૯. આનન્દઅચ્છરિયસુત્તવણ્ણના

૧૨૯. નવમે ભિક્ખુપરિસા આનન્દં દસ્સનાયાતિ યે ભગવન્તં પસ્સિતુકામા થેરં ઉપસઙ્કમન્તિ, યે વા ‘‘આયસ્મા કિરાનન્દો સમન્તપાસાદિકો અભિરૂપો દસ્સનીયો બહુસ્સુતો સઙ્ઘસોભનો’’તિ થેરસ્સ ગુણે સુત્વા આગચ્છન્તિ, તે સન્ધાય ‘‘ભિક્ખુપરિસા આનન્દં દસ્સનાય ઉપસઙ્કમતી’’તિ વુત્તં. એસ નયો સબ્બત્થ. અત્તમનાતિ ‘‘સવનેન નો દસ્સનં સમેતી’’તિ સકમના તુટ્ઠચિત્તા. ધમ્મન્તિ ‘‘કચ્ચિ, આવુસો, ખમનીયં, કચ્ચિ યાપનીયં, કચ્ચિ યોનિસોમનસિકારકમ્મં કરોથ, આચરિયુપજ્ઝાયવત્તં પૂરેથા’’તિ એવરૂપં પટિસન્થારધમ્મં. તત્થ ભિક્ખુનીસુ ‘‘કચ્ચિ, ભગિનિયો, અટ્ઠ ગરુધમ્મે સમાદાય વત્તથા’’તિ ઇદમ્પિ નાનાકરણં હોતિ. ઉપાસકેસુ ‘‘સ્વાગતં, ઉપાસક, ન તે કિઞ્ચિ સીસં વા અઙ્ગં વા રુજ્જતિ, અરોગા તે પુત્તભાતરો’’તિ ન એવં પટિસન્થારં કરોતિ, એવં પન કરોતિ – ‘‘કથં, ઉપાસકા, તીણિ સરણાનિ પઞ્ચ સીલાનિ રક્ખથ, માસસ્સ અટ્ઠ ઉપોસથે કરોથ, માતાપિતૂનં ઉપટ્ઠાનવત્તં પૂરેથ, ધમ્મિકસમણબ્રાહ્મણે પટિજગ્ગથા’’તિ. ઉપાસિકાસુપિ એસેવ નયો.