૬. દ્વીહિ સીલેહીતિકથાવણ્ણના

૫૮૭-૫૮૯. ઇદાનિ દ્વીહિ સીલેહીતિકથા નામ હોતિ. તત્થ ‘‘સીલે પતિટ્ઠાય નરો સપઞ્ઞો’’તિઆદિવચનતો (સં. નિ. ૧.૨૩) યસ્મા લોકિયેન સીલેન સીલવા લોકુત્તરં મગ્ગં ભાવેતિ, તસ્મા ‘‘પુરિમેન ચ લોકિયેન મગ્ગક્ખણે લોકુત્તરેન ચાતિ દ્વીહિ સીલેહિ સમન્નાગતો નામ હોતી’’તિ યેસં લદ્ધિ, સેય્યથાપિ મહાસંઘિકાનંયેવ, તે સન્ધાય મગ્ગસમઙ્ગીતિ પુચ્છા સકવાદિસ્સ, પટિઞ્ઞા ઇતરસ્સ. અથ નં ‘‘યદિ સો એકક્ખણે લોકિયલોકુત્તરેહિ દ્વીહિ સીલેહિ સમન્નાગતો, દ્વીહિ ફસ્સાદીહિપિ તેન સમન્નાગતેન ભવિતબ્બ’’ન્તિ ચોદેતું દ્વીહિ ફસ્સેહીતિઆદિમાહ. ઇતરો તથારૂપં નયં અપસ્સન્તો પટિક્ખિપતિ. લોકિયેન ચ લોકુત્તરેન ચાતિ પઞ્હે પુબ્બે સમાદિન્નઞ્ચ મગ્ગક્ખણે ઉપ્પન્નસમ્માવાચાદીનિ ચ સન્ધાય પટિજાનાતિ.

લોકિયે સીલે નિરુદ્ધેતિ પુચ્છા પરવાદિસ્સ, ખણભઙ્ગનિરોધં સન્ધાય પટિઞ્ઞા સકવાદિસ્સ. ઇતરો પન તં વીતિક્કમં વિય સલ્લક્ખેન્તો દુસ્સીલોતિઆદિમાહ. લદ્ધિપતિટ્ઠાપનં પનસ્સ પુબ્બે અભિન્નસીલતંયેવ દીપેતિ, ન દ્વીહિ સમન્નાગતતં. તસ્મા અપ્પતિટ્ઠિતાવ લદ્ધીતિ.

દ્વીહિ સીલેહીતિકથાવણ્ણના.