૫. તિકતિકપટ્ઠાનવણ્ણના

તિકતિકપટ્ઠાનેપિ કુસલં સુખાય વેદનાય સમ્પયુત્તં ધમ્મં પટિચ્ચ કુસલો સુખાય વેદનાય સમ્પયુત્તો ધમ્મો ઉપ્પજ્જતિ હેતુપચ્ચયાતિ પઞ્હુદ્ધારવસેનેવ સઙ્ખેપતો દેસના કતા. એત્થ ચ કુસલત્તિકં વેદનાત્તિકાદીહિ, વેદનાત્તિકાદયો ચ કુસલત્તિકેનાતિ એવં તિકેસુયેવ તિકા પક્ખિત્તા. યેન યેન ચ પદેન સદ્ધિં યં યં પદં યોજનં ન ગચ્છતિ, તં તં હાપેત્વા લબ્ભમાનવસેનેવ સબ્બપચ્ચયેસુ વારા ચ ગણનનયા ચ દસ્સિતા, તસ્મા તે સાધુકં પાળિં ઉપપરિક્ખિત્વા વેદિતબ્બા. યથા ચ કુસલત્તિકં વેદનાત્તિકાદીહિ, વેદનાત્તિકાદયો ચ તેન સદ્ધિં યોજેત્વા વેદિતબ્બા; તથા એકેકં તિકં સેસેહિ. સેસા ચ તેહિ સદ્ધિં યોજેત્વા વેદિતબ્બાતિ.

તિકતિકપટ્ઠાનવણ્ણના.