૨. ધમ્મદેસનાકથાવણ્ણના

૮૦૪-૮૦૬. ઇદાનિ ધમ્મદેસનાકથા નામ હોતિ. તત્થ ‘‘તુસિતપુરે ઠિતો ભગવા ધમ્મદેસનત્થાય અભિનિમ્મિતં પેસેસિ, તેન ચેવ તસ્સ ચ દેસનં સમ્પટિચ્છિત્વા આયસ્મતા આનન્દેન ધમ્મો દેસિતો, ન બુદ્ધેન ભગવતા’’તિ યેસં લદ્ધિ, સેય્યથાપિ વેતુલ્લકાનઞ્ઞેવ; તે સન્ધાય પુચ્છા સકવાદિસ્સ, પટિઞ્ઞા ઇતરસ્સ. અથ નં ‘‘યદિ તેન ધમ્મો દેસિતો, સ્વેવ સત્થા ભવેય્યા’’તિ ચોદેતું અભિનિમ્મિતો જિનોતિઆદિમાહ. ઇતરો તથા અસમ્પટિચ્છન્તો પટિક્ખિપતિ. સેસમેત્થ ઉત્તાનત્થમેવાતિ.

ધમ્મદેસનાકથાવણ્ણના.