૪. તિકદુકપટ્ઠાનવણ્ણના

તિકદુકપટ્ઠાનેપિ કુસલં હેતું ધમ્મં પટિચ્ચ કુસલો હેતુ ધમ્મો ઉપ્પજ્જતિ હેતુપચ્ચયાતિ પઞ્હામત્તુદ્ધારવસેનેવ દેસના કતા. તત્થ યથા હેટ્ઠા હેતુદુકેન સદ્ધિં કુસલપદં યોજેત્વા સબ્બપચ્ચયવસેન સબ્બવારેસુ સઙ્ખેપતો દેસના કતા, એવમિધ કુસલત્તિકેન સદ્ધિં હેતુપદં યોજેત્વા સબ્બપચ્ચયવસેન સબ્બવારેસુ સઙ્ખેપતો દેસના કતા. યથા ચ હેતુપદં, એવં નહેતુપદમ્પિ કુસલત્તિકેન સદ્ધિં યોજેત્વા કુસલત્તિકહેતુદુકં નિટ્ઠાપિતં. તતો પરં સુખાય વેદનાય સમ્પયુત્તં હેતું ધમ્મન્તિઆદિના નયેન વેદનાત્તિકહેતુદુકાદીનિ એકવીસતિ તિકદુકાનિ દસ્સિતાનિ.

એવં બાવીસતિયા તિકેહિ સદ્ધિં હેતુદુકં યોજેત્વા પુન તેહિયેવ સદ્ધિં સહેતુકદુકાદયો સરણદુકપરિયોસાના લબ્ભમાનવસેન સબ્બદુકા યોજિતા. ઇધાપિ યં યં પદં યોજનં ન ગચ્છતિ, તં તં પાળિયંયેવ પટિક્ખિત્તં. એવં દુકસતં ગહેત્વા દ્વાવીસતિયા તિકેસુ પક્ખિપિત્વા તિકદુકપટ્ઠાનં નામ દેસિતં. તત્રાપિ યેન યેન નયેન પાળિ સઙ્ખિત્તા, સો સો નયો વિત્થારતો વેદિતબ્બો.

તિકદુકપટ્ઠાનવણ્ણના.