૭. સમાપન્નો અસ્સાદેતીતિકથાવણ્ણના

૬૭૧-૬૭૩. ઇદાનિ સમાપન્નો અસ્સાદેતીતિકથા નામ હોતિ. તત્થ ‘‘પઠમં ઝાનં ઉપસમ્પજ્જ વિહરતિ, સો તદસ્સાદેતી’’તિઆદિવચનં (અ. નિ. ૪.૧૨૩) નિસ્સાય ‘‘સમાપન્નો અસ્સાદેતિ, સા ચસ્સ ઝાનનિકન્તિ ઝાનારમ્મણા હોતી’’તિ યેસં લદ્ધિ, સેય્યથાપિ અન્ધકાનં, તે સન્ધાય સમાપન્નોતિ પુચ્છા સકવાદિસ્સ, પટિઞ્ઞા ઇતરસ્સ. તં ઝાનં તસ્સ ઝાનસ્સ આરમ્મણન્તિ પઞ્હેસુ તસ્સેવ તદારમ્મણતં અપસ્સન્તો સુત્તવિરોધભયેન પટિક્ખિપતિ, ‘‘તદસ્સાદેતી’’તિવચનમત્તેન પટિજાનાતિ. સો તદસ્સાદેતીતિ સુત્તં ઝાનલાભિનો ઝાના વુટ્ઠાય ઝાનસ્સાદં સાધેતિ, ન અન્તોસમાપત્તિયંયેવ ઝાનનિકન્તિયા ઝાનારમ્મણતં, તસ્મા અસાધકન્તિ.

સમાપન્નો અસ્સાદેતીતિકથાવણ્ણના.