાધનાતિ સમ્પાદના. વિરાધનાતિ અસમ્પાદના. ન સમ્પાયન્તીતિ સમ્પાદેત્વા કથેતું ન સક્કોન્તિ.

આદિચ્ચબન્ધુનન્તિ આદિચ્ચોપિ ગોતમગોત્તો, ભગવાપિ ગોતમગોત્તો, તસ્મા એવમાહ. યં કરોમસીતિ યં પુબ્બે બ્રહ્મુનો નમક્કારં કરોમ. સમં દેવેહીતિ દેવેહિ સદ્ધિં, ઇતો પટ્ઠાય ઇદાનિ અમ્હાકં બ્રહ્મુનો નમક્કારકરણં નત્થીતિ દસ્સેતિ. સામં કરોમાતિ નમક્કારં કરોમ.

૩૭૧. પરામસિત્વાતિ તુટ્ઠચિત્તો સહાયં હત્થેન હત્થમ્હિ પહરન્તો વિય પથવિં પહરિત્વા, સક્ખિભાવત્થાય વા પહરિત્વા ‘‘યથા ત્વં નિચ્ચલો, એવમહં ભગવતી’’તિ. અજ્ઝિટ્ઠપઞ્હાતિ અજ્ઝેસિતપઞ્હા પત્થિતપઞ્હા. સેસં સબ્બત્થ ઉત્તાનમેવાતિ.

ઇતિ સુમઙ્ગલવિલાસિનિયા દીઘનિકાયટ્ઠકથાયં

સક્કપઞ્હસુત્તવણ્ણના નિટ્ઠિતા.