૪. ઉપાદિન્નત્તિકવણ્ણના

૫૧. ઉપાદિન્નુપાદાનિયત્તિકસ્સ પઞ્હાવારે વત્થુ ઉપાદાનિયાનં ખન્ધાનં પુરેજાતપચ્ચયેન પચ્ચયોતિ પવત્તિં સન્ધાય વુત્તં. પટિસન્ધિયં પન તં પુરેજાતં ન હોતિ.

૭૨. ઉપાદિન્નુપાદાનિયો કબળીકારો આહારો ઉપાદિન્નુપાદાનિયસ્સ કાયસ્સ આહારપચ્ચયેન પચ્ચયોતિ એત્થ ઉપાદિન્નુપાદાનિયો કબળીકારાહારો નામ કમ્મસમુટ્ઠાનાનં રૂપાનં અબ્ભન્તરગતા ઓજા. ઉપાદિન્નુપાદાનિયસ્સ કાયસ્સાતિ તસ્સેવ કમ્મસમુટ્ઠાનરૂપકાયસ્સ આહારપચ્ચયેન પચ્ચયો. રૂપજીવિતિન્દ્રિયં વિય કટત્તારૂપાનં અનુપાલનઉપત્થમ્ભનવસેન પચ્ચયો, ન જનકવસેન. યં પન મણ્ડૂકાદયો ગિલિત્વા ઠિતાનં અહિઆદીનં કાયસ્સ જીવમાનકમણ્ડૂકાદિસરીરે ઓજા આહારપચ્ચયેન પચ્ચયોતિ વદન્તિ, તં ન ગહેતબ્બં. ન હિ જીવમાનકસરીરે ઓજા અઞ્ઞસ્સ સરીરસ્સ આહારપચ્ચયતં સાધેતિ. અનુપાદિન્નુપાદાનિયસ્સ કાયસ્સાતિ એત્થ પન જનકવસેનાપિ લબ્ભતિ. ઉપાદિન્નુપાદાનિયસ્સ ચ અનુપાદિન્નુપાદાનિયસ્સ ચાતિ એત્થ એકસ્સ ઉપત્થમ્ભકવસેન, એકસ્સ જનકવસેન, ઉભિન્નમ્પિ વા ઉપત્થમ્ભકવસેનેવ વુત્તો. દ્વે પન આહારા એકતો પચ્ચયા હોન્તા ઉપત્થમ્ભકાવ હોન્તિ, ન જનકા. સેસમેત્થ પાળિમેવ સાધુકં ઓલોકેત્વા વેદિતબ્બં.

ઉપાદિન્નત્તિકવણ્ણના.